გუშინ, გერმანულ გამოცემა “ბილდში”, კრივში მსოფლიოს ყოფილი ჩემპიონის, კიევის მერის ვიტალი კლიჩკოს წერილი გამოქვეყნდა, რომელშიც იგი რუსეთის ჯარის უკრაინის ტერიტორიაზე მოსალოდნელ შეჭრაზე წერს, ევროკავშირის ქვეყნებს დახმარებას სთხოვს და აცხადებს, რომ საკუთარ ქვეყანას თვითონაც დაიცავს.
“მთელ უკრაინაში ვემზადებით იმისთვის, რომ რუსეთის პრეზიდენტმა ვლადიმირ პუტინმა, შესაძლოა, ომის დაწყების ბრძანება გასცეს და რუსულმა ჯარმა, ისევე, როგორც 2014 წელს, უკრაინას შეუტიოს.
ჩემს მშობლიურ კიევში ჩვენ უკვე ვემზადებით ამისთვის და ვემზადები მეც, როგორც ქალაქის მერი. ჯარში გაწვევისა და რეზერვისტების განათლების პროცესიც უფრო ინტენსიური გავხადეთ. ჯარისკაცის რანგში ერთხელ დავდე ფიცი, რომ ქვეყანას დავიცავდი და ახლაც მზად ვარ, რომ ჩემი სამშობლოსთვის ვიბრძოლო. გერმანიამ უნდა გაიგოს: სიტუაცია ძალიან, ძალიან სერიოზულია!
პუტინმა 100 000-ზე მეტი ჯარისკაცი შეკრიბა ჩვენს საზღვართან _ ეს უპრეცედენტო მუქარაა. არსებობს რამდენიმე სცენარი, როგორ შეიძლება შეუტიოს რუსეთის არმიამ უკრაინას. ჩვენ ყველა შესაძლო სცენარისთვის მზად უნდა ვიყოთ.
ხშირად მესმის, რომ ზოგიერთი პოლიტიკოსი ამბობს, პუტინი შეტევას არ დაიწყებს და ეს მხოლოდ მუქარებიაო. მახსენდება 2014 წლის დისკუსიები _ მაშინაც, თითქმის ყველა საერთაშორისო დამკვირვებელი ამას ამბობდა.
ჩვენ, უკრაინაში სასწრაფოდ გვჭირდება საერთაშორისო მხარდაჭერა და სამხედრო დახმარება. არ შეიძლება, რომ გერმანია არ დაეთანხმოს NATO-ს გადაწყვეტილებას, რომელიც უკრაინისთვის თავდაცვის მიზნით იარაღის მიწოდებას ითვალისწინებს. გერმანიის ახალ მთავრობას უნდა ესმოდეს, რომ ჩვენი ქვეყნისთვის დახმარება ასე მნიშვნელოვანი არასდროს ყოფილა. უკრაინა ევროპის ცენტრშია, ესაზღვრება ევროკავშირის რამდენიმე ქვეყანას!
ჩვენ არ გვინდა ომი, მშვიდობა გვსურს. ჩვენ არ დავუშვებთ, რომ რუსეთმა დაგვაბრუნოს საბჭოთა იმპერიაში. უკრაინაში ადამიანებს ეს არ სურთ. ჩვენ ევროპული სახელმწიფო ვართ, რომელსაც ისე სჭირდება ევროპული დახმარება, როგორც არასდროს!”
ვიტალი კლიჩკო ჩინებული სპორტსმენი გახლდათ. აღმოჩნდა რომ თავისი ქვეყნის გულანთებული პატრიოტი და დიდებული პიროვნებაც ყოფილა. იმედია, უკრაინაში მდგომარეობა არ გამწვავდება, მაგრამ ამ რუსეთისაც ვინ რას გაიგებს…
ყველას საკუთარი პრობლემები გააჩნია. აგერ მადრიდის “რეალის” ხელმძღვანელობამ უეფას წინააღმდეგ გაილაშქრა. ესპანური მედიის ცნობით, “სამეფო კლუბი” ჩემპიონთა ლიგის გუშინწინდელი წილისყრის თავდაპირველი შედეგების სრულ ანულირებას გაასაჩივრებს.
როგორც “რეალში” მიიჩნევენ, უკვე ყველასთვის ცნობილ შეცდომას მადრიდულ გუნდთან დაკავშირებულ მომენტზე გავლენა არ მოუხდენია. საქმე ისაა, რომ “ბენფიკა”-“რეალის” წყვილი წილისყრის დროს პირველივე შედგა და უეფამ შეცდომა მხოლოდ ამის შემდეგ დაუშვა. ამგვარად, “რეალის” ხელმძღვანელობა ფიქრობს, რომ ეს წყვილი ძალაში უნდა დარჩეს.
აღსანიშნავია, რომ უეფასა და “რეალის” პრეზიდენტ ფლორენტინო პერესს შორის ევროპის სუპერლიგის გამო დიდი ხანია დაძაბული ურთიერთობაა.
მადრიდის “რეალი” სასამართლოში საჩივრის შეტანისათვის ემზადება. აი, “პარი სენ- ჟერმენის” მცველი სერხიო რამოსი კი ყოფილი კლუბის – “რეალის” წინააღმდეგ ასპარეზობისათვის გულანთებული ემზადება.
სერხიო გამოცემა “Marca”-ს ესაუბრა და “პსჟ”-“რეალის” მომავალი დაპირისპირების შესახებ შემდეგი კომენტარი გააკეთა:
“როდესაც თვითმფრინავში ჩავჯექი, ჩვენი მეტოქე “მანჩესტერ იუნაიტედი” აღმოჩნდა, რომელიც ჩემი აზრით, ძლიერი გუნდია. შემდეგ გაირკვა, რომ წილისყრა წესების დაცვით არ ჩატარებულა. ვისურვებდი, რომ “რეალთან” შეხვედრა არ მქონოდა, მაგრამ “სანტიაგო ბერნაბეუზე” დაბრუნება სიხარულის მიზეზიცაა, რადგან კოვიდის გამო გამომშვიდობება ვერ მოვახერხე. მერჩივნა, სხვა გუნდთან გვეთამაშა. იცით, როგორი სიყვარული მაქვს და როგორ ვარ დაკავშირებული მადრიდის “რეალთან”, ეს არასდროს შეიცვლება. თუმცა, ახლა “პსჟ”-ს ღირსებას ვიცავ და ყველაფერს გავაკეთებ, რომ მომდევნო ეტაპზე გავიდეთ, “პარი სენ-ჟერმენისთვის” მოვკვდები”.
გუშინ ესპანურმა “ვალენსიამ” თავის ოფიციალურ ვებ-გვერდზე გაავრცელა ინფორმაცია, რომ კლუბის საწვრთნელი შტაბის კიდევ ორმა წარმომადგენელმა ჩააბარა დადებითი კოვიდტესტი. მანამდე კორონავირუსით გუნდის მთავარი მწვრთნელი, ხოსე ბორდალასი და ცენტრალური მცველი ომარ ალდერეტე დაინფიცირდნენ.
“ვალენსიაში” საქართველოს ნაკრების მეკარე, გიორგი მამარდაშვილი ასპარეზობს. იმედია, მისი გვარი ინფიცირებულთა სიაში არ მოხვდება და კოვიდ-19 მას გვერდს აუვლის.
ეროვნული საკალათბურთო ასოციაციის მიმდინარე სეზონში პირველად მატჩები კორონავირუსის პანდემიის გამო გადაიდო. საუბარია თამაშებზე “ჩიკაგო ბულსის” მონაწილეობით, რომლებიც შესაბამისად, 15 და 17 დეკემბერს, “დეტროიტ პისტონსთან” და “ტორონტო რეპტორსთან” უნდა გამართულიყო.
გუშინდელი დღის მონაცემებით NBA-ს ჯანმრთელობის დაცვისა და უსაფრთხოების პროტოკოლში ჩიკაგოელთა ერთბაშად 9 კალათბურთელი იმყოფება: დემარ დეროზანი, ზაკ ლავინი, ჯავონტ გრინი, მეტ ტომასი, დერიკ ჯონსი, აიო დოსუნმუ, სტენლი ჯონსონი, ალაიზ ჯონსონიA და ტროი ბრაუნი.
იმისთვის, რომ კლუბს თამაშის უფლება ჰქონდეს, შემადგენლობაში 8 ჯანმრთელი მოთამაშის ყოლაა საჭირო, რასაც მაიკლ ჯორდანის ყოფილი გუნდი ვერ ახერხებს. შედეგად, ლიგის ხელმძღვანელობამ უპრეცედენტო გადაწყვეტილება მიიღო და ჩიკაგოელთა უახლოესი მატჩები გადაიტანა.
[sexy_author_bio]
