უკრაინაში დაძაბული საომარი მოქმედებები კვლავ გრძელდება. მდგომარეობა ძალიან რთულია. უკრაინელი ხალხი თავდაუზოგავად იბრძვის და რუსეთს წინასწარ დაგეგმილი „ბლიცკრიგი“ არ გამოუვიდა.
უკრაინას მთელი მსოფლიო სოლიდარობას უცხადებს. მათ შორის არაერთი გამოჩენილი სპორტსმენიცაა. სასიამოვნოა რომ გუშინ მათ რიცხვში ქართველი კალათბურთელი თორნიკე შენგელიაც აღმოჩნდა.
შენგელიამ რუსეთი დატოვა და „ცსკა“-ში აღარ ითამაშებს! მან მოსკოვური კლუბიდან წასვლა რუსეთის მიერ უკრაინაში შეჭრის, ომის დაწყებისა და ქალაქების დაბომბვის შემდეგ გადაწყვიტა.
გუნდის დატოვების წინ ქართველმა სოციალურ ქსელში პოსტი გამოაქვეყნა, ფოტოდ უკრაინის დროშა დააყენა და დაწერა: „ვლოცულობ უკრაინისთვის! გამაგრდით“.
უკრაინაში რუსეთის აგრესიას გამოეხმაურა საქართველოს ნაკრებისა და ყაზანის „რუბინის“ თავდამსხმელი ხვიჩა კვარაცხელიაც:
„გთხოვთ, შეაჩერეთ ომი!“ – დაწერა კვარაცხელიამ ინსტაგრამის გვერდზე.
გუშინ ინგლისური „ჰალის“ მთავარი მწვრთნელი შოთა არველაძე ბრიტანულ ცნობილ გამოცემა The Sun-ს ესაუბრა და რუსეთ-უკრაინის დაპირისპირებასაც შეეხო.
„მსურს საუკეთესო ვუსურვო ჩემს უკრაინელ მეგობრებს. ეს არის ქვეყანა, რომელიც გვიყვარს. რუსეთმა უნდა შეწყვიტოს ომი და დაბომბვა, რომელსაც დიდი მსხვერპლი და ნგრევა მოაქვს. იღუპებიან ბავშვები. საქართველოში არაერთი კონფლიქტი გამოვიარეთ მას შემდეგ, რაც 1991 წელს დამოუკიდებლობა გამოვაცხადეთ. იგივე ხდება დღეს უკრაინაში. სამწუხაროდ, ამ და საბჭოთა კავშირის სხვა ყოფილ რესპუბლიკებს ჯერ კიდევ უწევთ ბრძოლა. ძალიან მძიმე სანახავია ეს ყველაფერი. დედამიწის არცერთ ნაწილში არ უნდა იყოს ომი“.
გუშინ საერთაშორისო ოლიმპიური კომიტეტის აღმასრულებელმა საბჭომ კიდევ ერთხელ დაგმო რუსეთისა და ბელარუსის მთავრობების მიერ ოლიმპიური ზავის დარღვევა და საერთაშორისო ფედერაციებს მიმართა, რომ გააუქმონ ან გადაიტანონ ის სპორტული ღონისძიებები, რომელთა ჩატარებასაც ამ ქვეყნებში გეგმავდნენ.
არსებული ისტორიული ტრადიციის მიხედვით ოლიმპიური თამაშების დაწყებამდე შვიდი დღით ადრე ძალაში შედის ოლიმპიური ზავი, რომელიც სრულდება პარალიმპური თამაშების დასრულებიდან 7 დღის შემდეგ. ამ პერიოდის განმავლობაში ომის წარმოება აკრძალულია.
პეკინის ზამთრის ოლიმპიური თამაშები 4 თებერვალს დაიწყო, პარალიმპური თამაშები 13 მარტს დასრულდება, შესაბამისად, ოლიმპიური ზავი 20 მარტამდე მოქმედებს.
საერთაშორისო ოლიმპიური კომიტეტის განცხადებაში ვკითხულობთ, რომ რუსეთმა და ბელარუსმა აღნიშნული ზავი დაარღვიეს და ამ ქვეყნებში გასამართი ღონისძიებები სპორტსმენებისთვის უსაფრთხო ვერ იქნება. გარდა ამისა, საერთაშორისო ოლიმპიური კომიტეტის საბჭო მოუწოდებს საერთაშორისო ფედერაციებს, რომ სპორტულ ღონისძიებებზე რუსეთსა და ბელარუსს ეროვნული დროშისა და ჰიმნის გამოყენების საშუალება არ ჰქონდეს.
გუშინ ცნობილი გახდა რომ „მანჩესტერ იუნაიტედმა“ რუსეთის სახელმწიფო ავიაკომპანია „აეროფლოტთან“ კომერციული პარტნიორობა ოფიციალურად შეწყვიტა. მიზეზი რუსეთის ფედერაციის მიერ უკრაინის სახელმწიფოში შეჭრა და იქ ფართომასშტაბიანი ომის გაჩაღებაა.
„უკრაინაში მიმდინარე მოვლენების გათვალისწინებით, ჩვენ გავაუქმეთ სასპონსორო შეთანხმება „აეროფლოტთან“. ვიზიარებთ ჩვენი გულშემატკივრების შეშფოთებას და თანადგომას ვუცხადებთ დაზარალებულებს”.
„აეროფლოტი“ მანჩესტერულ გუნდთან 2013 წლიდან თანამშრომლობდა და ინგლისური კლუბი ევროპის ქვეყნებში მატჩების ჩასატარებლად სწორედ ამ ავიაკომპანიის დახმარებით მგზავრობდა.
გუშინვე სათხილამურო სპორტის საერთაშორისო ფედერაციამ მიმდინარე სეზონის რუსეთში ჩასატარებელი ყველა ტურნირი გააუქმა და მათ სხვა ადგილას გადაიტანს. აღსანიშნავია, რომ ქალაქ ტიუმენში გასამართი მსოფლიო თასიც გაუქმდა. ეს ნაბიჯი მსოფლიო თასის ერთიანობისა და მონაწილეთა უსაფრთხოების უზრუნველყოფის მიზნით ფედერაციის წევრებთან შემდგარი კონსულტაციების შედეგად გადადგეს.
ფედერაციის მტკიცებით, ისინი უკვე მუშაობენ სამშობლოებში იმ სპორტსმენთა დასაბრუნებლად, რომლებიც მიმდინარე კვირაში დაგეგმილ ღონისძიებების გამო რუსეთში უკვე ჩასულები არიან.
ვიტალი კლიჩკომ ეს ადრეც არაერთხელ თქვა, ახლა კი, მას შემდეგ, რაც რუსეთმა უკრაინაში ფართომასშტაბიანი ომი დაიწყო და ქალაქებს, მათ შორის კიევსაც ბომბავს, კიდევ ერთხელ გაიმეორა: კიევის ამჟამინდელი მერი და ლეგენდარული მოკრივე უკრაინის დედაქალაქის დასაცავად პირადად იბრძოლებს ფრონტის წინა ხაზზე.
“სხვა გზა და არჩევანი უბრალოდ არ მაქვს. რა თქმა უნდა, ეს მეც უნდა გავაკეთო – იარაღი უნდა ავიღო და ვიბრძოლო. ასეც მოვიქცევი!” – უთხრა მძიმე წონაში მსოფლიოს ყოფილმა ჩემპიონმა Good Morning Britain-ს, – ჩვენ მსოფლიოში ერთ უდიდეს და უძლიერეს არმიას ვებრძვით, მაგრამ ჩვენ ჩვენი ოჯახები, ჩვენი ქვეყანა და ჩვენი ქალაქები უნდა დავიცვათ. რა თქმა უნდა, ეს მეც უნდა გავაკეთო – იარაღი უნდა ავიღო და ვიბრძოლო. ასეც მოვიქცევი!”
50 წლის კლიჩკო დარწმუნებულია, რომ უკრაინის ჯარი კიევის დაცვას შეძლებს: “მე მჯერა უკრაინის, მჯერა ჩემი ქვეყნის და ხალხის. ეს უკვე ძალიან სისხლიანი ომია. ხალხი უკვე დაიღუპა, არ ვიცით, რამდენი, – დასძინა კლიჩკომ, – რუსეთის წინააღმდეგ უმკაცრეს სანქციებს მოვითხოვთ. რუსებმა უნდა გადაიხადონ იმისთვის, რასაც აკეთებენ. მათ საერთაშორისო კანონმდებლობა ფეხქვეშ გათელეს. უკრაინა ყოველთვის მშვიდობისმოყვარე ქვეყანა იყო, მაგრამ ახლა იარაღი უნდა ავიღოთ და ვიბრძოლოთ. ისევე, როგორც სპორტში, ერთიანობა წარმატების გასაღებია.”
ვიტალიმ თავის ძმასთან, 45 წლის ვლადიმირთან ერთად მიმართვა ინსტაგრამზეც გაავრცელა: “ამ ომს მხოლოდ დამარცხებულები ეყოლება. ნუ დავუშვებთ ამას უკრაინაში, ევროპაში და ალბათ მთელ მსოფლიოში. ერთად ძლიერები ვართ. დაიცავით უკრაინა,” – ეს ვლადიმირ კლიჩკოს სიტყვებია.
[sexy_author_bio]
