„ჩვენი საქართველო – სოლიდარობის ალიანსის“ ერთ-ერთმა ლიდერმა, მარიამ ჯაშმა გასულ კვირას ლანჩხუთში, გურიაში მაჟორიტარი დეპუტატობის კანდიდატ ნინო შეწირული-გობრონიძესთან ერთად სტუმრობისას გაჟღერდა, რომ ალიანსის რიგებს ლანჩხუთიდან „ქართული ოცნების“ ყოფილი აქტიური წევრები ნიკა ვადაჭკორია, ჯანო ქინქლაძე და ავთანდილ სარჯველაძე შეუერთდნენ. საგულისხმოა, რომ სარჯველაძე ერთ დროს „ოცნების“ შტაბის იურიდიულ სამსახურსაც ხელმძღვანელობდა. შტაბშივე იყო დასაქმებული ვადაჭკორიაც.
„სოლიდარობის ალიანსში“ გაკეთებულ ამ განცხადებებს მედიასაშუალებების მეშვეობით ლანჩხუთის მერი და „ოცნების“ ადგილობრივი ორგანიზაციის ხელმძღვანელი ალექსანდრე სარიშვილი გამოეხმაურა და ალიანსის მხრიდან გავრცელებული ინფორმაცია არ დაადასტურა, მეტიც მტკნარი სიცრუე უწოდა.
„სოლიდარობის ალიანსის განცხადება, თითქოს, ჩვენი პარტიის რიგებიდან მათ გუნდში ვინმე გადავიდა, მტკნარი სიცრუე და სრული აბსურდია. პირები, ვისზეც არის საუბარი, სხვადასხვა პარტიას წარმოადგენდნენ და ეს ახალი არ არის. შეგიძლიათ, გადაამოწმოთ, რომ ეს ადამიანები სხვადასხვა პარტიის წევრები იყვნენ წლების განმავლობაში.
ასეთი განცხადებები სხვა პარტიების მხრიდან წინა წლებშიც გვესმოდა. მაგალითად, „ევროპული საქართველო” მუდმივად ამტკიცებდა, რომ „ქართული ოცნებიდან” რიგი პიროვნებები მათთან გადადიოდნენ, შემდეგ კი აღმოჩნდებოდა, რომ ეს პირები „პატრიოტთა ალიანსიდან” იყრიდნენ კენჭს და მათ ბანერებს ქუჩაში ვხედავდით. მინდა, მოვუწოდო „სოლიდარობის ალიანსს”, ნუ დაემსგავსებიან „ნაცმოძრაობას” და საარჩევნო კამპანიას ტყუილზე ნუ ააგებენ”, – ასეთი განცხადება გააკეთა ალექსანდრე სარიშვილმა „კვირასთან“ მიცემულ კომენტარში.
„გურია ნიუსთან“ გაკეთებულ კომენტარში ლანჩხუთის „ოცნების“ ლიდერს მეხსიერებას უწუნებს „სოლიდარობის ალიანსის“ გურიაში მაჟორიტარობის კანდიდატი ნინო შეწირული-გობრონიძე. იგი სარიშვილს ურჩევს სიტყვებით თამაშს თავი დაანებოს და პარტიულ არქივს გადახედოს.
„ნიკა ვადაჭკორია არის „ქართული ოცნების“ დამფუძნებელი, ასევე ბატონი ჯონი აქტიური წევრი 2012 წლიდან, ვაზუსტებ რომ ბატონი ავთანდილ სარჯველაძე „ქართული ოცნების“ იურისტი იყო.
სიტყვებით ნუ გვეთამაშება ბატონი ალეკო და კარგად გადახედოს წინ წლის თუნდაც ფოტოებს და კარგად დაინახავს ამ ადამიანებს ქალბატონი ნინო წილოსანის საარჩევნო შტაბში. არ მგონია ბატონ ალეკოს ასეთი მოკლე მახსოვრობა ქონდეს და ეს არ ახსოვდეს. ის აუცილებლად უნდა ახსოვდეს, დამპალი ცხენის ხორცის ჭამისაგან რომ ვიხსენი პირადად მე ლანჩხუთის საბავშვო ბაღის აღსაზრდელები, ეს სულ ახლო წარსულია.
მრცხვენია, ახალგაზრდა კაცი ამას რომ კადრულობს და ტყუილს უწოდებს ამ ადამიანების ღვაწლს „ქართულ ოცნებაში“.
აი, კიდევ ერთი ხელწერა მაგათი რომ ყველას ყველაფერი დაავიწყდათ ხალხი დაავიწყდათ და ამ შედეგს დაინახავენ 31 ოქტომბერს.
გადაუმოწმებელ და მცდარ ინფორმაციას არასოდეს გავახმოვანებთ და არც ვთვლი ბატონ ალეკოს ამ კომენტარს პასუხის ღირსად“-ამბობს დეპუტატობის კანდიდატი გურიაში „სოლიდარობის ალიანსიდან“.
ნიკა ვადაჭკორია კი, რომელიც ერთ-ერთია, როგორც მარიამ ჯაშმა აღნიშნა ჟურნალისტებთან შეხვედრისას, ვინც „ოცნების“ რიგები დატოვა გურიაში, ალექსანდრე სარიშვილს იქეთ ურჩევს თავად გაერკვეს რომელ პარტიას წარმოადგენს.
„ამოვიდა ყელში ეს “ბალოდომანია”, ამიტომ ვებრძოდით სააკაშვილს და ახლა არ ვაპირებთ ბიძინა ივანიშვილს “ვუპრავოთ” რაღაც-რაღაცები. ალექსანდრე სარიშვილს კი გადაეცით, რომ თავად გაერკვეს რომელ პარტიას წარმოადგენს, ისეა ათქვეფილი სხვადასხვა პარტიებთან“- ამბობს ნიკა ვადაჭკორია.
რაც შეეხება ავთანდილ სარჯველაძის პოზიციას, მისი თქმით, იგი არასდროს არ ყოფილა რომელიმე პარტიის წევრი, მათ შორის „ქართული ოცნების“ და ჯაშის მხრიდან გაკეთებულ განცხადებას მცირედ უზუსტობას უწოდებს.
„მცირედი უზუსტობა მოხდა, მინდა ვთქვა, რომ მე პირადად არასდროს არ ვყოფილვარ რომელიმე პარტიის წევრი, მათ შორის არც კომუნისტური და არც „ქართული ოცნების“. თუმცა ვიტყვი, რომ 2012 წლის გაზაფხულიდან „ოცნების“ შტაბში ვმუშაობდი იურისტად. რაც შეეხება ნიკა ვადაჭკორიასა და ჯანო ქინქლაძეს, ისინი პარტიის დამფუძნებლები არიან“, – ამბობს ავთანდილ სარჯველაძე.
„გურია ნიუსი“ ალექსანდრე სარიშვილის მხრიდან გაკეთებულ კომენტართან დაკავშირებით ჯანო ქინქლაძესაც გაესაუბრა, რომელიც ამბობს, რომ ალექსანდრე სარიშვილის მხრიდან გაკეთებული განცხადება მისი პიროვნებისთვის ძალიან შეურაცხმყოფელია.
„რა უნდა ვთქვა გარდა იმისა, რომ ეს არის მდაბიო, უკადრებელი განაცხადი. მოვიდეს ბატონი სარიშვილი და პირადად მითხრას, სად მნახა პარტიიდან-პარტიაში მორბენალი. ვეტყვი, რომ მას შემდეგ, რაც 1986 წელს დავტოვე კომუნისტური პარტიის მანდატი, არასდროს, არც ერთი პარტიის წევრი არ ვყოფილვარ, ვიდრე „ქართულ ოცნებაში“ არ გავწევრიანდი. 1986 წლიდან ეროვნულ მოძრაობაში ვარ, პირადად ვიცნობდი მერაბ კოსტავას და მე ამაყი ვარ ჩემი წარსულით. პირადად ვმონაწილეობდი დედაქალაქში სააკაშვილის წინააღმდეგ გამართულ აქციებში. 2011 წელს ჩამოვედი ლანჩხუთში, ვიყავი „ოცნების“ აქტიური მხარდამჭერი, დაახლოებით 2015 წელს კი მმართველი პარტიის რიგებში შევედი. დღეს კი ისე აღმოჩნდა, ადამიანები ვისაც ვებრძოდი, „ოცნებას“ წარმოადგენენ, მაღალ თანამდებობებზე არიან, ჩვენ კი თურმე არავინ ვყოფილვართ „ოცნებაში“. 10 კაციდან რვა „ნაციონალი“ ყავთ, ჩვენ კი ვინც აქტიურად ვიბრძოდით, გვერდზე გაგვწიეს. ნიკა ვადაჭკორია რომ პარტიის ერთ-ერთი დამფუძნებელია, ეს ყველამ იცის. შეურაცხმყოფელია, ის, რაც ალექსანდრე სარიშვილმა იკადრა, მდაბიო საქციელია ეს“, _ ამბობს „ოცნების“ რიგებიდან წამოსული ჯანო ქინქლაძე.
