ერთი თვეა, რაც ლანჩხუთის მერის პირველი მოადგილის პოსტი ვაკანტურია. თუ ჩავთვლით იმასაც, რომ „რიგითი“ მოადგილის შტატი წლებია, თავისუფალია, ფაქტობრივად, მუნიციპალიტეტის მერს ეს დღეები მარტო უწევს ჭაპანის წევა.
ფაქტია, ეს რომ ასეა, სულაც არ იყო მთლად მერის სურვილი. მართალია, მოადგილის დანიშვნას ის აქამდე არც ჩქარობდა, მაგრამ პირველი მოადგილის შენარჩუნებისთვის საკმაოდ ბევრი იბრძოლა. კარგა ხანი გაუძლო კიდეც სხვადასხვა მხრიდან შემოტევებს და გოგი ფაცურიას მუშაობის ვადა გაუხანგრძლივა, თუმცა, გასული თვის ბოლოს ფარ-ხმლის დაყრა მოუწია და სწორედ ამის შემდეგ დარჩა ეულად.
როგორც კულუარებში ამბობენ, არც ახალი მოადგილეების შერჩევაში ითვალისწინებენ დიდად ალექსანდრე სარიშვილის გემოვნებას. განსაკუთრებით, ეს პირველი მოადგილის პოსტს ეხება, სადაც, როგორც „ბოროტი ენები“ ამბობენ, ისეთი კაცის დანიშვნაა ჩაფიქრებული, რომელიც მუნიციპალიტეტის ფაქტობრივი მმართველი გახდება. ჩვენი ინფორმაციით, ალექსანდრე სარიშვილი ამ დღეებში თბილისში იმყოფებოდა და სწორედ ამ საკითხის ირგვლივაც ჰქონდა საუბარი და როგორც ამბობენ, პირველი მოადგილის შესაძლო კანდიდატურა იქ წარმოუდგინეს.
ჩვენივე ინფორმაციით, ეს კანდიდატურა, ამჟამად ურეკის ადმინისტრაციული ერთეულის პირველი პირი, ბიძინა იმნაიშვილია. იმნაიშვილი წარმოშობით ლანჩხუთის სოფელ შუხუთიდანაა და საკმაოდ კარგადაც იცნობს მშობლიურ მუნიციპალიტეტს. იგი ივანიშვილებთან დაახლოებულ პირად მოიაზრება და აქედან გამომდინარე, სულაც არაა გასაკვირი, არჩევანი მასზე რომ შეჩერდეს.
სხვათა შორის, იმნაიშვილის გვარი 2014 წლის თვითმმართველობის წინასაარჩევნო პერიოდშიც ფიგურირებდა, როცა მუნიციპალიტეტის გამგებლის პოსტის დასაკავებლად ერთ-ერთ კანდიდატად მოიაზრებოდა. ოღონდ, საუბარია არა ბიძინა იმნაიშვილზე, არამედ მის ძმაზე _ არჩილზე, რომელიც დედაქალაქში კერძო ბიზნესითაა დაკავებული და მას მაშინდელი მხარის გუბერნატორი გიორგი ჩხაიძე ლობირებდა, რომელიც თავადაც სოფელ შუხუთიდანაა. მაშინ მას მოქმედ გამგებელ ზაზა ურუშაძესთან არცთუ კარგი ურთიერთობა ჩამოუყალიბდა და მისი გზიდან ჩამოშორებაც ჰქონდა ჩაფიქრებული. თუმცა, ეს გეგმა ჩაიშალა _ მმართველი პარტიის ცენტრალურ ოფისში მხარი ზაზა ურუშაძეს დაუჭირეს და ამით ეს თემაც ამოიწურა.
მერის პირველი მოადგილის პოსტის დასაკავებლად ლანჩხუთში ამბიცია ისედაც საკმაოდ ბევრს აქვს, მათ შორის საკრებულოს მოქმედ დეპუტატებს უმრავლესობიდან. ასევე, საუბარია მამათის ადმინისტრაციულ ერთეულში მერის წარმომადგენელზე, გელა პატეიშვილზეც. თუმცა, ამ ვერსიებზე ოფიციალურად არავინ საუბრობს.
ინფორმაციას, რომ დედაქალაქში სტუმრობისას პარტიის ოფისში პირველი მოადგილის კანდიდატურაზე იყო საუბარი, არ ადასტურებს ალექსანდრე სარიშვილი. მისი თქმით, ის თბილისში სხვა მუნიციპალიტეტების მერებთან ერთად იმყოფებოდა, თან არა პარტიულ ოფისში, არამედ ინფრასტრუქტურულ პროექტებთან დაკავშირებით განვლილი ექვსი თვის ანგარიშის წარდგენაზე.
„გპირდებით, რომ ძალიან მალე გაიგებთ თქვენც და საზოგადოებაც, თუ ვინ დაიკავებს ლანჩხუთში მოადგილეების ვაკანტურ პოსტებს. ძალიან მალე დაინიშნება ორივე მოადგილე და რა ინფორმაციაც ვრცელდება, ტყუილია ეს ყველაფერი. არავის კანდიდატურა არ წარმოუდგენიათ ჩემთვის და არც პარტიის ოფისში ვყოფილვარ. სხვა მერებთან ერთად ინფრასტრუქტურული პროექტების ექვსი თვის ანგარიშის წარდგენაზე ვიყავი თბილისში და მხოლოდ ეს იყო”, _ გვითხრა სარიშვილმა.
რაც შეეხება მერის მეორე მოადგილის შტატს, ამ პოსტზე კულუარებში ეკატერინე გუჯაბიძეს მოიაზრებენ, რომელიც ამჟამად მერის თანაშემწის თანამდებობას იკავებს. თუმცა, განიხილება სხვა კანდიდატურებიც და კონკრეტულად ვისზე შეჩერდება არჩევანი, როგორც მუნიციპალიტეტის მერი გვპირდება, მალე შევიტყობთ.
