ა(ა)იპ საფეხბურთო კლუბი ლანჩხუთი „გურია“, დიდი ალბათობით, კერძო საკუთრებაში გადავა და სამომავლოდ შპს-ს სტატუსით გააგრძელებს ეროვნულ ჩემპიონატში ასპარეზობას.
„შპს საფეხბურთო კლუბ ლანჩხუთის „გურიას“, როგორც კერძო კომპანიას, გააჩნია დაინტერესება, საკუთარი წვლილი შეიტანოს ფეხბურთის განვითარების საქმეში და გამოთქვამს სურვილს, ლანჩხუთის მუნიციპალიტეტის დაფუძნებული ა(ა) იპ-ის ნაცვლად, იასპარეზოს, როგორც შპს საფეხბურთო კლუბმა ლანჩხუთის „გურიამ““, _ ნათქვამია წერილში, რომელსაც ხელს შპს საფეხბურთო კლუბ ლანჩხუთის „გურიას“ გენერალური დირექტორის სტატუსით თემურ მიქაძე აწერს და მუნიციპალიტეტის ხელმძღვანელობასა და კლუბის აღმასრულებელ დირექტორს საკითხის ოპერატიული გადაწყვეტისა და ფეხბურთის ფედერაციასთან საჭირო შუამდგომლობის თხოვნით მიმართავს.
თემურ მიქაძე წერილში ამბობს, რომ კომპანიის ფინანსების ხარჯვა ორიენტირებული იქნება ლანჩხუთში ფეხბურთის წინსვლასა და შედეგების გაუმჯობესებაზე, ფეხბურთით ახალგაზრდობის დაინტერესებასა და მის პოპულარიზაციაზე.
საჯარო რეესტრიდან ამონაწერის მიხედვით, შპს საფეხბურთო კლუბ ლანჩხუთის „გურიას“ წილის 50%-ს წარმოშობით ლანჩხუთელი ბიზნესმენი ქეთევან ცინცაბაძე ფლობს. მისი თანამესაკუთრე წარსულში ცნობილი ფეხბურთელი, მერაბ ჟორდანიაა, რომლის კლუბში მოსვლა, სპონსორის ამპლუაში, ჯერ კიდევ ერთი წლის წინ დაანონსდა.
