რუსეთის პრეზიდენტის, ვლადიმერ პუტინის განცხადებით, “კოლექტიური უსაფრთხოების ხელშეკრულების” ფარგლებში ყაზახეთში გაგზავნილი “სამშვიდობო კონტიგენტი” ქვეყანაში შეზღუდული ვადით რჩება, _ ამის შესახებ რუსეთის პრეზიდენტმა ОДКБ-ს ონლაინ შეხვედრაზე განაცხადა.
მისი თქმით, ჯარი ადგილზე გარკვეული პერიოდით იქნება, მანამ, სანამ თავის ფუნქციებს არ შეასრულობს. პუტინის აზრით, ეს “სამშვიდობო ოპერაცია” ყაზახეთში იყო “უაღრესად დროული და ლეგიტიმური”.
“ჩვენ მოვახერხეთ კონტიგენტის სრული განლაგება საკმაოდ მოკლე დროში. ჩვენ მივიჩნევთ ჩვენს ერთობლივ ქმედებებს, როგორც უაღრესად დროულ და აბსოლუტურად, რა თქმა უნდა, ლეგიტიმურ ქმედებას.
კასტო-ს კოლექტიური სამშვიდობო ძალების კონტინგენტი გაიგზავნა ყაზახეთში. მინდა ხაზგასმით აღვნიშნო, რომ ყაზახეთში შეზღუდული პერიოდის განმავლობაში დარჩებიან. თავისი ფუნქციების შესრულების შემდეგ, რა თქმა უნდა, კონტინგენტი ყაზახეთის ტერიტორიას დატოვებს.
მათი ფუნქციების შესრულების შემდეგ, რა თქმა უნდა, მთელი კონტინგენტი გაიყვანება ყაზახეთის ტერიტორიიდან“, – განაცხადა რუსეთის ლიდერმა.
მისივე განცხადებით, რაც მოხდა “საერთაშორისო ტერორიზმია”
ყაზახეთის ჯანდაცვის სამინისტრო იუწყება, რომ ქვეყანაში ბოლო დღეების განმავლობაში არეულობის შედეგად 164 ადამიანი დაიღუპა. ყაზახეთში 10 იანვარი გლოვის დღედ გამოცხადდა.
ცნობისთვის, მასობრივი არეულობის ფონზე, ყაზახეთის ხელისუფლებამ ქვეყნის მთელ ტერიტორიაზე საგანგებო მდგომარეობა გამოაცხადა. 5 იანვარს, სომხეთის პრემიერ-მინისტრმა, ნიკოლ ფაშინიანმა განაცხადა, რომ კოლექტიური უსაფრთხოების ხელშეკრულების ორგანიზაციის საბჭომ გადაწყვეტილება მიიღო, ყაზახეთში კოლექტიური სამშვიდობო ძალები გააგზავნოს.
6 იანვარს, რუსეთმა ყაზახეთში სამხედრო ძალების გადასროლა დაიწყო. კოლექტიური სამშვიდობო ძალების კონტინგენტში რუსეთის, ბელარუსის, სომხეთის, ტაჯიკეთისა და ყირგიზეთის დანაყოფები შედიან.
პროტესტი მანგისტაუს რეგიონში საწვავის ფასის ზრდის გამო 2 იანვარს დაიწყო, მოგვიანებით კი თითქმის მთელი ქვეყანა მოიცვა. ისინი თავდაპირველად ფასის დაწევას ითხოვნდნენ, შემდეგ – მთავრობის გადადგომას.
ხელისუფლებამ პირველი იანვრიდან 1 ლიტრი თხევადი აირის ფასი 60 ტენგედან 120-მდე გაზარდა. გამოსვლების შემდეგ სამთავრობო კომისია მომიტინგეებს გაზის ფასის შემცირებას დაჰპირდა. მოლაპარაკებების შედეგად მათ თქვეს, რომ 1 ლიტრის ფასი 50 ტენგე იქნება.
