მთავრობა მარიხუანის წარმოებას მწვანე შუქს უნთებს.
მთავრობის მიერ მომზადებული ინიციატივის მიხედვით, მარიხუანის წარმოება ექსპორტზე გატანის მიზნით ნებადართული გახდება. აღნიშნულ ინიციატივას წინ უძღოდა საკონსტიტუციო სასამართლოს გადაწყვეტილება, რომლის მიხედვით მარიხუანის მოხმარება ლეგალური გახდა.
საქართველოში მარიხუანის პლანტაციების გაშენება და მისი ექსპორტზე გატანა საზოგადოებაში ბევრ კითხვას აჩენს _ ვინ დგას ამ საკანონმდებლო ინიციატივის უკან და იკვეთება თუ არა მასში კონკრეტული პირების ბიზნესინტერესები? _,,გურია ნიუსი“ აღნიშნული საკითხის გარკვევას შეეცადა.
საკითხზე პოლიტიკის ექსპერტის გია ხუხაშვილს ვესაუბრეთ.
_ ბატონო გია, როგორ ფიქრობთ, მთავრობის მიერ მომზადებულ ინიციატივაში შესაძლებელია, იკვეთებოდეს კონკრეტული პირების ბიზნესინტერესები?
_ პატარა ქვეყნებში ასეთი თემების წამოწევა სერიოზულ ეჭვებს აჩენს. არ გამოვრიცხავ, რომ კონკრეტული პირების ინტერესები იკვეთებოდეს და მათი ლობირებით ხდებოდეს მარიხუანის წარმოების დღის წესრიგში დაყენება.
საქართველოს სჭირდება ეკონომიკური განვითარება და ეკონომიკურ განვითარებას სჭირდება საღი და არა დაბოლებული გონება.
ბუნებრივია, მარიხუანის ექსპორტზე გატანა ვიღაცის ინტერესშია. ეს პირი ოქროს გორებს უხატავს მთავრობას, რომ ექსპორტზე გატანა ააღორძინებს ეკონომიკას. მთავრობა კი, რომელიც ქვეყანაში სწრაფ ეკონომიკურ განვითარებას ვერ ახერხებს, შესაძლოა, წამოეგოს ასეთ ლობირებას.
_ როგორ ფიქრობთ, აღნიშნული ინიციატივის მომზადება რამდენად უკავშირდება ბიძინა ივანიშვილისა და უჩა მამაცაშვილის სახელს?
_ ამ ბიზნესის შესაძლებლობები ბიძინა ივანიშვილისთვის საინტერესო არ შეიძლება იყოს. მარიხუანის ექსპორტი იმდენად წვრილმანია მისთვის და იმდენად სერიოზულ მორალურ დანაკარგებს უკავშირდება, რომ მას არანაირად უღირს ამ ბიზნესით დაინტერესება. უჩა მამაცაშვილი საერთოდ ლეგენდაა, მას კარგად ვიცნობ და მისი სუპერ მაფიოზად წარმოჩენა ძალიან სასაცილოა.
მთავრობის მიერ მომზადებული კანონპროექტი კითხვის ნიშნებს აჩენს მმართველი გუნდში. საკითხზე ,,გურია ნიუსთან“ ,,ქართული ოცნების“ წევრი რევაზ არველაძე საუბრობს. დეპუტატისთვის გასაკვირი არ არის, რომ მთავრობის მიერ მომზადებულ კანონპროექტში კონკრეტული პირების ბიზნესინტერესები იკვეთება.
,,მე მხარს ვუჭერდი მარიხუანის მოხმარების ლიბერალიზაციას, ამავდროულად, მგონია, რომ მისი გავრცელება და რეკლამირება უნდა ისჯებოდეს. რამდენად კარგი იქნება საქართველოსთვის ნარკოტიკის წახალისება ამაზე კომენტარის გაკეთება ძალიან რთულია. როდესაც წარმოებაზეა საუბარი შესაძლოა არალეგალურად წავიდეს საქმე“, _ გვითხრა არველაძემ.
_ ბატონო რევაზ, შესაძლოა თუ არა, რომ მთავრობის მიერ მომზადებულ კანონპროექტში კონკრეტული პირების ინტერესები იკვეთებოდეს?
_ ცხადია, ვინც ამ ბიზნესით იქნება დაკავებული, იმას ინტერესი ექნება, აბა, ტყუილად ხომ არავინ მოამზადებს ინიციატივას?!
მთავრობის ახალი ინიციატივის შესახებ ცნობილი გუშინ გახდა. კანონპროექტის თანახმად, საქართველოში ექსპორტზე გატანის მიზნით მარიხუანის წარმოება ნებადართული გახდება.
