ვიქტორ ოსიმენს „ნაპოლის“ დატოვება სურს

გუშინ, გამოცემამ „Gazzetta Dello Sport“ გაავრცელა ცნობა, რომ ვიქტორ ოსიმენმა შესაძლოა „ნაპოლი“ იანვარში დატოვოს.

ნიგერიელის კონტრაქტი 2025 წლის ზაფხულში იწურება, მაგრამ ბოლო დროს განვითარებული მოვლენების შემდეგ რთული წარმოსადგენია, რომ მხარეებმა მის განახლებაზე შეთანხმებას მიაღწიონ.

სოციალურ ქსელში „ნაპოლის“ მიერ გამოქვეყნებული ვიდეოს შემდეგ, ოსიმენი ძალიან გაბრაზდა. აფრიკელი „ნაპოლიდან“ წასვლაზე რომ ფიქრობს, მისმა მეგობარმა და ჟურნალისტმა ომა აკატუგბამ დაადასტურა, რომელმაც განაცხადა:

„წარმოუდგენელია, რომ შენი კლუბი გაცუდებული პენალტის გამო დაგცინის. სირცხვილია, მიუღებელია, პატივისცემის დიდი ნაკლებობაა, სასაცილოა, უხეში შეცდომაა. ჩვენ ვსაუბრობთ იტალიის ჩემპიონატის საუკეთესო თავდამსხმელზე, „ოქროს ბურთის“ კანდიდატზე და „სერია A“-ს საუკეთესო ფეხბურთელზე. და მას ასე ექცევიან მხოლოდ იმიტომ, რომ 2-3 თამაშია გოლი არ გაუტანია? ახლა რა იქნება? „ნაპოლი“ ვიქტორ ოსიმენს დაკარგავს. ის არ გააგრძელებს კონტრაქტს და სურს, რაც შეიძლება მალე წავიდეს. მხოლოდ იმას ვამბობ, რაც გარდაუვალია. ოსიმენი, რაც შეიძლება მალე წავა, არც ერთი გუნდი არ დასცინის თავის საუკეთესო ფეხბურთელს“.

გუნდის დატოვების პარალელურად, ვიქტორ ოსიმენმა, შესაძლოა, თავისი გუნდის წინააღმდეგ სარჩელი შეიტანოს. ამის შესახებ ნიგერიელის აგენტმა, რობერტო კალანდამ სოციალურ ქსელში დაწერა.

საქმე იმაშია, რომ „ნაპოლიმ“ ოსიმენზე TikTok-ის ოფიციალურ გვერდზე დამცინავი ვიდეო გამოაქვეყნა, რომელიც შემდეგ წაშალა.

„რაც დღეს ნაპოლის TikTok-ის ოფიციალურ გვერდზე მოხდა, მიუღებელია. ვიდეო, რომელშიც ვიქტორს დასცინიან, ჯერ გამოქვეყნდა, შემდეგ კი, მოგვიანებით, წაიშალა. ეს სერიოზული შემთხვევაა, რომელიც ფეხბურთელს ზიანს აყენებს და ემატება იმას, რასაც ის ბოლო პერიოდში მედიაში გარჩევებისა და ფეიკ ნიუსების გამო განიცდის. ვიტოვებთ უფლებას, რომ ვიქტორის დასაცავად მივიღოთ სამართლებრივი ზომები და ნებისმიერი სასარგებლო ინიციატივა“, – დაწერა რობერტო კალანდამ.

მიუხედავად იმისა, რომ „ნაპოლის“ TikTok-ის ოფიციალურ გვერდზე ეს ვიდეო წაიშალა, სხვადასხვა მომხმარებელმა მისი გადმოწერა და შენახვა მოახერხა, შესაბამისად, ეს ვიდეო სოციალურ ქსელში გავრცელდა. ვიდეოში აღნიშნულია „ბოლონიასთან“ მატჩის ეპიზოდი, რომელშიც ოსიმენი ჯერ პენალტის დანიშვნას ითხოვს, შემდეგ კი, გოლს ვერ იტანს.

მარსელის „ოლიმპიკის“ მთავარ მწვრთნელად კი ალბათ ჯენარო გატუზო დაინიშნება.

ფრანგული მედიის მტკიცებით,  მხარეებს შორის შეთანხმება მიღწეულია და გატუზო შაბათს, „მონაკოს“ წინააღმდეგ გუნდს უკვე უხელმძღვანელებს. გატუზო მარსელინო ტორალს შეცვლის, რომელმაც კლუბი დატოვა, ბოლო ორ მატჩში კი „მარსელს“ ჟაკ აბარდონადო ხელმძღვანელობდა.

შეგახსენებთ, ჯენარო გატუზო ბოლოს „ვალენსიაში“ მუშაობდა, მანამდე კი „ნაპოლის“, „მილანის“, „პიზას“, „ოფის“, „პალერმოს“ და „სიონის“ მწვრთნელი იყო.

გუშინ, უკრაინის ფეხბურთის ასოციაცია „უეფას“ გადაწყვეტილებას გამოეხმაურა, რომლის თანახმად, რუსეთის 17-წლამდელთა ნაკრებები (ბიჭების და გოგონების), განსხვავებით უფროსებისგან, ორგანიზაციის ეგიდით გამართულ საერთაშორისო ტურნირებში დაშვებულები იქნებიან.

უეფამ რუსეთის 17-წლამდელთა გუნდები საერთაშორისო ასპარეზზე ნეიტრალური სტატუსით, ქვეყნის დროშის, ჰიმნისა და ეროვნული ფორმის გარეშე უკვე მიმდიდნარე სეზონში დაუშვა. მატჩები არ ჩატარდება რუსეთის ტერიტორიაზე. ამავდროულად, უეფას პრეზიდენტმა ალეკსანდერ ჩეფერინმა განაცხადა, რომ რუსულ ნაკრებებსა და კლუბებზე ბანი უკრაინაში ომის დასრულებამდე შენარჩუნებდა.

ამის მიუხედავად, უკრაინელები აცხადებენ, რომ არ გამოვლენ შეჯიბრებებში, სადაც რუსებით დაკომპლექტებული გუნდები იქნებიან დაშვებულნი.

“მსგავსი გადაწყვეტილებები, რომლებიც რუსეთის გუნდების შეჯიბრებებში თანდათანობით დაბრუნებას შეეხება და მიიღება იმ სამხედრო მოქმედებების ფონზე, რომელსაც რუსეთის ფედერაცია უკრაინის წინააღმდეგ ატარებს, უსაფუძვლო და ტოლერანტულია რუსული აგრესიული პოლიტიკის მამართ.

უკრაინის ფეხბურთის ასოციაცია გამოდის მოწოდებით, შენარჩუნდეს უეფასა და ფიფას უწინდელი გადაწყვეტილებები, ამ ორგანიზაციების ეგიდით გამართულ საერთაშორისო შეჯიბრებებში რუსული გუნდების არდაშვებასთან დაკავშირებით.

უკრაინის ფეხბურთის ასოციაცია ადასტურებს, რომ არ მიიღებს არცერთ შეჯიბრებაში მონაწილეობას, სადაც რუსეთის გუნდები იქნებიან დაშვებულნი და თხოვნით მიმართავს უეფას სხვა წევრ ასოციაციებსაც, ბოიკოტი გამოუცხადონ იმ მატჩებს, რომლებშიც რუსეთის დაშვებულ გუნდებთან შეხვედრა შეიძლება მოუხდეთ”, – ნათქვამია უკრაინელთა განცხადებაში.

უეფას გადაწყვეტილებაზე რეაგირება სწრაფად მოახდინა ინგლისის ფეხბურთის ასოციაციამაც, რომელიც ძველ პოზიციაზე რჩება და კვლავაც გააგრძელებს რუსეთის გუნდების მონაწილეობით მატჩების ბოიკოტირებას.