“ნებისმიერი ზეწოლა, სანქცია და მუქარა უკავშირდება შანტაჟს, როგორმე დავთმოთ ჩვენი პოლიტიკა, დამოუკიდებლობა და სუვერენიტეტი. ბუნებრივია, ამას არ გავაკეთებთ”, – ამის შესახებ საპარლამენტო უმრავლესობის წევრმა, ვლადიმერ ბოჟაძემ განაცხადა, _ იუწყება 1tv.ge
ბოჟაძე გამოეხმაურა ევროკავშირის საბჭოს გადაწყვეტილებას, ქართველი დიპლომატებისა და მაღალი რანგის თანამდებობის პირებისთვის უვიზო მიმოსვლა შეაჩეროს.
„ევროკავშირმა სხვა სანქციებზე შეთანხმება ვერ მოახერხა, რადგან ეს 27-ე სახელმწიფოს გადაწყვეტილებას და თანხმობას მოითხოვდა, თუმცა მოხერხდა საგარეო საქმეთა მინისტრების დონეზე. იქ საჭირო არ არის კვალიფიციური უმრავლესობა, რომ დავესაჯეთ მხოლოდ იმის გამო, რომ ვიცავთ ჩვენი ქვეყნის სუვერენიტეტს, დამოუკიდებლობას. ჩვენ გავბედეთ და მივიღეთ გამჭვირვალობის შესახებ კანონი; ალბათ მათთვის ყველაზე რთული იყო ის კანონმდებლობა, რომელიც ლგბტ პროპაგანდასთან დაკავშირებით მივიღეთ და დავალება მოგვცა მილიონამდე ქართველმა, რომელიც 17 მაისს ოჯახის სიწმინდის დღის აღსანიშნავად საქართველოს ყველა რეგიონში გამოვიდა. იგივე კანონმდებლობა უკვე მიიღო, მათ შორის, ამერიკის შეერთებულმა შტატებმა და სხვა ქვეყნებიც იმავეს გაკეთებას აპირებენ. ამის გამო სჯიან იმ ადამიანებს, ხელისუფლების იმ წარმომადგენლებს, ვინც ეს მივიღეთ. ნებისმიერი ასეთი ზეწოლა, სანქცია და მუქარა უკავშირდება შანტაჟს, როგორმე დავთმოთ პირობები, ჩვენი პოლიტიკა, დამოუკიდებლობა და სუვერენიტეტი. ბუნებრივია, ამას არ გავაკეთებთ. პირიქით, ნებისმიერი ასეთი მცდელობა ჩვენთვის დამატებითი სტიმულია, უკეთ ვემსახუროთ ჩვენს ხალხს და ჩვენს ქვეყანას“, – განაცხადა ვლადიმერ ბოჟაძემ.
კითხვაზე, რას ცვლის ევროკავშირის გადაწყვეტილება პრაქტიკაში, ბოჟაძემ აღნიშნა:
„ჩემი ინფორმაციით, ბევრს არაფერს შეცვლის. პარლამენტის წევრებს და თანამდებობის პირებს აქვთ როგორც დიპლომატიური პასპორტი, ასევე ჩვეულებრივი პასპორტები. მანამდე, როგორც რიგითი მოქალაქე, ქვეყნის გარეთ გადავადგილდებოდი და მომავალშიც ასე გავაგრძელებ. ამის საშუალება დიპლომატიური პასპორტებით თუ არ მოგვეცემა, ნუ მოგვეცემა. მთავარია, არა ის, რა შედეგი დადგება და ჩვენთან მიმართებით რა შეზღუდვა იქნება, არამედ დამოკიდებულება, რომელიც გამოჩნდა. მუდმივად ვსაუბრობდით, რომ მხოლოდ მშვიდობით, ღირსებით და კეთილდღეობით მივდივართ ევროკავშირისკენ. გამჭვირვალობის შესახებ და ლგბტ პროპაგანდის წინააღმდეგ კანონები ძირითადი მიზეზები იყო, რითიც უნდოდათ, ჩვენზე ზეწოლა მოეხდინათ“.
