4 ოქტომბერს, ადგილობრივი თვითთმართველობის არჩევნების დღეს, პარალელურად თბილისში ოპოზიციური პოლიტიკური ძალებისა და აქტივისტების მონაწილეობით, რომლებიც არ აღიარებენ ხელისუფლებას და საპარლამენტო არჩევნების შედეგებს, მასშტაბური საპროტესტო აქცია გაიმართა.
სიტყვით გამოსვლისას “ნაცმოძრაობის” ერთ-ერთმა ლიდერმა მურთაზ ზოდელავამ შეკრებილებს მიმართა და “მამაკაცურ ძალას” მოუწოდა, რომ “ვითომ პრეზიდენტისთვის მიეკითხათ, თვალებში ჩაეხედათ და პრეზიდენტის რეზიდენციის გასაღები ჩაებარებინათ”.
საპროტესტო აქცია ათონელის ქუჩაზე მდებარე პრეზიდენტის რეზიდენციასთან დემონსტრანტებსა და სამართალდამცავებს შორის დაპირისპირებაში გადაიზარდა _ აქციის მონაწილეებმა რკინის ღობე წააქციეს (რკინის ღობე, “ტვ პირველის” ჟურნალისტების მტკიცებით, წინასწარ იყო გადახერხილი, რომ ადვილად წაქცეულიყო).
ცოტა ხანში მურთაზ ზოდელავამ “ოცნების” ოფისისიკენ წასვლა დააანონსა, სადაც მმართველი პარტია თვითმმართველობის არჩევნებში წინასწარ შედეგებს ზეიმობდა, თუმცა, აქციის მონაწილეები იქ აღარ მისულან, ზოდელავამ კი ამ ნაბიჯს “ტაქტიკური სვლა” უწოდა.
გავრცელებული ინფორმაციით, დაშავდნენ როგორც სამართალდამცავები, ასევე აქციის მონაწილეები, მათ შორის პაატა ბურჭულაძე, რომელიც აქციიდან ჯერ საავადმყოფოში გადაიყვანეს, შემდეგ კი დააკავეს.
აქციის დღეს განვითარებულ მოვლენებს სოციალურ ქსელში “ნაციონალური მოძრაობის” ოზურგეთელი ლიდერი დავით მჟავანაძე:
“როდესაც დამხობას, თუნდაც, მშვიდობიანს, აანონსებ, უნდა იცოდე, რომ მინიმუმ წიწაკის სპრეიც მოგიწევს სახეში და ამის გამო არ უნდა გაიქცე კლინიკაში. ისეთი გეგმა რომ გქონდა, 8 საათზე ხელისუფლება შეცვლილი რომ უნდა ყოფილიყო და არც მაგ გეგმის შესახებ გვსმენია დღეს აქციაზე მყოფებს არაფერი, ეგ ცალკე ამბავია.
სამწუხაროდ მარტო მე არ ვფიქრობ ასე“, _ წერს სოციალურ ქსელში მჟავანაძე და ამას გარდა კიდევ ერთ პოსტს აქვეყნებს.
“ეს პოსტი გუშინ აქციის დაწყებამდე რამდენიმე წუთით ადრე დავწერე და შეგნებულად არ გავხადე დაჯარო ფართო აუდიტორიისათვის, რადგან არ მინდოდა ერთი ადამიანი მაინც დამებრკოლებია. იმედი მქონდა, რაღაც ისეთი მოხდებოდა, რაც რეჟიმს უკან დაახევინებდა მაგრამ ეს ასე არ მოხდა. სამაგიეროდ კიდევ ერთხელ დავრწმუნდით, რომ საზოგადოებაში პროტესტი არა თუ არსად არ წასულა, უფრო მეტიც _ ის მზარდია და ადრე თუ გვიან აუცილებლად გამოიღებს თავის შედეგს.
დაშვებულ შეცდომებზე შეგნებულად არ ვისაუბრებ, რადგან ყველა ორგანიზატორი დღეს ციხეშია, სოლიდარობა თითოეულ მათგანს. გამოუვიდათ თუ არა მათ დაიჯერეს და სცადეს იმ დიდი რისკის მიუხედავად რომელსაც ძალიან კარგად აცნობიერებდნენ.
პროტესტი აუცილებლად უნდა გაგრძელდეს!!!”
4 ოქტომბერს განვითარებული მოვლენების შეფასებისას “ლელო-ძლიერი საქართველოს” ჩოხატაურელი ლიდერი ნუგზარ ჩხიკვაძე გვეუბნება:
_ 4 ოქტომბერი იყო სრულიად უტოპიური და სულელური ღონისძიება. პოლიტიკაში ოდნავ ჩახედული ადამიანისთვის იმთავითვე ნათელი იყო, რომ მთელი ეს მასკარადი იმისთვის მოაწყვეს, ხალხი არჩევნებზე არ მისულიყო და არჩევნები კალაძეს მოეგო.
ყველა არჩევნების წინ “ნაციონალური მოძრაობა” ისე იქცევა, რომ “ოცნებამ” გაიმარჯვოს.
“ოცნების” ვერანაირი წინასაარჩევნო კამპანია ვერ იქნებოდა ისეთი წარმატებული, როგორც “ნაცების” მიერ აგორებული ბოიკოტის კამპანია.
ბოიკოტისტებმა ხონჩით მიართვეს გამარჯვება “ქოცებს“.
ახლაც იგივეს აგრძელებენ და უკვე საპარლამენტო არჩევნების ბოიკოტზე დაიწყეს საუბარი.
ახლა საპარლამენტოში კონსტიტუციური უმრავლესობით მოაგებინებენ “ქოცებს“, თუ მანამდე ამომრჩეველი არ მოეგო გონს.
_ რას ფიქრობთ აქციის დროს განვითარებულ მოვლენების შესახებ?
_ 1905 წლის 9 იანვრის მოვლენების ზუსტი გამეორება იყო. ბლომად გაპონები გვყავს. ახლა ყველა ხელს იბანს და არავის პასუხისმგებლობის აღება არ უნდა.
არადა სამი თვე იძახეს _ მშვიდობიანად დავამხობთ ხელისუფლებასო. გულწრფელი ადამიანები დაარწმუნეს მაგ სისულელეში და შედეგად მივიღეთ ის, რაც მივიღეთ.
_ გაპონის ხსენებისას, კონკრეტულად ვის გულისხმოდით?
_ ვინც დაიძახა, მივიდეთ პრეზიდენტის სასახლეშიო. რა ესაქმებოდა რუსთაველის გამზირზე მდგომ მშვიდობიან აქციას პრეზიდენტის რეზიდენციასთან? ხომ იყო ხალხი რუსთაველზე შეკრებილი, ხომ იცოდნენ, რომ მოაგებინეს კალაძეს არჩევნები? ათონელზე რაღა უნდოდათ?
მაგ საქციელით “ქოცებს” სალაპარაკო მისცეს _ მომიტინგეებს გადატრიალება უნდიდათო.
“ქოცებმა” ერთწლიან მშვიდობიან აქციას ვერაფერი მოუხერხეს, ამათ კი ერთი დაძახილით მთელი ეს აქტიურობა წყალში გადაყარეს.
ახლა იძახიან, შეცდომა მოგვივიდაო.
შეცდომით გასროლით რომ კაცი მოკლა, მსროლელი _ მკვლელია და მოკლული _ მოკლულია.
ამხელა აქციას რომ ატარებ, ყველაფერი უნდა გაითვალისწინო და სისულელეები არ უნდა აკეთო.
მთელი ამ ბოიკოტი–მშვიდობიანი დამხობის შედეგი რა იყო? “ქოცებისთვის” ჩაბარებული ადგილობრივი თვითმმართველობა, ორმოცდაათამდე ციხეში გამომწყვდეული ადამიანი და ფრუსტრაციაში ჩავარდნილი ამომრჩეველი. ვინ მოიგო ამ ეპოპეით? ” ქართულმა ოცნებამ“. ამიტომაც ვახსენე გაპონები.
4 ოქტომბერს განვითარებული მოვლენების შეფასებისას ალეკო ბურჭულაძე ამბობს:
“ხელისუფლების შეცვლა არჩევნების გზით უნდა მოხდეს, დამხობისა და “რევოლუციის” გარეშე… ხელისუფლება ყოველთვის გამოიყენებს ოპოზიციის შეცდომებს საკუთარი სარგებლისთვის. რატომ გვიკვირს ეს? ოპოზიციას უნდა შეეძლოს თავისი შეცდომების აღიარება და, რაც მთავარია, მათი გამოსწორება… ალბათ პარტიულ–პოლიტიკური ველიც უნდა გადახალისდეს , არა მხოლოდ ინდივიდების დონეზე, არა მხოლოდ სუბიექტების დონეზე, არამედ პროცესისა და მიდგომის დონეზეც“.
ინფორმაციისთვის, 4 ოქტომბრის აქციასთან დაკავშირებით, დააკავეს 71 წლის პროფესორი გიორგი ჩახუნაშვილი _ პედიატრი, ბავშვთა კარდიოლოგი-რევმატოლოგი, ასევე, დიზაინერი, არტდირექტორი ია დარახველიძე, რომლებიც მეორე დღეს გირაოთი გაათავისუფლეს.
დაკავებულთა შორის არიან 4 ოქტომბრის აქციის ორგანიზატორები: პაატა ბურჭულაძე, პაატა მანჯგალაძე, მურთაზ ზოდელავა, ირაკლი ნადირაძე და ლაშა ბერიძე.
მურთაზ ზოდელავამ დაკავებამდე ჟურნალისტებთან განაცხადა:
“შეიძლება ნაკლებად კრეატიულები ვიყავი, ნაკლებად ორგანიზებულები, მაგრამ, გეუბნებით პირდაპირ, რომ დიქტატურაში პროცესების დონორს ვერ იპოვით. სერიოზულ ორგანიზებას ვერ მოახდენთ, იმიტომ, რომ დონორი თქვენთან თუ მოვიდა, ეს ნიშნავს, რომ უნდა გაყიდოთ სამშობლო ან პრინციპები. სხვანაირად არავინ რესურსს არ ჩადებს, რომ უკეთ ორგანიზდეთ. ეს არის “შაპრგალკა“, რჩევები იმათთვის, ვინც გააგრძელებს ბრძოლას.
აუცილებლად, ეს ბრძოლა უნდა გაგრძელდეს. ეს ერი შეუძლებელია ვინმემ დაამარცხოს, შეუძლებელია გადატეხოს. შეიძლება დაგვთრგუნონ, დაგვპრესონ, მაგრამ არ დავიმტვრევით. ეს ამ ერმა აჩვენა ფანტასტიკურად, დღეს.
მინდა მოვასწრო [თქმა], რომ ორგანიზება რთულია, შეუძლებელიც, იმიტომ, რომ სრული დიქტატურაა. არ დაელაპარაკოთ (ფინანსურ) რესურსიან ხალხს, აზრი არ აქვს, მაგაში დრო არ დახარჯოთ. ეძებეთ თქვენნაირი გულანთებულები, თქვენნაირი ხალხი. იქ მეტი სარგებელი იქნება, მეტი თანადგომა იქნება და მეტ საიდუმლოს შენახვაც იქნება. ეს მნიშვნელოვანია ძალიან. ენდეთ იმათ, ვისი ნდობის შინაგანი გრძნობაც გაქვთ. თუ რაღაც გკარნახობთ, რომ არ უნდა ენდოთ _ არ ენდოთ იმას. არ დანებდეთ, მოკლედ, რა.
ჩვენ ვიყავით ალალი გულით. მე პირადად, ჩემ პასუხისმგებლობას არავის არ გადავაკისრებ, ჩემი პირადი ჯანყი იყო. არ ვნანობ“, _ განაცხადა მურთაზ ზოდელავამ, რომლის ორაზროვანმა საუბარმა კიდევ უფრო ბუნდოვანი გახადა 4 ოქტომბრის მოვლენები _ აქციის ორგანიზატორმა, არ დააკონკრეტა, ვინ იგულისხმა “დონორებში”, “რესურსებიან” ხალხში ან ვის ენდო თვითონ ზოდელავა.
6 ოქტომბერს დააკავეს 13 ადამიანი: ბექა მაჭავარიანი, ალექსანდრე გოგოლაძე, ევა შაშიაშვილი, გიორგი რურუა, ვახტანგ ფიცხელაური, დავით სტურუა, მანუჩარ მიქელაძე, ალექსანდრე ხაბეიშვილი, კახაბერ მჟავანაძე, თორნიკე მჭედლიშვილი, აბო ნავერიანი, სერგო მეგრელიშვილი, დავით ჟღენტი – ყველა მათგანს აღკვეთის ღონისძიებად პატიმრობა შეუფარდეს;
7 ოქტომბერს პოლიციამ დააკავა აქციის ოთხი მონაწილე;
8 ოქტომბერს დააკავეს 12 დემონსტრანტი;
9 ოქტომბერს კი სიას კიდევ რვა დემონსტრანტი დაემატა.
10 ოქტომბერს გამოძიების ფარგლებში კიდევ ერთი პირი დააკავეს.
როგორც ირაკლი კობახიძე აცხადებს, დაკავებულთა რიცხვი, სავარაუდოდ, გაიზრდება.
სავარაუდოდ, დაკავებულთა რაოდენობა გაიზრდება:
“ჩვენ ვაფრთხილებდით ყველას იდენტიფიცირების შესაძლებლობებთან დაკავშირებით, ვაფრთხილებდით, რომ გვქონდა მოძალადეების იდენტიფიცირების კიდევ უფრო მეტი რესურსი, ვიდრე მანამდე“, _ განუცხადა კობახიძემ ჟურნალისტებს გურჯაანში.
კობახიძის თქმით, ყველა მოძალადე, ვინც იქნება იდენტიფიცირებული, მიეცემა პასუხისგებაში.
“დარწმუნებული ვარ, ეგრეთ წოდებულ ევროპელ ბიუროკრატებს, სანდუს და ასე შემდეგ, წინასწარ ჰქონდათ გამზადებული ტექსტები, რომ მხარდაჭერა გამოეცხადებინათ, რადგან ყველასთვის ცნობილი იყო, რომ 4 ოქტომბერს უნდა მომხდარიყო “მშვიდობიანი დამხობა“, _ ამის შესახებ “ოცნების” ხმოსნების არჩეულმა პრეზიდენტმა მიხეილ ყაველაშვილმა საქართველოს პირველი არხის გადაცემაში “აქტუალური თემა მაკა ცინცაძესთან ერთად” განაცხადა და გარე აქტორების როლსა და ოპოზიციაზე გავლენასთან დაკავშირებით დასმულ კითხვას უპასუხა.
ყაველაშვილის თქმით, მარტივია, ევროპელმა ლიდერებმა დაგმონ პრეზიდენტის ადმინისტრაციაზე შტურმი, თუმცა, ამას არ აკეთებენ.
როგორც ყაველაშვილმა აღნიშნა, ხელისუფლება და ხალხი დღეს ძლიერია:
“სუსტი ხელისუფლება რომ იყოს, აქ, პრეზიდენტის სასახლეშიც კარგად შემოვიდოდნენ. ეს დაგეგმილი იყო. აფარებული ჰყავდათ ეს საცოდავი ხელოვანი ადამიანი, ახლა ექიმზე აქვთ საუბარი. ნახეთ, ესეც როგორი ტექნოლოგიაა, უნდა გაგიჩნდეს ადამიანური გრძნობა. მანამდე, ადამიანი ძალადობდა, ანგრევდა ყველაფერს და ეს ძალადობაც როგორ აქვთ წარმოჩენილი, ხომ? ჯერ ერთი, როგორი მზაკვრული გეგმაა ერთმანეთის დაპირისპირების, განადგურების, უნდა გეზიზღებოდეს. არ შეიძლება, პოლიციელთან თანაგრძნობა გაგიჩნდეს, თუ შენ, ახალგაზრდას, ნეიტრალურ ადამიანს ეს თანაგრძნობა გაგიჩნდება აქციაზე, იქ ვეღარ წახვალ ძალადობაზე და ამიტომ უნდა გეზიზღებოდეს. ამიტომ არის ეს ტექსტები, რუსეთი, რუსული, ომონი, დიქტატორი. ბიძინა ივანიშვილზე რას აღარ ამბობენ, რადგან ეს ზიზღი თუ არ ექნებათ და ამ ზიზღში თუ არა აცხოვრეს, ისე ვერ იმოქმედებენ. ბიძინა ივანიშვილი თუ არ შეაზიზღეს, რომ ნახავს მის ქველმოქმედებებს, სიკეთეს, ხომ იკითხავს ადამიანი და რომ იკითხოს, ხომ აღარ გაუჩნდება ზიზღი? ელემენტარულად, შეიძლება, განსხვავებული პოლიტიკური აზრი ჰქონდეს, მაგრამ ზიზღი არ ექნება“, _განაცხადა ყაველაშვილმა.
10 ოქტომბრის მონაცემებით, შინაგან საქმეთა სამინისტრომ 4 ოქტომბრის აქციასთან დაკავშირებით 46 მოქალაქე დააკავა.
გამოძიება სისხლის სამართლის კოდექსის 317-ე, 222-ე, 225-ე და 187-ე მუხლებით მიმდინარეობს.
