გიორგი გაჩეჩილაძე
გუშინ აშშ-ის ეროვნული საკალათბურთო ასოციაციის ფლეი-ოფის სტადიის პირველ მეოთხედფინალურ შეხვედრაში ზაზა ფაჩულიას „გოლდენ სტეიტმა“ კლუბ „იუტას“ უმასპინძლა. შეხვედრა მასპინძლების უპირატესობით წარიმართა და მათი გამარჯვებით დასრულდა – 106:94.
საქართველოს ეროვნული გუნდის ცენტრალურმა თავდამსხმელმა მოედანზე 14 წუთი გაატარა. მის ანგარიშზე 10 ქულა, 1 მოხსნა და 1 ბლოკია. ხვალ გუნდები ერთმანეთს კიდევ შეხვდებიან. შეგახსენებთ რომ სერია ოთხ მოგებამდე გრძელდება.
გუშინ წარმატებული დღე გამოდგა ქართველი ფეხბურთელები ლუკა ზარანდიასა და საბა კვირკველიასთვის.
ლუკა ზარანდიას კლუბი „არკა“ პოლონეთის თასის ფინალში „ლეხს“ ხვდებოდა. მატჩის ძირითადი დრო ფრედ – 0:0 დასრულდა. დამატებით დროში „არკამ“ ორი უპასუხო გოლის გატანა მოახერხა და ქვეყნის თასს დაეუფლა. თავი ქართველმა ფეხბურთელმაც გამოიჩინა, რომელმაც 112-ე წუთზე მეტოქის კარი დალაშქრა და ანგარიში 2:0 გახადა.
საბა კვირკველიას მოსკოვის „ლოკომოტივი“ რუსეთის თასის გადამწყვეტ შეხვედრაში, ქალაქ სოჭში კლუბ „ურალს“ ხვდებოდა. „ლოკომოტივმა“ მეტოქე 2;0 დაამარცხა და თასსაც დაეუფლა. საინტერესოა რომ „ურალის“ რიგებში შეუცვლელად ითამაშა ჯიმი ტაბიძემ. აღსანიშნავია რომ მთავარმა მსაჯმა შეხვედრას სამი წუთი დაამატა. ის ის იყო თამაშის დასრულების ნიშანი უნდა მიეცა რომ ორივე გუნდის ფეხბურთელებმა მოედანზე ხელჩართული ჩხუბი წამოიწყეს. წესრიგის დამყარებას რამდენიმე წუთი მოუნდა. შედეგად, არბიტრმა „ლოკომოტივისა“ და „ურალის“ ორ-ორი ფეხბურთელი მინდვრიდან გააძევა. საბედნიეროდ მათ რიცხვში ქართველები არ აღმოჩნდნენ.
გუშინვე კახი ცხადაძის „ქაირათი“ ყაზახეთის პირველობის მორიგ ტურში კლუბ „ასტანას“ ესტუმრა. დაძაბული მატჩი ფრედ – 1:1 დასრულდა. ყაზახეთის ჩემპიონატს 23 ქულით „ასტანა“ ლიდერობს, ცხადაძის „ქაირათი“ კი 19 ქულით მეორე მესამე ადგილებს კლუბ „ორდაბასისთან“ ერთად იყოფს.
თუ გუშინდელი დღე წარმატებული გამოდგა ჩვენი ფეხბურთელებისთვის, ამას ვერ ვიტყვით ქართველ ფალავნებზე. სერბეთის ქალაქ ნოვი სადში ევროპის პირველობა დაიწყო თავისუფალ და ბერძნულ-რომაულ ჭიდაობაში. გუშინ ასპარეზობა თავისუფალი სტილის ფალავნებმა დაიწყეს. სამწუხაროდ ოთარ გოგავა და დავით მარსაგიშვილი მედლებს ვერ შესწვდნენ. პირველმა მე-15-ე ადგილი დაიკავა, მარსაგიშვილმა კი მეხუთე.
დღეს ნოვი სადში ზურაბ იაკობაშვილი და ელიზბარ ოდიკაძე იჭიდავებენ. იმედია, ნავსი გატყდება და საქართველოს დელეგაციის ანგარიშზე პირველი მედლები გამოჩნდება.
გუშინ ევროპის ჩემპიონთა ლიგის პირველ ნახევარფინალურ შეხვედრაში მადრიდის „რეალმა“ თანაქალაქელ „ატლეტიკოს“ უმასპინძლა. მატჩი „სამეფო გუნდის“ დიდი უპირატესობით წარიმართა და მათი დამაჯერებელი გამარჯვებით დასრულდა – 3:0. სამივე გოლი პორტუგალიელი კრიშტიანო რონალდოს ანგარიშზეა. განმეორებითი მატჩი ერთი კვირის შემდეგ გაიმართება.
გუშინ „მანჩესტერ იუნაიტედის“ შვედმა ფეხბურთელმა ზლატან იბრაგიმოვიჩმა ტრავმირებულ მუხლზე ოპერაცია გაიკეთა. ოპერაცია მოთამაშეს აშშ-ის პიტსბურგის საუნივერსიტეტო კლინიკაში გაუკეთეს. ფეხბურთელი რეაბილიტაციას იქვე გაივლის.
არგენტინიდან მოსული ინფორმაციით ამ ქვეყნის საფეხბურთო ნაკრების მთავარ მწვრთნელად ალბათ მაინც კლუბი „სევილიას“ ამჟამინდელი დამრიგებელი ხორხე სამპაოლი დაინიშნება. ამის შესახებ ოფიციალური განცხადება არგენტინის ფეხბურთის ასოციაციის პრეზიდენტმა კლაუდიო ტაპიამ გააკეთა.
დღეს ევროპის ჩემპიონთა ლიგის კიდევ ერთი ნახევარფინალური შეხვედრა გაიმართება. ფრანგული „მონაკო“ იტალიურ „იუვენტუსს“ უმასპინძლებს. რასაკვირველია ფავორიტად სტუმართა გუნდია მიჩნეული, მაგრამ მიმდინარე სეზონში ახალგაზრდული შემადგენლობით მოასპარეზე „მონაკო“ ავტორიტეტებს არ უშინდება და საკუთარ გულშემატკივრებს არაერთი სასიამოვნო სიურპრიზი უკვე მოუწყო.
