ლანჩხუთის შემოსასვლელში, სოფელ გვიმბალაურის მხრიდან, სადაც ახალი ტროტუარის მოწყობა უნდა გახორციელდეს, როგორც გაირკვა, იქ არსებული მრავალწლიანი ნარგავების მოჭრა იგეგმება.
როგორც მერიის პრესასთან ურთიერთობის განყოფილების ხელმძღვანელის, მაკა სულაბერიძის კომენტარიდან ირკვევა, უწყებაში არაერთხელ შევიდა განცხადება ადგილობრივი მოსახლეობის მხრიდან, სადაც ისინი მათ არსებული ჭადრების ხეივანის მოჭრას ითხოვენ.
„მერიაში არაერთი წერილია შემოსული, სადაც ჭადრების მოჭრას ითხოვს მოსახლეობა. ფესვებმა, ლამის, სახლები დააზიანა და სამწუხაროდ, არაერთ ოჯახს შეუქმნა პრობლემა. ვფიქრობ, ახალი პროექტის შემთხვევაში მათი პრობლემებიც მოგვარდება და ქალაქიც გალამაზდება“, _ განმარტაბს მაკა სულაბერიძე ლანჩხუთელთა იმ ნაწილის საყურადღებოდ, ვინც ჭადრების მოჭრას აპროტესტებს.
სულაბერიძისვე განმარტებით, ჟორდანიას ქუჩის ამ მონაკვეთში მერია ახალი ნარგავების დარგვას გეგმავს: „ჭადრების ნაცვლად ძალიან ლამაზი ხეები დაირგვება, რომლებიც დაამშვენებენ ქალაქს, გაკეთდება ტროტუარი და დამონტაჟდება განათების ახალი სისტემა. რა თქმა უნდა, ახალი ნერგები დაირგვება და გაზონებიც გაკეთდება“.
ერთ-ერთი, ვინც ლანჩხუთის ცენტრალურ ქუჩაზე ჭადრების მოჭრას აპროტესტებს საკრებულოს წევრი ამირან გიგინეიშვილია.
„მე რომ მოვჭრა ერთი ჭადარი სადმე, რაც მომივა, ხომ იცით? ჰოდა, ბევრი ჭადრის მოჭრა არაა დანაშაული და სტატისტიკაა? აუცილებლად მოვიკვლევ, რომელი მოსახლეობის მოთხოვნით ნადგურდება ჩვენი წინაპრების ნაწვალები. ყველა სახის წერილობით ინფორმაციას გამოვითხოვ სამსახურებრივი ხაზით და შესაბამისად, ჩამოვყალიბდები კითხვებზე ამ დოკუმენტების ანალიზის საფუძველზე. გამოთხოვა მოხდება ხვალვე“, _ ამბობს ამირან გიგინეიშვილი.
გიგინეიშვილის მსგავსად, ჟორდანიას ქუჩაზე ჭადრების მოჭრა მიუღებლად მიაჩნიათ სხვა რიგით ლანჩხუთელებსაც და ადგილობრივ ხელისუფლებას დაფიქრებისკენ მოუწოდებენ _ „რას დაემსგავსა თბილისის, ნინოშვილის და ჟორდანიას ქუჩები, კი ვხედავთ… ულამაზესი ხეივნები იყო და დღეს გადატიალებულია ეს ქუჩები… ამ ჭადრების გაზრდას, წლები სჭირდება, მოჭრას _ წამები! დაფიქრდით!!! .ეს არის დანაშაული!
სად არის დაზიანებული, რომელი ხეა უკეთესი, რა უნდა დარგოთ უკეთესი თუ შეშის მარაგი უნდა გაიკეთოთ?! წაიღებს ქარი და მტვერი მაქაურობას და იქნებით მტვერში. რომელ ქვეყანაში ნახეთ ტროტუარის ფილების დაგებისთვის მთელი ხეივანი გაეჩეხოთ. იქნებ ინტერნეტში მაინც ჩაიხედოთ, როგორ აგებენ. ერთი ხის გულისთვის ცენტრალური მაგისტრალი გადაწიეს და აქ მთელ ხეივანს, საუკუნოვან ხეებს უპირებენ აჩეხვას, ტროტუარი რომ გააკეთონ. ასე უფრო ეადვილებათ და იმიტომ.
გვანახონ ერთი, რომელი სახლია ჭადრის ფესვისგან დაზიანებული _ ჭადარს ყველაზე სუსტი ფესვი აქვს. ახლა, ალბათ, „დაზიანებული“ სახლების სანაცვლოდ კომპენსაციასაც მოითხოვენ „დაზარალებულები“, _ ამბობენ უკმაყოფილო ლანჩხუთელები.
მოსახლეობის მხრიდან გამოთქმულ უკმაყოფილებას სოციალურ ქსელში ქალაქის ყოფილი მერი სოსო ბოლქვაძეც ეხმიანება, რომელიც ჟორდანიას ქუჩის იმ მონაკვეთზე ცხოვრობს, სადაც ჭადრები უნდა მოიჭრას.
„დიახ, მომხრე ვარ, თუ ახალი ტროტუარები კეთდება, დაირგოს დეკორატიული ნარგავები, თუნდაც ნეკერჩხალი. ვერ გავიგე, მე ვცხოვრობ იქ და სხვა ქუჩის მაცხოვრებელი მიგეგმავს ჩემი სახლის წინ რა უფრო მისაღებია? რა უბედურებაა!!!“ _ წერს მოლქვაძე.
ზემონახსენებ ფაქტთან დაკავშირებით, ლანჩხუთელი ახალგაზრდები დღეს მუნიციპალიტეტის მერთან შეხვედრას გეგმავენ.
