ვინ იმღერებს და რამდენს გადაუხდიან მომღერლებს, რომლებიც საახალწლო ღონისძიებებზე იმღერებენ

13 ქალაქში საახალწლო სოფლის მოწყობის, ნაძვის ხის ანთებისა და საზეიმო კონცერტებისთვის მომსახურების შესაძენად გამარტივებული შესყიდვები უკვე გამოცხადდა.

ამ დროის მონაცემებით, ღონისძიებები ჩატარდება ხობში, თელავში, ფოთში, ბოლნისში, წყალტუბოში, ახალციხეში, რუსთავში, ბორჯომში, ქუთაისში, საგარეჯოში, ლაგოდეხში, ზუგდიდსა და სამტრედიაში. ჯამში დაგეგმილ ღონისძიებებზე ბიუჯეტიდან 528 ათას ლარზე მეტი დაიხარჯება.

ვინ იმღერებს საახალწლო ღონისძიებებზე და რამდენს გადავუხდით?

ხობი – საახალწლო ღონისძიება 28 დეკემბერს ჩატარდება. ღონისძიებაზე იმღერებს „ღამის შოუ გაბუნიასთან ერთად“, რაშიც ბიუჯეტიდან 30 000 ლარი დაიხარჯება.

თელავი – ზაირა არსენიშვილის სახელობის თელავის მუნიციპალიტეტის კულტურის ცენტრმა გამარტივებული შესყიდვით შეიძინა ნაძვის ხის ანთების ღონისძიების მომსახურება, რაშიც ბიუჯეტიდან 63 953 ლარს და 64 თეთრს ხარჯავს. 21 დეკემბერს ჩანიშნულ ღონისძიებას გააფორმებენ: არჩილ ნიჟარაძე, გიორგი კუხიანიძე, დავით მაზანაშვილი, ნიკა ნიკვაშვილი, სალომე ბაკურაძე და ქეთევან გაბისიანი.

ფოთი – 22 დეკემბერს ფოთში ნაძვის ხის ანთების ღონისძიებაზე იმღერებენ „ღამის შოუ გიორგი გაბუნიასთან ერთად“ და „მიქსტურა“. კონცერტისთვის მერია ბიუჯეტიდან 45 000 ლარს ხარჯავს, საიდანაც „ღამის შოუს ბენდს“ 30 ათასს, ხოლო „მიქსტურას“ 15 ათასს უხდის.

ბოლნისი – მუნიციპალიტეტის კულტურის ცენტრი 28 დეკემბრის საახალწლო კონცერტში გამარტივებული შესყიდვით 10 000 ლარს ხარჯავს. კონცერტზე ჯგუფი „ფორტე“ იქნება წარმოდგენილი. ამასთანავე, იმღერებს პაატა გულიაშვილიც, რომელსაც ბიუჯეტიდან 7 654 ლარს გადაუხდიან.

წყალტუბო – 24 დეკემბერს „საახალწლო სოფლის“ გახსნაზე „მიქსტურა“ იმღერებს, რაშიც ბიუჯეტიდან 12 000 ლარი დაიხარჯება. ღონისძიებაზე იქნება „მოსიარულე დრამერიც“ (გიორგი ბექაური), რომლის მომსახურებაშიც 4 600 ლარი იხარჯება.