ქართველმა მოდელმა, ვახტანგ უჩავამ კონკურსზე ,,მისტერ იტალია 2020″ მეორე ადგილი მოიპოვა და „ვიცე მისტერ იტალია“ გახდა.
ვატო 21 წლისაა. იგი იტალიაში, ქალაქ ბარში, დედასთან, ქალბატონ ქეთევან სიხარულიძესთან ერთად ცხოვრობს. ჩვენი ახალგაზრდული გაზეთი დედა-შვილს იტალიაში დაუკავშირდა და ინტერვიუ ჩაწერა.
ქალბატონი ქეთევანი წარმოშობით ჩოხატაურიდან, სოფელ ბუკისციხიდანაა. როგორც თავად გვეუბნება, ბუკისციხესთან განსაკუთრებული მოგონებები აკავშირებს და ზაფხულობით, როცა საქართველოში ჩამოდის, ცდილობს, ყოველთვის მოინახულოს თავისი საყვარელი სოფელი.
_ დავიბადე ჩოხატაურში, სოფელ ბუკისციხეში, მაგრამ რუსთავში გავიზარდე. ბუკისციხესთან საუკეთესო მოგონებები მაკავშირებს. ვატოც რუსთავში დაიბადა. მე 13 წლის წინ წამოვედი იტალიაში, ვატოც 10 წელია ჩემთანაა. დანარჩენს ვატო გიამბობთ, _ გვითხრა ქალბატონმა ქეთევანმა.
ვატომ ახალგაზრდულ გაზეთთან თავისი წარმატებებისა და გეგმების შესახებ ისაუბრა.
_ ვატო უჩავა მოდელია _ როგორ აირჩიე ეს პროფესია და საერთოდ, როგორ მოხვდი კონკურსზე „მისტერ იტალია 2020“?
_ ძალიან აქტიური ინსტაგრამ გვერდი მაქვს. 25 000 გამომწერი მყავს. ხშირად მაქვს მოწვევები სხვადასხვა სააგენტოს მიერ კონკურსებზე. ერთ-ერთი ასეთი გამოხმაურება იყო „მისტერ იტალიაც“.
_ ცოტა რამ კონკურსის შესახებაც რომ გვითხრა…
_ კონკურსზე თავიდან 100 აპლიკანტი დარეგისტრირდა. იმ 100-დან 10 შეირჩა. საბოლოოდ კი, სამი გამარჯვებული გამოვლინდა.
მე და კიდევ 2 მონაწილე ჟიურის მიერ შერჩეული გამარჯვებულები ვართ. კიდევ არის სამი გამარჯვებული, რომლებიც სოციალური ქსელის მომხმარებლების მიერ გამოვლინდნენ _ “მისტერ იტალია like”.
_ რას შეცვლის ეს ტიტული შენს ცხოვრებაში?
_ ეს ტიტული ძალიან ბევრ რამეს შემიცვლის ცხოვრებაში. პირველ რიგში, იტალიაში გავხდი ცნობადი, რაც დამეხმარება მომავალ საქმიანობასა და კარიერის აწყობაში.
_ ვატო, საქართველოშიც ხომ არ იყავი დაკავებული მოდელის პროფესიით?
_ არა, საქართველო პატარა ასაკში დავტოვე, საქართველოში ამაზე არც მიფიქრია…
_ კორონავირუსის პანდემიამ ხომ არ შეგიშალა ხელი საქმიანობაში?
_ პანდემიამ ძალიან შემიშალა ხელი. თავიდან, როცა ვირუსი ძალიან გავრცელდა, 2 თვე, ფაქტობრივად, გამოკეტილი ვიყავი სახლში…
_ ამ ეტაპზეც გაქვს გადაღებები?
_ არა, ცოტა ხნის წინ, კონკურსის ფარგლებში, გადაღებები გვქონდა მილანში. ახლა ვისვენებთ. სექტემბრიდან ისევ დაიწყება.
_ გარდა მოდელობისა, სხვა გატაცება, ასე ვთქვათ, ჰობი თუ გაქვს?
_ დიახ, 6 წლიდან დაკავებული ვარ ჩოგბურთით. არაერთი წარმატება მაქვს სპორტის ამ სახეობაში. ვიყავი საქათველოს 2-გზის ჩემპიონი. დღეს აქტიურად ვვარჯიშობ ჩოგბურთში და ვაპირებ სერიოზულ ტურნირებში მონაწილეობის მიღებას.
_ პირად ცხოვრებაზე რას გვეტყვი, ახალგაზრდა მოდელის გული დაკავებულია?
_ არა, ჯერჯერობით, თავისუფალია.
_ ისე, როგორ ფიქრობ, სამომავლოდ შენ გვერდით ქართველ გოგონას უფრო ისურვებ თუ, ვთქვათ, იტალიელს?
_ ამის პასუხი არ მაქვს, სიმართლე გითხრათ, ამაზე არ მიფიქრია…
_ რა განსხვავებას ან მსგავსებას ხედავ ქართველ და იტალიელ გოგონებს შორის?
_ საქართველო პატარამ დავტოვე, კარგად არ ვიცნობ ქართველი გოგონების ხასიათს, რადგან აქ, ძირითადად, ურთიერთობა იტალიელებთან მაქვს, ამიტომ მათ მსგავსება-განსხვავებაზე პასუხის გაცემა გამიჭირდება.
_ სამომავლო გეგმებზე რას გვეტყვი?
_ სექტემბრიდან, როგორც გითხარით, გადაღებები განახლდება, ვაპირებ ჩოგბურთის ტურნირებში ჩართვას, ასევე, მიწვეული ვარ „მისტერ და მის საქართველოს“ ჟიურიში, რომელიც მომავალი წლის 10 აგვისტოს ჩატარდება.
_ რას ფიქრობ საქართველოზე…
_ არ მინდა საქართველოში უდანაშაულო ადამიანებს, მით უფრო ახალგაზრდებს, ჩემს ტოლებს, ბავშვებს ხოცავდნენ.
_ ხშირად ადევნებ თვალყურს საქართველოში მიმდინარე მოვლენებს?
_ ძალიან გადატვირთული გრაფიკი მაქვს და დროის უქონლობის გამო, სამწუხაროდ, ხშირად ვერ ვახერხებ, თვალი ვადევნო მიმდინარე მოვლენებს.
_ რას ეტყოდი იტალიას?
_ ძალიან მადლიერი ვარ იტალიის, იტალიელი ხალხის. თბილი, მოსიყვარულე ადამიანები არიან. მადლობას ვუხდი იტალიას, რომ განვითარების ასეთი საშუალება მომცა.
_ და ბოლოს, რას ეტყოდი შენს თანატოლებს?
_ ჩემს ყველა მეგობარს, თანატოლს მინდა ვუსურვო ბედნიერება, წინსვლა და წარმატებები ცხოვრებაში.
თქვენ კი მადლობას გიხდით, რომ დაინტერესდით ჩემით და მომეცით საშუალება, ქართველი მკითხველისთვის მესაუბრა.
