“ვისვენებთ სუფთა ჰაერზე” _ მძიმე წონიანი მანქანები და მტვრის ბუღი ბახმაროს ქუჩებში

კურორტ ბახმაროში დასვენება იაფი არც წელს ჯდება, თუმცა მიმდინარე ინფრასტრუქტურული სამუშაოები იქ მყოფ დამსვენებლებს აწუხებთ.

“ვისვენებთ სუფთა ჰაერზე”, – ამ სათაურით და გაბრაზებული სმაილებით გამოაქვეყნა პოსტი ჯგუფ “ბახმაროში” ერთ-ერთმა მომხმარებელმა.

ვიდეოში ჩანს  გადათხრილი გზა, რომელზეც სატვირთო ავტომობილები გადაადგილდებიან და გარემოს ამტვერებენ.

პოსტს სოციალურ ქსელში  გამოხმაურება მოჰყვა. ხალხის ნაწილი ფიქრობს, რომ სამუშაოები შუა სეზონზე, როცა კურორტზე ბევრი ადამიანი იმყოფება, არ უნდა ტარდებოდეს, ზოგს კი მიაჩნია, რომ ბახმაროში საუკუნის პროექტი კეთდება და სამუშაოებიდან გამოწვეული დისკომფორტის ატანის მეტი, არც არაფერი დარჩენიათ.

_ რა სამუშაოები მიმდინარეობს დაბა ბახმაროში და როდის უნდა დასრულდეს_  ამის შესახებ “გურია ნიუსი” დაბა ბახმაროში მერის წარმომადგენელს, შალვა ცინცაძეს ესაუბრა.

_ მიმდინარეობს მდინარე ბახვისწყლის კალაპოტის გასწორხაზოვნება  და გზის საფარის რეაბილიტაცია,  რომლის პირველი ეტაპიც,  რაც მთავარია წელს უნდა მოესწროს თუ ამინდებმა ან და სხვა გარე ფაქტორებმა არ შეუშალა ხელი სამუშაოების ჩატარებას. ბახმაროს კლიმატური პირობების გამო ძალიან პატარა დრო გვაქვს ესეთი მნიშვნელიბის ინფრასტრუქტურული სამუშაოების ჩასატარებლად, აქედან გამომდინარე,  ბოდიშს ვუხდით ბახმაროში დამსვენებლებს შექმნილი დისკომფორტისათვის.
აღსანიშნავია,  რომ ხვალიდან დაიწყება გზის გადარეცხვა,  რათა შემცირდეს ასფალტის საფარის რეაბილიტაციით გამოწვეული მტვერი”,_ ამბობს ცინცაძე.