ამ წუთებში საქართველოს მთავრობის კანცელარიასთან „ბავშვთა სამყაროს“ ხანძრით დაზარალებულები და მათი ადვოკატი ფრიდონ სიხუაშვილი მჯდომარე აქციას მართავენ.
როგორც „გურია ნიუსისთვის“ გახდა ცნობილი, აქციის მონაწილეები მთავრობისგან დახმარებას და ხანძრის მიზეზების დროულად დადგენას ითხოვენ.
დაზარალებულების ერთ-ერთი ადვოკატის, მარიკა არევაძის თქმით, პროკურატურას ჯერჯერობით ხანძრის გამომწვევი მიზეზები და პასუხისმგებელი პირები დადგენილი არ ჰყავს. დაზარალებულთა ნაწილს კი, გაუსაძლის პირობებში უწევს მუშაობა.
„ორშაბათიდან დაზარალებულები მთავრობის კანცელარიასთან 24-საათიან აქციებს მართავენ. გუშინ დიდი აქცია გვქონდა საქართველოს მთავარ პროკურატურასთან. დაზარალებულები ითხოვენ, რომ დაიწყოს სისხლის სამართლებრივი დევნა და გამოვლინდნენ პასუხისმგებელი პირები. დღეს თბილისის მერიასთანაც გავმართეთ აქცია და ვითხოვდით ხელმძღვანელ პირებთან შეხვედრას, თუმცა უშედეგოდ.
მერიისგან დაზარალებულები მოითხოვენ სავაჭრო ადგილებზე საშეღავათო პირობებით სარგებლობას და შუამდგომლობას ბანკებთან რომ პროცენტების თანხები გადაუვადდეთ. თუმცა, მერიიდან დღეს არც დაზარალებულებს და არც ადვოკატებს, არავინ შეგვხვედრია. არადა, იყო დაპირება, რომ ამ საშეღავათო პირობებით ეს ადამიანები ისარგებლებდნენ“, _ აღნიშნა „გურია ნიუსთან“ საუბრისას არევაძემ.
მისივე ინფორმაციით, დაზარალებულთა ნაწილი ბავშვთა სამყაროს მიმდებარედ, ე.წ. ბორჯომის ვაგზლის ტერიტორიაზე მუშაობს, თუმცა მათ იქ დგომისთვის გადასახდელი თანხის არა 30%-ს, არამედ 70%-ს ახდევინებენ, რაც მათთვის ძალიან დიდი თანხაა.
დაზარალებულების კიდევ ერთი ადვოკატის, ფრიდონ სიხუაშვილის თქმით, რომელიც ამ წუთებშიც მთავრობის კანცელარიასთან იმყოფება, დაზარალებულები მათი მოთხოვნების დაკმაყოფილებამდე აქციების შეწყვეტას არ აპირებენ.
„რამდენიმე მოთხოვნა გვაქვს, პირველ რიგში პრემიერთან შეხვედრა, ზიანის დროულად და სრულად ანაზღაურება, რომელიც სპეციალურმა კომისიამ უნდა დაადგინოს, თუმცა ჯერ ეს კომისია არ შექმნილა. გარდა ამისა, ვითხოვთ პასუხისმგებელი პირების გამოვლენას და მათზე სისხლის სამართლებრივი დევნის დაწყებას. საგანგებო სიტუაციების სამსახურების პასუხისმგებლობის საკითხის დაყენებას, რომლებმაც იცოდნენ, რომ ბავშვთა სამყაროში არ იყო დაცული უსაფრთხოების წესები და მაინც აძლევდნენ ადმინისტრაციას საშუალებას, იქ ხალხი შეეყვანა და მათთვის საფრთხე შეექმნა. ასევე, ჩვენი მოთხოვნაა სს „ბავშვთა სამყაროს“ ანგარიშებისა და ქონების დაყადაღება პროკურატურის მიერ. ამასთან, უნდა აეკრძალოს სადაზღვევო კომპანიას „ბავშვთა სამყაროსთვის“ საკომპენსაციო თანხის, 6 მილიონი ლარის გადახდა გამოძიების დასრულებამდე“, _ აღნიშნა „გურია ნუსთან“ საუბრისას დაზარალებულების ადვოკატმა ფრიდონ სიხუაშვილმა.
მისივე თქმით, 4 თვის განმავლობაში ასევე უპასუხოდ რჩება მათი მოთხოვნა, შექმნას მერიამ და საკრებულომ სპეციალური კომისია დაზარალებულთა მდგომარეობის შესასწავლად.
„ ამ კომისიის არარსებობა იწვევს იმას, რომ ძალიან ბევრი კითხვა რჩება უპასუხოდ და ასევე ბევრი კითხვა ჩნდება ამ ადამიანების მიმართ. სიებზე, რომელზეც ამდენი ხანია ვრცელდება არასწორი ინფორმაციები, თითქოს ის სპეციალურად არის გაბერილი და არ ასახავს რეალობას არის სრული სიცრუე. პირიქით, იმ სიებში, რომელიც თვითონ დაზარალებულებმა, მოიჯარეებმა და შპს-ებმა შეადგინეს, ყველა დაზარალებული არ არის ჩაწერილი. გაცილებით მეტნი არიან ის ადამიანები, რომლებსაც ზარალი მიადგათ. მაგრამ ბავშვთა სამყაროს ადმინისტრაცია ცდილობს პირველივე დღიდან დაპირისპირება გამოიწვიოს თავად დაზარალებულებში. კონტრაქტორებს შესთავაზეს, რომ გამოყოფოდნენ ქვეკონტრაქტორებს და დაპირდნენ მათ კომპენსაციის გადახდას; ამ ადამიანებმა აღარ გამოთქვეს პრეტენზია, რომ მიეღოთ კომპენსაციები, რასაც სხვები ითხოვენ. ახლა კომპენსაცია, ერთჯერადი დახმარება 3 ათასი ლარის ოდენობით, მხოლოდ დაზარალებულთა 1/3-ს აქვს მიღებული. ეს არის დაახლოებით 345 ადამიანი. გარდა ამისა გვაქვს 150 კაციანი სია, რომლებიც დახმარებას გვთხოვენ და არიან კიდევ სხვა დაზარალებულებიც მათ გარდა. ამაში არ შედის ოქროს ბირჟის დაზარალებულები“, _ აღნიშნავს სიხუაშვილი.
მისივე ინფორმაციით, ამ დროისთვის მთავრობის კანცელარიასთან 10-მდე დაზარალებული იმყოფება. როგორც ადვოკატი აცხადებს, წინა დღეებში, საპატრულო პოლიციამ და კანცელარიის დაცვის სამსახურმა კარვის გაშლის საშუალებაც კი არ მისცათ, რაც მისივე თქმით, შეკრებისა და მანიფესტაციის უფლების ხელყოფაა.
„ახლა, ამ წუთებში წვიმაში ვდგევართ და დაცვის სამსახური ქალბატონებსაც კი არ აძლევს საშუალებას, კანცელარიის შესასვლელთან დადგნენ. ეს არის ჩვენი ქვეყნის სამართლიანობა. კარავი რამდენჯერმე წაგვართვეს. მივმართეთ პროკურატურას მაგრამ ამაზეც დუმილს ამჯობინებენ“, _ ამბობს სიხუაშვილი და დასძენს, რომ დაზარალებულთა მოთხოვნების დაკმაყოფილებამდე აქციები მთავრობის კანცელარიასთან არ შეწყდება.
შეგახსენებთ, რომ ხანძარი „ბავშვთა სამყაროში“ 2017 წლის 30 იანვრის გამთენიისას გაჩნდა. ხანძრის შედეგად, სრულადაა დამწვარი სავაჭრო ცენტრი და მიმდებარე საწყობები. ზარალის ოდენობა ჯერჯერობით ცნობილი არ არის. აღნიშნულთან დაკავშირებით გამოძიება სისხლის სამართლის კოდექსის 187-ე მუხლით მიმდინარეობს, რაც გულისხმობს სხვისი ნივთის დაზიანებას ან განადგურებას, რამაც მნიშვნელოვანი ზიანი გამოიწვია.
შენიშვნა: ფოტოები “გურია ნიუსს” აქციიდან ერთ-ერთმა დაზარალებულმა მიაწოდა.
