ვიდრე იარსებებს თუნდაც თეორიული მცირე შანსი, აქ ვართ, ვმუშაობთ და ვაკეთებთ ყველაფერს, რაც არის ტექნიკის და ადამიანის შესაძლებლობების ფარგლებში, – ამის შესახებ საგანგებო სიტუაციების მართვის სამსახურის უფროსმა თემურ მღებრიშვილმა ჟურნალისტებთან განაცხადა.
„ინტენსიურად გრძელდება და მიმდინარეობს საძიებო სამუშაოები. გუშინ გვიან ღამემდე მიმდინარეობდა ოპერატიული თათბირი, რომელსაც მინისტრი ატარებდა, ამ დილითაც გაგრძელდა თათბირი და მინისტრისგან მიიღეთ დავალებები თუ რა კონკრეტულ ღონისძიებებზე უნდა გადავიტანოთ აქცენტი. გარდა ამისა, მიმდინარეობს ამბროლაურამდე 18 სექტორად დაყოფილი რიონის კალაპოტში საძიებო სამუშაოები. ეპიცენტრში დღეს ნანახი იქნა „ჰიუნდაის“ მარკის ავტომობილი, სადაც ჩვენი ინფორმაციით, იმყოფებოდა 3 ადამიანი და ამ დროისთვის კონკრეტულ ლოკაციებზე მიდის სამუშაოები. ასევე, მინდა დავამატო ინფორმაცია, რომ სტიქიის ეპიცენტრის ძირითადი ნაწილი დამუშავებულია, დარჩენილია 25-26%, რომელსაც ვფიქრობთ, რომ 2 დღის განმავლობაში სრულად გადავამოწმებთ. მუშაობა არ წყდება, ვიდრე იარსებებს თუნდაც სულ მცირე თეორიული შანსი”,_ განაცხადა მღებრიშვილმა.
