16-17 აგვისტოს, ბახმაროში, უკვე მეორედ გაიმართა ბეგი მამალაძის ხსოვნისადმი მიძღვნილი ჩემპიონატი ფეხბურთში გარდამავალ თასზე 8-12 წლის ასაკის მოზარდებში.
ჩემპიონატში შვიდმა გუნდმა მიიღო მონაწილეობა. ესენია: “ლომები”, “მხედრები”, “ლეგენდები”, “კოროშინაძეები”, “ინტერი”, “მერცხალი” და “ბათუმი”. მათში გაერთიანებული იყვნენ ოზურგეთის, თბილისის, ბათუმის, ქობულეთის და შუახევის მუნიციპალიტეტის 50-ზე მეტი დამსვენებელი მოზარდი.
მძიმე ზამთრის შემდეგ სტადიონის არასახარბიელო მდგომარეობის მიუხედავად ბავშვებმა გამოავლინეს შესანიშნავი ფიზიკური მომზადება და სპორტული ჟინი, ზოგმა კი საფეხბურთო ნათლობა ბახმაროში მიიღო.
პირველი ადგილი ერგო “ინტერს”, მეორე – “ლომებს”, მესამე ადგილზე “მერცხალი” გავიდა, ხოლო მეოთხე ადგილზე ყველაზე პატარა ფეხბურთელების გუნდი “კოროშინაძეები” გავიდა.
გამარჯვებულებს თასები და მედლები გადასცა ჩოხატაურის სპორტისა და სპორტულ ღონისძიებათა ორგანიზების ცენტრის დირექტორმა ზურაბ ჯინჭარაძემ, ხოლო ჩემპიონატის ყველა მონაწილეს ბეგის ფონდის სახელით გადაეცათ სამახსოვრო სიგელები, სპორტული სუვენირები და ტკბილეული. სპეციალური პრიზი, საქართველოს ნაკრების წევრის – ლუკა ლოჩოშვილის მიერ გამოგზავნილი მაისური, ყველაზე ორიგინალურ და გამორჩეულ ფეხბურთელს – ავთო მუჯირს (გუნდი “მერცხალი”) ბეგის დედამ, ქალბატონმა მარიკა ზედელაშვილმა გადასცა.
ცნობისთვის, ბეგი ხსოვნისადმი მიძღვნილი ჩემპიონატი ბეგი მამალაძის სახელობის ფონდის ინიციატივით და ჩოხატაურის მერიის მხარდაჭერით ჩატარდა.
