ლანჩხუთის საკრებულოს ოპოზიციურმა ფრაქციამ „ერთიანი ნაციონალური მოძრაობა“ პრესკონფერენცია გამართა, სადაც საუბრის თემა სახელმწიფო აუდიტის დასკვნის ის ნაწილი იყო, რომელიც 2017-2018 წლებში მუნიციპალიტეტის მასშტაბით გახორციელებულ ინფრასტრუქტურულ პროექტებს ეხებოდა.
მანამდე კი ფრაქციის წევრებმა საკრებულოს ბოლო სხდომაზე საკმაოდ ხმაურიანი განცხადებები გააკეთეს ამ კუთხით და კონკრეტული სამსახურების ხელმძღვანელთა პასუხისმგებლობის საკითხიც დასვეს. თუმცა, მათი ეს გამოსვლა ბრალდების ერთ-ერთმა ადრესატმა, მერიის ინფრასტრუქტურის სამსახურის უფროსმა ლევან ჩხაიძემ საქმეში ჩაუხედავი ადამიანების ნაამბობად და კამერების წინ კეკლუცობად შეაფასა.
„ნაციონალური მოძრაობის“ წევრები კი სახელმწიფო აუდიტის დასკვნას იშველიებენ და როგორც ფრაქციის ხელმძღვანელი ლელა ჩახვაძე ამბობს, რომ ამ დასკვნის მიხედვით ნათლად იკვეთება შესაბამისი სამსახურების ხელმძღვანელ პირთა პასუხისმგებლობის საკითხი.
„იმედია, რომ სახელმწიფო აუდიტის დასკვნაზე მაინც არ იტყვის ლევან ჩხაიძე და სხვები, საქმეში ჩაუხედავი ადამიანების ნაამბობია. ჰოდა, კეთილი ინებონ და თუ არ შეიძლება პასუხი მოეთხოვოს შესაბამისი სამსახურის უფროსებს, მაშინ მთელი პასუხისმგებლობა საკუთარ თავზე მერმა და საკრებულოს თავმჯდომარემ აიღოს“, _ დასძინა ლელა ჩახვაძემ.
სახელმწიფო აუდიტის დასკვნაში კი ვკითხულობთ, რომ ზემონახსენებ წლებში შესრულებული ინფრასტრუქტურული პროექტების ნაწილი დაზიანებულია, ხოლო მუნიციპალიტეტს არ შეუსწავლია პრობლემის გამომწვევი მიზეზები და პასუხისმგებელი პირების მიმართ არ გაუტარებია შესაბამისი ღონისძიებები.
კონკრეტულ მაგალითად სახელმწიფო აუდიტს ჩოჩხათი-გულიანი-სუფსის გზა მოჰყავს, რომელიც თავის დროზე ხელისუფლების მხრიდან „საუკუნის პროექტად“ მოინათლა.
„2015 წლის 22 ივლისს მუნიციპალიტეტმა ხელშეკრულება გაუფორმა შპს „სამკუთხედს“, ჩოჩხათის ადმინისტრაციულ ერთეულში, გულიანიდან სუფსის სარკინიგზო გადასასვლელამდე საავტომობილო გზის სარეაბილიტაციო სამუშაოების შესყიდვისთვის, სახელშეკრულებო ღირებულებით − 3.0 მლნ ლარი.
პროექტი გულისხმობდა ერთფენიანი ასფალტის მოწყობას, რომელიც უნდა დასრულებულიყო 2017 წლის 30 ნოემბერს. 2017 წლის 28 ნოემბერს, მიმწოდებელმა დაასრულა სამუშაოები. ექსპერტიზის დასკვნით და ინსპექტირების ჯგუფის მიერ დადასტურდა სამუშაოების ხარისხიანად შესრულება.
მუნიციპალიტეტმა ჩაიბარა შესრულებული სამუშაოები და მიმწოდებელს აუნაზღაურა 2,995.8 ათასი ლარი. 2019 წლის ოქტომბერში მუნიციპალიტეტის წარმომადგენლებთან ერთად, აუდიტის ჯგუფმა დაათვალიერა აღნიშნული პროექტი. გამოვლინდა, რომ ასფალტის საფარი რამდენიმე მონაკვეთზე მნიშვნელოვნადაა დაზიანებული“- ვკითხულობთ დასკვნაში.
სახელმწიფო აუდიტის დასკვნის მიხედვით, გარდა ზემონახსენები გზის მონაკვეთისა, დათვალიერების შედეგად გამოვლინდა, რომ დაზიანებულია 1,730.5 ათასი ლარის ღირებულების შესრულებული ინფრასტრუქტურული პროექტები.
კერძოდ: სხვადასხვა ადმინისტრაციულ ერთეულში მოწყობილი გზის საფარი, წყალსადენის სისტემა, ბეტონის საყრდენი კედელი, სანიაღვრე არხები, გაბიონი, სკვერში მოწყობილი ფილები, საჭიდაო დარბაზის კედლები და ჭერი. ასევე დაზიანებულია და არ ფუნქციონირებს მდინარე სუფსაზე მოტივტივე ნარჩენების დამჭერი მოწყობილობა.
„აღნიშნული სამუშაოები მუნიციპალიტეტის მიერ ჩაბარებულია სრულად. ამ სამუშაოების მოცულობები და ხარისხი დადასტურებულია შპს „რეალექსპერტის“, შპს „არდას“, ლევან სამხარაულის სახელობის სასამართლო ექსპერტიზის ეროვნული ბიუროს და მუნიციპალიტეტის ინსპექტირების ჯგუფის დასკვნებით. მიუხედავად იმისა, რომ შესრულებული სამუშაოების ხარისხი დადასტურებულია ექსპერტიზით, აუდიტის ჯგუფის დათვალიერებით გამოვლინდა, რომ ობიექტები დაზიანებულია და საჭიროებს დამატებით რეაბილიტაციას, რაც მიანიშნებს ხარისხის პრობლემაზე. დათვალიერების მომენტისათვის ინფრასტრუქტურულ პროექტებს გააჩნდათ მოქმედი საგარანტიო ვადა, რომლის ფარგლებში უნდა მომხდარიყო არსებული გამოსწორება“, _ წერია დასკვნაში.
ამავე დასკვნის მიხედვით ირკვევა, რომ ობიექტებზე არსებული დაზიანებების აღმოფხვრის მიზნით, 14 შემთხვევიდან 5 შემთხვევაში მუნიციპალიტეტმა მიმართა მიმწოდებლებს, თუმცა მათ დაზიანებები არ გამოუსწორებიათ, ხოლო დამატებითი ღონისძიებები, მერიას არ გაუტარებია.
ასევე, ირკვევა, რომ აუდიტის ჯგუფის მიერ საკითხის შესწავლის შემდგომ, მუნიციპალიტეტმა დამატებით ოთხ ობიექტზე მიმართა მიმწოდებლებს არსებულ ხარვეზებთან დაკავშირებით, ხოლო დარჩენილ ხუთ შემთხვევაში, მერიას არ განუხორციელებია სათანადო რეაგირება.
აღნიშნული ფაქტებიდან გამომდინარე სახელმწიფო აუდიტი დასკვნაშია წერია, რომ:- „ მუნიციპალიტეტის მიერ დანერგილი კონტროლის მექანიზმი ვერ უზრუნველყოფს ინფრასტრუქტურული პროექტების მდგომარეობის შესახებ მერიის დროულ ინფორმირებას. სამუშაოების მონიტორინგის, მიღება-ჩაბარების, მოვლა-პატრონობისა და საგარანტიო ვადის ეტაპზე არსებული მართვის სისუსტეების გამო, დაზიანებულია ინფრასტრუქტურული პროექტები და საბიუჯეტო სახსრები არაეფექტიანად იხარჯება. მუნიციპალიტეტი ვალდებული იყო დაედგინა დაზიანების გამომწვევი მიზეზები, საგარანტიო პერიოდში პროექტების კონტროლზე პასუხისმგებელი პირები და ზარალის ანაზღაურების მიზნით, მათ მიმართ გაეტარებინა შესაბამისი ღონისძიებები, რაც არ განუხორციელებია “.
სახელმწიფო აუდიტი ადგილობრივ ხელისუფლებას რეკომენდაციას აძლევს, რომ მუნიციპალიტეტის აღმასრულებელმა ორგანომ შეიმუშაოს და დანერგოს სამშენებლო სამუშაოების მიღებისა და ჩაბარების წესი, სადაც დეტალურად იქნება გაწერილი მოქმედი სტანდარტების დაცვით სამუშაოების შესრულებისათვის საჭირო კონტროლის მექანიზმები: „მუნიციპალიტეტი ვალდებულია შეისწავლოს ინფრასტრუქტურული პროექტების მდგომარეობა. შესრულებულ სამუშაოებზე ხარვეზების გამოვლენის შემთხვევაში, დაადგინოს დაზიანებების გამომწვევი მიზეზები, გამოავლინოს საგარანტიო პერიოდში პროექტების კონტროლზე პასუხისმგებელი პირები და მიყენებული ზიანის ანაზღაურების მოთხოვნით, გაატაროს შესაბამისი ღონისძიებები“.
პრესკონფერენციაზე ლელა ჩახვაძის თანაფრაქციელმა სოსო ჩხაიძემ აუდიტის დასკვნის იმ ნაწილზეც გაამახვილა ყურადღება, სადაც 2017-2018 წლებში სტიქიის შედეგების სალიკვიდაციო ღონისძიებები არაეფექტურ წარმართვაზეა საუბარი.
როგორც აუდიტის დასკვნაშია ნათქვამი, მუნიციპალიტეტმა მოსახლეობას გადასცა სხვადასხვა გადასახური მასალა, თუმცა, მასალების უმეტესი ნაწილი გამოუყენებელია და სტიქიის შედეგები არ არის ლიკვიდირებული.
„2017-2018 წლებში, სტიქიის შედეგების სალიკვიდაციო ღონისძიებებისთვის მუნიციპალიტეტმა მიმწოდებლებთან გააფორმა 21 ხელშეკრულება − სახურავის მასალის მიწოდებაზე. მოსახლეობას გადაეცა თუნუქის სახურავის ფურცლები, ხის ძელები, ცემენტი და სამშენებლო ბლოკები, რაზეც ჯამში დაიხარჯა 1,455.3 ათასი ლარი. მიღება-ჩაბარებების თანახმად, მოსახლეობას გადაეცა 803.7 ათასი ლარის ღირებულების 64,358 კვმ თუნუქის ფურცელი, 647.0 ათასი ლარის 1,072 მ 3 ხის მასალა, 1.5 ათასი ლარის 6,500 კგ ცემენტი და 3.1 ათასი ლარის 1,800 ცალი სამშენებლო ბლოკი“, _ წერია დასკვნაში და იქვე მითითებულია, რომ მუნიციპალიტეტის მიერ მოსახლეობაზე სამშენებლო მასალების გადაცემა წარმოშობს რისკს იმისა, რომ სარეაბილიტაციო სამუშაოებისთვის საჭირო ფინანსური რესურსის არქონის პირობებში, მოსახლეობა ვერ უზრუნველყოფდა დაზიანებული სახურავების აღდგენას. შერჩევითი დათვალიერების შედეგად აუდიტის ჯგუფმა გაარკვია, რომ მიუხედავად იმისა, რომ სტიქიის შემდეგ გასული იყო მინიმუმ 10 თვე, უმეტეს შემთხვევაში, გადაცემული სამშენებლო მასალა, მოსახლეობას დასაწყობებული ჰქონდა ეზოში. 408 მოსახლიდან 289-ს არ ქონდა გამოყენებული და დასაწყობებული ქონდა 40,054 კვმ თუნუქის ფურცელი, ხოლო 14 მოსახლეს 2,115 კვმ თუნუქის ფურცელი არც გამოუყენებელი და არც დასაწყობებული აღმოაჩნდა. ჯამში კი გამოუყენებელია 526.6 ათასი ლარის ღირებულების თუნუქის ფურცელი. სახელმწიფო აუდიტი გამოთქვამს ვარაუდს, რომ ეს მასალები გაყიდული ან გასხვისებულია.
რაც შეეხება მოსახლეობისთვის გადაცემულ ხის მასალებს, როგორც აუდიტის დასკვნიდან ხდება ცნობილი, 235 მოსახლიდან 169 პირს 603 კუბ.მ დასაწყობებული აღმოაჩნდა, ხოლო 6 პირს 20.9 კუბმ არც გამოუყენებია და არც დასაწყობებული აქვს. სულ კი გამოუყენებელია 376.7 ათასი ლარის ხის მასალა.
აქვე ვკითხულობთ, რომ მუნიციპალიტეტის მიერ 2017-2018 წლებში, სტიქიის შედეგების სალიკვიდაციო ღონისძიებების ფარგლებში, მოსახლეობისთვის გადაცემული 1,453.3 ათასი ლარის ღირებულების სხვადასხვა სამშენებლო მასალიდან 904.7 ათასი ლარის ღირებულების (62%) მასალა არ არის გამოყენებული მიზნობრივად, შედეგად ვერ ისარგებლა მოსახლეობამ და არც სტიქიის შედეგები იქნა ლიკვიდირებული.
„მუნიციპალიტეტში არსებულმა სუსტმა კონტროლის მექანიზმებმა ვერ უზრუნველყო სტიქიის შედეგად მიყენებული ზარალის აღმოფხვრა და მიზნის მიღწევა“, _ ასკვნის სახელმწიფო აუდიტი სახელმწიფო აუდიტი.
