რაჭაში, სტიქიის ზონაში ინტენსიური სამძებრო ოპერაცია გრძელდება. როგორც მიმდინარე სამუშაოებთან დაკავშირებით საგანგებო სიტუაციების მართვის სამსახურის ხელმძღვანელმა თემურ მღებრიშვილმა განაცხადა, სამძებრო სამუშაოების არეალი გაფართოვდა.
გარდა ამისა, თემურ მღებრიშვილი ამბობს, რომ გაოძიება უკვე დაწყებულია და ის ორი მუხლით მიმდინარეობს.
“სამძებრო არეალი ფართოვდება, ამ წუთებში მიმდინარეობს კონკრეტული სამუშაოები ამ მიმართულებით. მთელი ღამის განმავლობაში გრძელდებოდა კონკრეტულ ლოკაციებზე საძიებო სამუშაოები. ამ დილით, გვაქვს ასეთი ინფორმაცია, რომ კონკრეტულად იმ პერიმეტრზე, სადაც ეს ცხედრები იქნა ნაპოვნი, ვპოულობთ პირად ნივთებს, ტანისამოსს და ვიმედოვნებთ, როგორც დავგეგმეთ, სწორი მიმართულებით მივდივართ. ორი მუხლით არის საქმე აღძღული, თუმცა გამოძიების მიმდინარეობის დროს შეიძლება გადაკვალიფიცირდეს მუხლები. ასე რომ, გამოძიება, რა თქმა უნდა, დაწყებულია, – ამბობს თემურ მღებრიშვილი.
ამ დროისთვის არსებული ინფორმაციით, სტიქიის ზონაში დაკარგულ 16 ადამიანს ეძებენ. 18 დაღუპულიდან 14 იდენტიფიცირებულია. ზოგ შემთხვევაში კი დნმ-ის ანალიზის პასუხს ელოდებიან.
