ფაქტია, რომ ლანჩხუთში სხვადასხვა ინფრასტრუქტურული პროექტის გასახორციელებლად საკმაო თანხები იხარჯება, თუმცა, ვერც იმას გავექცევით, რომ მოუწესრიგებელი ქუჩები, მათ შორის, ქალაქის ცენტრალურ ნაწილში, დღემდე ერთ-ერთ მოუგვარებელ პრობლემად რჩება. მათ შორისაა გურიელის ქუჩაც, რომლის მოსახლეობაც წლებია პრობლემაზე საუბრობს. ადგილობრივები მათ ქუჩაზე ასფალტის საფარის დაგებას ითხოვენ.
“არ გვაღირსეს ჩვენს ქუჩაზე ასფალტის დაგება. დაპირებები კი, იცოცხლე. ირგვლივ სულ ასფალტიანი, გაწიკწიკებული ქუჩებია, ეტყობა პატრონი ჰყავთ კაი. ჩვენს ქუჩაზე კი ასეთი არავინ გამოჩნდა. ველოდებით სასწაულსა და ღვთის წყალობას. მარტო გვპირდებიან, რეალური კი, ჯერჯერობით, არაფერი ჩანს. არადა, რამდენი წელია მოლოდინით ვცხოვრობთ, გამგეობაში განცხადებაც დავწერეთ და ა, ვნახოთ, წელს მაინც თუ მოხდება სასწაული.
ცუდია, რომ ვიღაცეების პირადი სიმპათია-ანტიპათიით ისაზღვრება ამა თუ იმ ქუჩის
კეთილმოწყობა. არადა, წლების წინ, ე. წ. კომუნისტების ეპოქაში, ეს ქუჩა ერთ-ერთი
მნიშვნელოვანი იყო. “გურიას” სტადიონზე მისასვლელად მაღალჩინოსნები, სწორედ, ამ ქუჩით სარგებლობდნენ. მართალია, ახლა სტადიონზე ნაკლებად დადიან, მარა
ავტობანით მოსარგებლეები, ვისაც მოკლე გზით ქალაქში უნდა შემოსვლა, სწორედ ჩვენი ქუჩით სარგებლობს.
სიცხეში მტვერი და ბდღვირი დგება, წვიმაში კი ტალახია.
სანიაღვრე არხები კი გააკეთეს, მაგრამ დაპირებული ასფალტის საფარი არსად ჩანს. თან მოსაწესრიგებელია რკინიგზის პირას გამავალი მთავარი არხიც, სადაც, მთელი ეს ნაწრეტი წყალი უნდა ჩადიოდეს, მაგრამ იქ ხეებია ამოსული და წყალი ვეღარ გადის.
ლანჩხუთის ლამის ყველა ქუჩა და ყველა შუკა მოაასფალტეს და სირცხვილია ქალაქის ცენტრში ასეთი მოუწესრიგებელი ქუჩა იყოს.
კანალიზაციის სისტემაც პრობლემას წარმოადგენს ამ ქუჩაზე, ძალიან გვაწუხებს საკანალიზაციო სისტემის არარსებობაა. წვიმის მოსვლის გვეშინია _ ფეკალიებით ივსება ეზოები. წლების წინ იყვნენ მოსულები მერიის წარმომადგენლები და უშუალოდ მათგან მივიღეთ დაპირება, რომ კანალიზაციის პრობლემას მოგვიწესრიგებდნენ, მაგრამ მოტყუებულები დავრჩით, მერე გვითხრეს, არაო. სანიაღვრე არხის გაკეთება ამჯობინეს, საკანალიზაციო სისტემის გაყვანა სირთულეებთანაა დაკავშირებულიო. მოკლედ, რატომღაც ხელისუფალთაგან მოძულებულები ვართ გურიელის ქუჩის მცხოვრებლები”, _ ამბობს ამ ქუჩის მოსახლეობა.
გურიელის ქუჩის მცხოვრებთა თქმით, ინფრასტრუქტურული სამუშაოები, რომელიც 2019 წლის ზაფხულში გახორციელდა მათ ქუჩაზე და ადგილობრივი ხელისუფლების გადაწყვეტილებით, სანიაღვრე არხები მოეწყო, უფრო ზუსტად, უკვე არსებული არხის რეაბილიტაცია მოხდა, შესრულების ხარისხით ვერ დაიკვეხნის:
“სანიაღვრე არხი ქუჩის მარცხენა მხარეს გაკეთდა, მარჯვენა მხარე დატოვეს. სამუშაოები რომ დაიწყეს, ვიკითხეთ და თქვეს, ასეთია პროექტიო. არადა, თავიდან იყო ნათქვამი, რომ ქუჩის ორივე მხარეს გაკეთდებოდა სანიაღვრე არხი, თუმცა, მერე შეიცვალა. ნეტა, ვის მოუვიდა აზრად ასეთი პროექტის გაკეთება?!”
როგორც ირკვევა, საკრებულომ 25 იანვრის სხდომაზე დაამტკიცა საკითხი ლანჩხუთის მუნიციპალიტეტში 2023 წელს გასახორციელებელი პროექტების შესახებ, სადაც ვკითხულობთ, რომ მიმდინარე წელს ქალაქის ცხრა ქუჩის მოწესრიგება იგეგმება და პროექტის სავარაუდო ღირებულება 4 მილიონ 500 ათასი ლარითაა განსაზღვრული. ქუჩების ჩამონათვალში, ვკითხულობთ, რომ ზემოთ ნახსენები გურიელის ქუჩაცაა.
გარდა გურიელის ქუჩისა, მიმდინარე წელს ასევე გახორციელდება მშვიდობის, ხომერიკის, გ. ურუშაძის, გორგასლის, ვაჟა-ფშაველას, ნათლისმცემლის, ყაზბეგისა და ჭანტურიას ქუჩების ასფალტირებაც. ყოველ შემთხვევაში, აღნიშნულ დოკუმენტშია ქალაქის ეს ქუჩებია დაფიქსირებული, რეალურად კი, რა კორექტირება მოხდება, ამას დრო გვიჩვენებს.
ავტორი
