გუშინ დილით გავრცელდა ინფორმაცია რომ თბილისის „დინამოს“ მთავარი მწვრთნელი კახა ცხადაძე გადადგომას აპირებდა. მოარული ხმებით, ამ გადაწყვეტილების უმთავრესი მიზეზი კლუბის წარუმატებელი სატრანსფერო პოლიტიკა გახლდათ. ცხადაძის აზრით, ამ შემადგენლობის თბილისის „დინამოს“ მაღალი მიზნებისათვის ბრძოლა არ შეუძლია. საუბარია როგორც საქართველოს პირველობაზე, ასევე მოახლოებულ ევროტურნირებზე.
ამ ინფორმაციიდან რამდენიმე საათში ცხადაძის წასვლა ოფიციალურად დადასტურდა.
ვინ შეიძლება შეცვალოს ცხადაძე? ქართული სპორტული მედიის მტკიცებით „დინამო“ სამ კანდიდატურას განიხილავს – თემურ ქეცბაიას, რომელიც „ანორთოსისიდან“ წამოვიდა, ლევან კორღალიძეს, ვინც ახლახან დატოვა „საბურთალო“ და გიორგი ჭიაბრიშვილი, რომელსაც სეზონის დაწყების წინ „ლოკომოტივიდან“ წასვლის შემდეგ არსად უმუშავია.
გუშინ საინტერესო ინფორმაცია მოვიდა რუსეთიდან. კლუბი „ურალის“ პრეს-სამსახურმა გაავრცელა ოფიციალური ცნობა, რომ გუნდში 18 წლის ქართველი ნახევარმცველი ლუკა წულუკიძე დაბრუნდა.
ახალგაზრდა ფეხბურთელი რუსულ გუნდში ზამთრის სატრანსფერო ფანჯრის პერიოდში ჩაირიცხა, თუმცა უკრაინაიში ომის დაწყების შემდეგ მან ფიფა-ს ახალი კანონით ისარგებლა და გუნდიდან წავიდა. წულუკიძე „საბურთალოში“ დაბრუნდა, ახლა კი კვლავ რუსულ კლუბს დაუბრუნდა.
ცნობილი გახდა რომ კრაკოვის „ვისლაში“ მყოფი გიორგი წიტაიშვილი, რომელიც სეზონის სტარტზე იჯარის წესით ოდესის „ჩერნომორეცში“ იმყოფებოდა, კიევის „დინამოში“ დაბრუნდა.
გუშინ წიტაიშვილი უკრაინულ მასმედიას ესაუბრა:
„რუსეთში ადამიანებს არ აქვთ საკუთარი აზრი, ფულის გულისთვის პირს დახურავენ და უყურებენ ხალხის და ბავშვების სიკვდილს. ამ ადამიანებს არ სურთ განვითარება და ნორმალური ცხოვრება, რადგან ამის შემდეგ რუსეთში ნორმალური ცხოვრება არასოდეს იქნება. მთელი მსოფლიო შეიძულებს ამ ქვეყანას, ამ ხალხს, ეს ქვეყანა დაიხურება, თითქოს მათ ირგვლივ კედელი აიგება. ეს სხვა სამყარო იქნება. მათ ეშინიათ ციხეში ჩაჯდომის და სურთ იცხოვრონ ქვეყანაში, სადაც არაფერი მოხდება. ჩემთვის რუსეთმა არსებობა შეწყვიტა. ადრეც ვიცოდი, რა ხდებოდა საქართველოში, ცუდი დამოკიდებულება მქონდა მათი პრეზიდენტის მიმართ. მაგრამ ყველა იქ მყოფი ადამიანი – რა თქმა უნდა, შეიძლება სადღაც ქვეყანაში იყოს ორიოდე ნორმალური ადამიანი, ასიდან ერთი პროცენტი. მაგრამ ის ერთი პროცენტიც კი არ შემიმჩნევია. ასეთი ხალხი ცოტაა.
სულ არ ვარ დაინტერესებული რუსული კლუბების შემოთავაზებებით. არც განვიხილავ მათ. ჩემი ფოტო ბასტასთან? ის ერთ-ერთია, ვისაც ფულის ეშინია. შესაძლოა, მისნაირები არ უჭერენ მხარს ამ ომს, მაგრამ ეშინიათ ფულის და ტკბილი ცხოვრებისა. თუ ხმამაღლა იტყვიან, წამში ყველაფერს დაკარგავენ“, – განაცხადა გიორგი წიტაიშვილმა.
ორი დღის წინ გავრცელდა ინფორმაცია, რომ კრიშტიანო რონალდომ შეიძლება „მანჩესტერ იუნაიტედი“ დატოვოს, რადგან ახალი მწვრთნელის ერიკ ტენ ჰაგის გეგმებში არ ჯდება და შეიძლება კარიერა იტალიურ „რომაში“ გააგრძელოს.
გუშინ ბრიტანულ სპორტულ მედიაში ჟურნალისტმა ჯონათან შრაგერმა გაავრცელა ცნობა, რომ თავად რონალდოს არსად წასვლის სურვილი არ აქვს და მანჩესტერში მინიმუმ ერთი წელი დარჩება.
ფრანგულმა „პარი სენ-ჟერმენმა“ კი შეიძლება გუნდის ერთ-ერთი ვარსკვლავი, ბრაზილიელი ნეიმარი დაითხოვოს.
ნეიმარს „პსჟ“-სთან კონტრაქტი 2025 წლის ზაფხულამდე აკავშირებს. პარიზული კლუბის ხელმძღვანელებისთვის 30 წლის ბრაზილიელის გაყიდვა ძალიან მომგებიანი იქნება – სამხრეთამერიკელის ტრანსფერში „პსჟ“ დიდ თანხას მიიღებს. გარდა ამისა, ფრანგულ კლუბს ბრაზილიელის ხელფასი გადასახდელი აღარ ექნება.
თავად ნეიმარს „პარი სენ-ჟერმენის“ დატოვება არ სურს და ამაზე უარს იძახის. მეტიც, გავრცელდა ცნობები, რომ ბრაზილიელმა ყველა იმ კლუბს, რომელიც მას დაუკავშირდა, ამცნო, რომ „პსჟ“-ში რჩება და არსად წასვლას არ აპირებს.
პარიზული კლუბის ხელმძღვანელობისთვის ლიონელ მესის გუნდში დარჩენა პრიორიტეტია. ამის მიზეზი ისევ ფულია. მესის „პსჟ“-სთან ხელშეკრულება მომავალ წელს ეწურება, ხოლო მისი ასაკიდან გამომდინარე, კლუბი არგენტინელის ტრანსფერში დიდ ფულს ვერ აიღებს.
ავტორი
