ჩვენი ინფორმაციით, ბახმაროს ადმინისტრაციულ ერთეულში მერის წარმომადგენელი იცვლება. ინფორმაციას ჩვენთან საუბრისას ადასტურებს რომან კალანდაძეც, რომელიც აღნიშნულ პოსტს გასული წლის დეკემბრიდან იკავებს.
“თვის ბოლოდან შევწყვეტ უფლებამოსილებას”,_ განუცხადა “გურია ნიუსს” სატელეფონო საუბრისას რომან კალანდაძემ.
_ რატომ წყვეტთ უფლებამოსილებას? ეს მერის გადაწყვეტილებით ხდება თუ საკუთარი სურვილით?_ ჩვენს კითხვაზე პასუხის გაცემას კალანდაძემ თავი აარიდა და ჩოხატაურის მერიასთან გადაგვამისამართა.
_ შეგიძლიათ მერს და მერიის პრესსამსახურს მიმართოთ აღნიშნულ თემაზე. თვის ბოლოდან ხელშეკრულებები წყდება და დავტოვებ ბახმაროს ადმინისტრაციულ ერთეულს. მერის წარმომადგენლის უფლებამოსილებას შევწყვეტ,_ განაცხადა კალანდაძემ.
ინფორმაციას, იმის შესახებ, რომ ბახმაროს ადმინისტრაციულ ერთეულში მერის წარმომადგენელი იცვლება, ჩვენთან საუბრისას ჩოხატაურის მერი, დავით შარაშიძეც ადასტურებს.
“გიდასტურებთ ინფორმაციას. კალანდაძემ საკუთარი სურვილით დატოვა თანამდებობა”,_ ამბობს შარაშიძე.
_ ბატონო დათო, ვინ შეცვლის რომან კალანდაძეს?
_ ჯერ არ გადაგვიწყვეტია.
მერიის პრესსამსახურში კი განმარტავენ, რომ მერის ყველა წარმომადგენლის ხელშეკრულება გრძელდება 31 დეკემბრის ჩათვლით, შემდეგ თავიდან უნდა გაფორმდეს ხელშეკრულებები. ვის გაუგრძელდება და ვის არა ხელშეკრულება, ამის შესახებ გადაწყვეტილებას მერი მიიღებს.
ავტორი
