ლანჩხუთის საკრებულოს ბოლო სხდომაზე, ძირითადი განსახილველი საკითხების ამოწურვის შემდეგ, ქალაქის ერთ-ერთმა მაჟორიტარმა კახა კვიტაიშვილმა თავი ვალდებულად ჩათვალა და განმარტებები გააკეთა ოპოზიციის მხრიდან გაჟღერებულ იმ ბრალდებებთან დაკავშირებით, რომლებიც ლანჩხუთში სტიქიის თანხებიდან სახლების გადახურვის პროგრამას ეხებოდა. მმართველმა გუნდმა ოპოზიცია მსგავსი თემების წინ წამოწევით უპასუხისმგებლო ქმედებაში დაადანაშაულა.
საქმე ისაა, რომ ოპოზიცია ლანჩხუთში ადგილობრივ ხელისუფლებას სტიქიის თანხების საარჩევნო კამპანიისთვის გამოყენებაში ადანაშაულებს. კერძოდ, “ერთიან ნაციონალურ მოძრაობაში” მიაჩნიათ, რომ ხელისუფლება სტიქიით დაზარალებულთა პროგრამით იმ ადამიანებსა თუ ოჯახებს ეხმარება, ვინც არჩევნებზე “ქართულ ოცნებას” უჭერს მხარს. მათ კი, ვინც ოპოზიციის მხარდამჭერებად მოიაზრებიან, მერია პროგრამით სარგებლობაზე უარს ეუბნება. უფრო კონკრეტულად კი, საუბარია ავარიული სახლების გადახურვის პროგრამაზე, რომელიც ბიუჯეტიდან ფინანსდება.
როგორც ოპოზიციაში ამბობენ, მერიიდან უარით გამოსტუმრებულ ადამიანთა უმრავლესობა დარწმუნებულია, რომ მათ პროგრამაში ჩართვაზე მხოლოდ იმიტომ უთხრეს უარი, რომ ოპოზიციის მხარდამჭერები არიან: “ლანჩხუთის მუნიციპალიტეტის მერია ადამიანებს პოლიტიკური ნიშნით ახარისხებს. ისინი, ვისზეც აქვთ ინფორმაცია, რომ “ქართული ოცნების” მხარდამჭერი არაა, შეგნებულად არ უხურავენ სახლს. საჩხერის მოდელის გახორციელება “წარმატებით” დაიწყო ლანჩხუთის მუნიციპალიტეტის მერიამ. სამ სახლს ხურავენ ერთდროულად, მაგრამ ერთს ტოვებენ მეზობლად. რომელსაც წელიწადზე მეტია მიმართული აქვს მერიისთვის ამ პრობლემის თაობაზე, მაგრამ ზუსტად იცის ლანჩხუთის მერიამ, რომ სულ რომ ახალი სახლი აუშენონ, მაინც არაა მათთვის ხმის მიმცემი. კლასიკური მაგალითი ამომრჩეველთა მოსყიდვის და პოლიტიკური ნიშნით შერჩევითობის.
თანხა, რომელიც ამ პროგრამის გასახორციელებლად იხარჯება, არც ივანიშვილის და არც სარიშვილის ფული არაა. ეს არის ბიუჯეტის, ქართველი ხალხის ფული, რომელსაც პოლიტიკური ნიშნით ანაწილებენ”, _ ამბობს “ნაციონალური მოძრაობის ადგილობრივი ლიდერი კახა ასკურავა, რომელიც ფაქტის ამსახველ ვიდეოსაც აქვეყნებს საკუთარ ფეისბუქგვერდზე.
ლანჩხუთში, ხელისუფლების მიერ სახლების პოლიტიკური ნიშნით გადახურვის შესახებ საუბრობს ერთ-ერთი ბენეფიციარი მაია ფილიაც _ როგორც ის ამბობს, მას პროგრამით სარგებლობაზე მხოლოდ იმიტომ ეუბნებიან უარს, რომ “ქართული ოცნების” მხარდამჭერი არაა: “ზუსტად მაგი მჭირს მეც, ყველას დაურიგეს და მე რომ მათი მიმდევარი არ ვარ და არც ვიქნები, დამტოვეს. მირჩევნია წყალი ჩამომივიდეს, ვიდრე ამათი “ჩმორი” ვიყო. ეს არასოდეს მოხდება!” _ ასეთია ფილიას პოზიცია.
სწორედ სახურავების თემამ გამოიწვია კახა კვიტაიშვილისა და მისი თანაგუნდელების აღშფოთება:
“კარგი იქნებოდა ამ სხდომას კახა ასკურავა ან მისი რომელიმე თანაპარტიელი ესწრებოდეს. მათ მიერ გავრცელდა ინფორმაცია, რომ თითქოს ჩვენ პარტიული ნიშნით ვეხმარებით ადამიანებს. სრული პასუხისმგებლობით ვაცხადებ, რომ მსგავსი არაფერი ხდება და მერია, დახმარების განაწილებისას, ამ კუთხით არ აკეთებს აქცენტს”, _ თქვა კახა კვიტაიშვილმა, რომლის მიერ დაფიქსირებულ ამ პოზიციას ადგილიდან სხვა კოლეგებიც გამოეხმაურნენ.
როგორც მუნიციპალიტეტის მერმა ალექსანდრე სარიშვილმა აღნიშნა, მისი მისამართითაც არაერთხელ ყოფილა მსგავსი ბრალდებები: “მსგავსი ბრალდებები არაერთხელ ყოფილა ჩემი მისამართითაც, მაგრამ არასდროს ვაქცევ ყურადღებას. ჩვენ უნდა გავაკეთოთ საქმე და ნუ მივაქცევთ ასეთ განცხადებებს ყურადღებას. ჩემთვის ყველა მოქალაქე არის თანაბარი, მიუხედავად იმისა, ვის აძლევს ხმას”.
