ხვიჩა კვარაცხელიას „ნაპოლიმ“ ჩემპიონთა ლიგის განმეორებით მერვედფინალურ შეხვედრაში გერმანული „აინტრახტი“ დამაჯერებლად დაამარცხა – 3:0. ორი მატჩის ჯამში იტალიურმა გუნდმა – 5:0 იმარჯვა და პირველად ისტორიაში ჩემპიონთა ლიგის მეოთხედფინალში იასპარეზებს.
ხვიჩა კვარაცხელიამ 74 წუთი ითამაშა, მას არც გოლი გაუტანია და არც საგოლე პასი ჰქონია, მაგრამ კარგად იასპარეზა. რამდენჯერმე ახლოს იყო გოლთან, ხოლო მეორე საგოლე შეტევა სწორედ მან დაიწყო ეფექტური პასით, მერე მატეო პოლიტანომ და ჯოვანი დი ლორენცომ გააგრძელეს, ვიქტორ ოსიმენმა კი ცარიელ კარში გაიტანა.
ქართველმა მოთამაშემ მატჩის შემდეგ შემდეგი კომენტარი გააკეთა:
„ძალიან დიდი მადლობა ქართველებს და „ნაპოლის“ ყველა გულშემატკივარს, რომლებიც სტადიონზეც და ტელევიზორიდანაც გვგულშემატკივრობენ. ყველაფერს გავაკეთებთ იმისთვის, რომ სეზონი წარმატებულად ჩავამთავროთ და ჩვენი გულშემატკივრები გავახაროთ.
ედენ აზარი ძალიან დიდი ფეხბურთელია და მე ალბათ, მის დონემდე ბევრი მიკლია, მაგრამ ყველაფერს გავაკეთებ, რომ წარმატებული ფეხბურთელი ვიყო და ჩემი გულშემატკივრები გავახარო“.
უფრო სიტყვაუხვი გახლდათ „ნაპოლის“ მთავარი მწვრთნელი ლუჩანო სპალეტი:
„შესანიშნავი და ისტორიული შედეგია კლუბისთვის და ჩვენი გულშემატკივრებისთვის. ყველაფერი კარგად გავაკეთეთ, რაც მოვამზადეთ, არაფერი დავთმეთ. ადვილი არ იყო „აინტრახტთან“ თამაში, რომელიც მოედნის შუაგულში სიმჭიდროვეს ცდილობდა. ისინი ცდილობდნენ მაღალი პრესინგი ეთამაშეთ. ოსიმენის გოლის შემდეგ უკეთ ვითამაშეთ, თამაშს ბოლომდე ვაკონტროლებდით. მეორე ტაიმში კვარამ და პოლიტანომ კარგად გააცნობიერეს, რომ უფრო მეტად ცენტრში შეწევა იყო საჭირო სივრცეების გასახსნელად.
მეოთხედფინალში გასვლა პირველად მოვახერხეთ, რაც ნიშნავს, რომ ეს შედეგი დამსახურებული და დიდებულია. ახლა ვტკბებით ამ მიღწევით, მაგრამ ამავე მენტალიტეტით უნდა გავაგრძელოთ. გვარდიოლამ თქვა, რომ ევროპის უძლიერესი გუნდი გვყავს? არ ვარ ამ სიტყვებით ამაყი და ნამდვილად არ მომწონს სხვებზე წნეხის მოხდენის ეს ხრიკი. ყველამ იცის – ასეთი კომპლიმენტები გამოიყენება იმისთვის, რომ კონკურენტი ჰაერში ასწიო და შემდეგ მის ძირს დაცემას დაელოდო. „ნაპოლი“ წინ ვერ დაუდგება ისეთ გუნდს, როგორიც „მანჩესტერ სიტია“, რომელიც შემადგენლობისთვის თუ 900 მილიონ ევროს ხარჯავს, ჩვენ მხოლოდ 9 მილიონს ვხარჯავთ. ასეთი კომპლიმენტები ადრეც მომისმენია და გულწრფელად ვამბობ, რომ არ მომწონს.
მეოთხედფინალის მეტოქე? საერთოდ არ მყავს სასურველი მეტოქე არჩეული, წილისყრის შედეგს მოვერგებით. პირიქით – მინდა, ჩვენს ქომაგებს მოვუწოდო, რომ გავიდნენ ქუჩაში, იმღერონ და სიხარულით იზეიმონ ეს შედეგი, პროვოკაციების გარეშე“.
ჩემპიონთა ლიგის ყველა მეოთხედფინალისტი უკვე ცნობილია და ახლა ყველა წილისყრის მოლოდინშია, რომელიც დღეს, თბილისის დროით 15:00 საათზე გაიმართება.
რვა მეოთხედფინალისტიდან 3 იტალიური კლუბია – „ნაპოლი“, „მილანი“ და „ინტერი“. ორი ინგლისური გუნდია: „მანჩესტერ სიტი“ და „ჩელსი“. გერმანია („ბაიერნი“), პორტუგალია („ბენფიკა“) და ესპანეთი („რეალი“) თითო გუნდით შემორჩნენ მთავარ საკლუბო ტურნირს.
საკმაოდ მაღალი შანსია, მეოთხედფინალში იტალიური დუელი შედგეს. თუმცა, შეიძლება ისე მოხდეს, რომ ერთი ქვეყნის გუნდები არ დაწყვილდნენ. ჩვენთვის ყველაზე საინტერესოა, ვინ ერგება მეტოქედ ხვიჩა კვარაცხელიას „ნაპოლის“, რომელიც დიდებულ ფორმაშია. სხვათა შორის, ამავე წილისყრაზე დაწყვილდებიან გუნდები ნახევარფინალში. ცნობილი იქნება, რომ კონკრეტულ მეოთხედფინალურ წყვილში გამარჯვებული კონკრეტულ წყვილში გამარჯვებულს შეხვდება.
ჩემპიონთა ლიგის მეოთხედფინალური ეტაპის მატჩები 11-12 და 18-19 აპრილს გაიმართება.
აშშ-ის ნაციონალურ საკალათბურთო ასოციაციაში მორიგი სათამაშო დღე ჩატარდა და „სან ანტონიო სპურსი“ „დალას მავერიქსს“ სტუმრად დაუპირისპირდა.
მატჩის ძირითადი დრო ფრედ – 117:117 დაფიქსირდა, თუმცა დალასელებმა ოვერტაიმში 20:11 მოიგეს და საბოლოოდ შეხვედრა 137:128 დასრულდა.
„სან ანტონიელთა“ სასტარტო ხუთეულში პირველად გამოჩნდა სანდრო მამუკელაშვილი. ქართველი კალათბურთელმა მორიგი შედეგიანი მატჩი ჩაატარა და ახალ გუნდში სათამაშო დრო შედარებით მნიშვნელოვნად გაეზარდა.
ლეგენდარული მწვრთნელი გრეგ პოპოვიჩი საქართველოს ნაკრების წევრს ენდობა და ეს ამ შეხვედრაშიც აისახა. სანდრომ „დალას მავერიკსთან“ მატჩში მოედანზე 33:15 წუთი გაატარა, რა დროშიც კარგი სტატისტიკა ჰქონდა. 23 წლის კალათბურთელმა საკუთარ გუნდს 10 ქულა, 7 მოხსნა და 2 შედეგიანი გადაცემა შესძინა.
ფიფას პრეზიდენტად კი მესამე ვადით ჯანი ინფანტინო აირჩიეს. იტალიური ფესვების მქონე შვეიცარიელი, რუანდას დედაქალაქ კიგალიში გამართულ ფიფას 73-ე კონგრესზე პრეზიდენტად 2027 წლის ბოლომდე აირჩიეს.
აღსანიშნავია, რომ ინფანტინო საპრეზიდენტო არჩევნებში ერთადერთი კანდიდატი იყო, შესაბამისად, მისი არჩევა ლოგიკურიც გახლდათ.
ჯანი ინფანტინო ფიფას პრეზიდენტი 2016 წელს გახდა, ხოლო 2019 წელს ამ პოსტზე მეორე ვადით დაამტკიცეს. მან თავის დროზე ზეპ ბლატერი შეცვალა, რომელსაც თანამდებობის დატოვება კორუფციული საქმეების გამო მოუწია. რაც შეეხება ინფანტინოს, ის ფიფას პრეზიდენტობამდე უეფაში წლების განმავლობაში მუშაობდა.
ავტორი
