უკრაინის პრეზიდენტი ვოლოდიმირ ზელენსკი თვლის, რომ საქართველოს ხელისუფლება საქართველოს ყოფილი პრეზიდენტის და უკრაინის ამჟამინდელი მოქალაქის მიხეილ სააკაშვილის მოკვლას აპირებს.
interfax-ის ინფორმაციით, ზელენსკიმ კიევში ავსტრიის პრეზიდენტ ალექსანდრე ვან დერ ბელენთან შეხვედრისას გამართულ პრესკონფერენციაზე ჟურნალისტებს მიხეილ სააკაშვილის ამჟამინდელი მდგომარეობის ამსახველი ფოტოები აჩვენა.
“ოდესღაც ის საქართველოს პრეზიდენტი იყო. მიხეილ სააკაშვილი. ფოტოები დავით არახამიამ მოგვაწოდა. მინდა ნახოთ, როგორ გამოიყურება“, – განაცხადა უკრაინის პრეზიდენტმა ფოტოების საჯაროდ წარდგენისას
„მე მჯერა, რომ საქართველოს ხელისუფლება ახლა აკეთებს იმას, რასაც აკეთებს: კლავენ. თქვენ იცით, რომ მოწამლეს და ახლა ნელ-ნელა კლავენ, ბოდიში“, – ხაზგასმით აღნიშნა მან.
ამასთან დაკავშირებით ზელენსკიმ იკითხა:
„საქართველო, მისი ხელმძღვანელობა – ვისთვის არიან ისინი დღეს? ისინი ნეიტრალური არიან თუ რუსეთის მხარეს არიან? იმიტომ, რომ რუსეთი ისე ექცევა თავის პოლიტიკოსებს, როგორც დღეს საქართველოს ხელმძღვანელობა ექცევა არა თავის პოლიტიკოსებს, არამედ უკრაინის მოქალაქეებს. და კიდევ ერთხელ: ნეიტრალური არიან ისინი? თუ ისინი მხოლოდ უკრაინის წინააღმდეგ არიან და ა.შ.?” – განაცხადა პრეზიდენტმა.
ამასთან, მან აღნიშნა, რომ უკრაინა დიდი პატივისცემით ეპყრობა ამა თუ იმ სახელმწიფოს ნეიტრალიტეტის საკითხს, მაგრამ არასწორად ესმის საქართველოს დამოკიდებულება სააკაშვილის მიმართ.
„მინდა, პრესამ ნახოს, რა ხდება: უკრაინის მოქალაქის საჯარო წამება. მე არ განვიხილავ კითხვას, რატომ დააკავეს საქართველოს ყოფილი პრეზიდენტი, რა შედეგები მოჰყვება ამას საქართველოს პოლიტიკასა და დემოკრატიაზე. ეს მათი შიდა საკითხია. მე ვსაუბრობ უკრაინის მოქალაქის, მიხეილ სააკაშვილის დაკავებაზე, რომელსაც ყოველდღიურად საჯაროდ აწამებენ. და ვფიქრობ, მათი მიზანი მისი მოკვლაა“, – შეაჯამა ზელენსკიმ.