17 ივნისს, ოზურგეთის მუნიციპალიტეტის სოფელ დვაბზუში, შალვა რადიანის სახელობის სახლ-მუზეუმში მგალობელ-მომღერალთა ტრიო _ „ხელხვავის“ ალბომის პრეზენტაცია გაიმართა.
ღონისძიება გახსნა მუნიციპალიტეტის მერიის კუტურის სამსახურის უფროსმა, მარინა ჯაფარიძემ. მან მოკლე მიმოხილვა გააკეთა ტრიო „ხელხვავის“ შესახებ, რომელიც 2014 წელს დაფუძნდა და მას სამი უნიჭიერესი მომღერალი: ლაშა ჩხარტიშვილი, მამუკა სირაძე და გურამ გუნთაძე წარმოადგენენ.
ტრიომ დამსწრეთა წინაშე, ჩონგურის თანხლებით, შეასრულა რამდენიმე სიმღერა.
ხალხური სიმღერები ასევე, როგორც ცალკე, ისე ტრიოსთან ერთად, შეასრულეს პრეზენტაციაზე მყოფმა გურული სიმღერის დიდოსტატებმა, ტრისტან სიხარულიძემ და ლევან ნინიძემ. ახალგაზრდები, რომლებიც ახლა ტრიოს წარმოადგენენ, პირველ ნაბიჯებს სწორედ სახელგანთქმულ ლოტბარებთან, მიხეილ შავიშვილთან და გელა ცელაძესთან დგამდნენ. შემდეგ კი მათი დაოსტატება ტრისტან სიხარულიძემ გააგრძელა.
„ხელხვავის“ პრეზენტაციაზე მომღერლებს მიესალმა და კვლავ დახმარება აღუთქვა ოზურგეთის მუნიციპალიტეტის მერმა, კონსტანტინე შარაშენიძემ.
გურიის გუბერნატორმა, ზურაბ ნასარაიამ მნიშვნელოვან მოვლენად შეაფასა დისკის პრეზენტაცია და თქვა, რომ გურული ფოლკლორი , გურული სიმღერა აუცილებლად იქნება გზამკვლევი ტურიზმისთვის, რომლის განვითარებაც ასე შეუქცევადია ჩვენს ქვეყანაში.
„ხელხვავის“ წევრმა, გურამ გუნთაძემ „გურია ნიუსთან“ ტრიოს პირველ და სამომავლო ნაბიჯებზე ისაუბრა:
-ბედნიერი ვარ, რომ დღეს მოხდა ჩვენი დისკის პრეზენტაცია, გამოვიდა პირველი აუდიო-ალბომი. ტრიო, რომლის წევრები არიან: ლაშა ჩხარტიშვილი, მამუკა სირაძე და მე, გურამ გუნთაძე, 2014 წელს შეიქმნა. ჩვენ ვართ გიორგი მთაწმინდელის უნივერსიტეტის კურსდამთავრებულები. ჩვენი კათედრის ხელმძღვანელი ანზორ ერქომაიშვილი იყო. ჩვენ ვმღერით მხოლოდ გურულ სიმღერებს და შემოქმედის სკოლის საგალობლებს. მომავალშიც ვიმღერებთ და გავაგრძელებთ ამ გზას. ჩვენი დისკი ჩაწერილია გერმანელი მკვლევარის, ფრენკ შერბაუმის მიერ. ახლა კი დისკი დააფინანსა და მოახდინა გამოშვება ოზურგეთის მუნიციპალიტეტის მერიამ, რისთვისაც უსაზღვროდ გახარებული ვართ. უახლოეს მომავალში ვგეგმავთ აქამდე შეუსწავლელი და ჩაუწერავი სიმღერების შესწავლას და მერე ჩაწერას და ახალი დისკის გამოშვებას, – გვითხრა მან.
აქვე აღვნიშნავთ, რომ გურამ გუნთაძე ძალზე ნიჭიერი შემოქმედია, უყვარს ფოტოგრაფია და ხშირად თანამშრომლობს „გურია ნიუსთან“ – გამოცემას აწვდის საუკეთესო ფოტორეპორტაჟებს გურიის თუ აჭარის მაღალმთიანეთიდან.
„ხელხვავის“ წევრი სამივე ახალგაზრდა, პარალელურად სხვადასხვა სკოლებში ხელმძღვანელობენ ბავშვთა გუნდებს, რომლებსაც გადასცემენ უდიდეს ცოდნას და აოსტატებენ მათ ქართული ხალხური სიმღერებისა და გალობის ცოდნაში.
ტრიო „ხელხვავი“ ამასთანავე არაერთი კონკურსისა და ფესტივალის გამარჯვებულია.
ეს არის ტრიოს მიერ ჩაწერილი პირველი კომპაქტ-დისკი, რომელიც ოზურგეთის მუნიციპალიტეტის მერიამ დააფინანსა.
პრეზენტაციას ესწრებოდნენ სახელმწიფო რწმუნებული გურიის მხარეში, ზურაბ ნასარაია, გუბერნატორის მოადგილე, აკაკი შენგელია. ოზურგეთის მერი, კონსტანტინე შარაშენიძე, მერის პირველი მოადგილე, ალექსანდრე სურგულაძე. განათლების, კულტურის, სპორტის, ახალგაზრდულ საქმეთა, ჯანდაცვისა და სოციალურ საკითხთა სამსახურის უფროსი, მარინა ჯაფარიძე და კულტურის სფეროს წარმომადგენლები.
ღონისძიება ჩატარდა ოზურგეთის მერიის კულტურის განყოფილების ორგანიზებით.
