ლანჩხუთის საკრებულოს მაჟორიტარობის კანდიდატები შეარჩია „ქართულმა ოცნებამ“. საკანონმდებლო ორგანოს დაკომპლექტება ძველ წესს დაუბრუნდა და მუნიციპალიტეტში ისევ 17 სამაჟორიტარო ოლქია (ქალაქის 2 და სოფლებში – 15), სადაც მმართველ პარტიას 9 ახალი სახე ეყოლება, ხოლო 8 მოქმედი საკრებულოს წევრია _ აქედან 6 მაჟორიტარი, ხოლო 2 _ პარტიული სიით არჩეული.
ქალაქის მაჟორიტარობის კანდიდატები იქნებიან კახა კვიტაიშვილი და ვანო ებრალიძე. ეს უკანასკნელი, წლებია, ქალაქის ტერიტორიული ორგანოსა და მმართველი პარტიის საარჩევნო შტაბის აქტიური თანამშრომელია და საკრებულოში მოხვედრას პირველად შეეცდება. რაც შეეხება კვიტაიშვილს, მოქმედი მაჟორიტარია და კენჭს მესამედ იყრის.
მასზე „დიდი სამაჟორორიტარო სტაჟი“ მხოლოდ ბესიკ ტაბიძესა და ელისო ჭიჭინაძეს აქვთ. ისინი ყველა ადგილობრივ არჩევნებში მონაწილეობენ, რაც „ქართული ოცნება“ ხელისუფლებაშია. შესაბამისად, მეოთხედ ეცდებიან თავიანთი სოფლის რჩეულები გახდნენ. ამას გარდა, უკვე ორი მოწვევის საკრებულოს თავმჯდომარე ტაბიძე მესამედ შეეცდება, პირველი პირი გახდეს. რაც შეეხება ჭიჭინაძეს, იმ ერთეულ დეპუტატთა შორისაა, რომელიც ხელფასს საკრებულოში არ იღებს. ამის მიზეზი მისი სამსახურია _ ქალბატონი ელისო ცნობილი ექიმი-ლაბორანტია.
ლანჩხუთის საკრებულოში მოხვედრას ალექსანდრე მახათაძე ამჯერად ისევ ჯურუყვეთის მაჟორიტარობით შეეცდება, წინა ორ არჩევნებში იგი საკრებულოს წევრი პარტიული სიით გახდა, გასულ არჩევნზე ეს სულაც ხმების დაზუსტებისას დამატებული წევრის (სიაში მე-12 იყო) ხარჯზე მოახერხა, რაც ერთობ გასაკვირი გახლდათ _ იგი ხომ 8 წელია, საფინანსო-საბიუჯეტო კომისიის თავმჯდომარეა. მანამდე კი მახათაძე ერთხელ უკვე იყო მაჟორიტარი და საკრებულოში ფრაქციას – „ქართულო ოცნება – კონსერვატორები“ ხელმძღვანელობდა.
ასევე მეოთხედ ეცდება „ქართული ოცნების“ საკრებულოში მოხვედრას გიორგი ჩახვაძე, თუმცა საკრებულოს თავმჯდომარის მაოდგილემ პირველად ეს პარტიული სიიდან მოახერხა, მაჟორიტარობის კანდიდატი კი მესამედაა. აქვე გეტყვით, რომ იგი წინა ხელისუფლების დროსაც იყო საკრებულოს წევრი.
ლანჩხუთის საკრებულოში ყოფნის ყველა რეკორდი ემზარ თედორაძეს ეკუთვნის, რომელიც საკრებულოში პირველად 25 წლის წინ მოხვდა, თუმცა აცანის მაჟორიტარად „ოცნებამ“ მისი მეუღლე, „ქართული ოცნების“ გურიის დელეგატის, ვასილ ჩიგოგიძის ბიუროს უფროსი მაია ლომთაძე შეარჩია. თედორაძე იყო აცანის (ბოლოს აცანა-მამათი-აკეთის გაერთიანებული ოქლის) მაჟორიტარი სამივე ადგილობრივ არჩევნებში, რომელიც „ოცნების“ დროს ჩატარდა, ასევე წინა ორი ხელისუფლების დროს წარმოადგენდა თემს: 2006-10 წლების მოწვევის საკრებულოში „ნაცმოძრაობის“ მაჟორიტარი იყო, ხოლო შევარდნაძის ხელისუფლების დროს, სოფლის რწმუნებულის პოზიცია ეკავა და იმდროინდელი კანონმდებლობით შესაბამისად, ავტომატურად საკრებულოს წევრიც გახლდათ. არსებული ინფორმაციით, თედორაძე აღმასრულებელ ხელისუფლებაში გადაინაცვლებს.
ლანჩხუთის კიდევ რამდენიმე თემში „ქართულმა ოცნებამ“ მოქმედ მაჟორიტარებზე გააკეთა აქცენტი. ნიგოითის მაჟორიტარობის კანდიდატი ზაზა წულაძე მესამედ იქნება, სუფსაში მეორედ _ ია მოქია, ხოლო შუხუთის მაჟორიტარად პირველად იყრის კენჭს გიორგი იმნაიშვილი, რომელიც მოქმედ საკრებულოში პარტიული სიითი მოხვდა და ინფრასტრუქტურის კომისიას ხელმძღვანელობს.
ახალი მაჟორიტარობის კანდიდატი ქალაქისა და აცანის გარდა, მმართველ პარტიას კიდევ 7 ოლქში ეყოლება. გვიმბალურში იქნება ტატო ურუშაძე, რომელიც ამჟამად სოფლის მეურნეობის ხელშეწყობისა და ტურიზმის ცენტრში მუშაობს. იგი „სახალო ბანკის“ ყოფილი მმართველის, მერაბ ურუშაძის შვილია.
მამათში „ქართული ოცნება“ ფსონს სოფლის რწმუნებულზე, გელა პატეიშვილზე აკეთებს. შეგახსენებთ, რომ წლების წინ, იგი ლანჩხუთის გამგებლობის კანდიდატი გახლდათ. სხვათა შორის, კულუარული ინფორმაციით, ხელისუფლება ყოფილ მაჟორიტარს, კახა ურუშაძეს სთავაზობდა კანდიდატობას, მაგრამ ყოფილი გამგებლის, ზაზა ურუშაძის ძმის შესახებ ინფორმაცია არ დადასტურდა.
ახალი სახეები არიან მაჩხვარეთისა და ჩოჩხათის მაჟორიტარობის კანდიდატი – თენგიზ ურუშაძე და სოსო კვაჭაძე, არსებული ინფორმაციით, პირველს მცირე ბიზნესი აქვს, ხოლო მეორე ურეკში, სამელიორაციო სამსახურში მუშაობს. სპორტის მასწავლებელი ირაკლი ტოროტაძე იქნება აკეთის მაჟორიტარობის კანდიდატი, ნინოშვილში კენჭს ვარლამ ჩხარტიშვილი იყრის, ხოლო ღრმაღელეში _ ბესიკ კვაჭანტირაძე.
