ვოლოდიმირ ზელენსკის პარტიამ „სლუგა ნაროდა” („ხალხის მსახური”) კორონავირუსის პანდემიის პირობებში ჩატარებულ ადგილობრივ არჩევნებში კატასტროფული მარცხი განიცადა, წინასწარმა შედეგებმა აჩვენა, რომ უკრაინაში მმართველმა გუნდმა ხალხის მხარდაჭერა დაკარგა. სამაგიეროდ „ოპოზიციურმა პლატფორმამ – სიცოცხლისათვის” უკრაინის სამხრეთ-აღმოსავლეთ უმეტეს რეგიონებში გამარჯვება მოიპოვა.
უკრაინაში ადგილობრივი არჩევნები 25 ოქტომბერს გაიმართა, კორონავირუსის პირობებში კი აქტივობა ძალიან დაბალი იყო – 37%. უკრაინის ცესკომ ხმების 100% უკვე დათვალა, რაც 10,556,621 ბიულეტინს შეადგენს.
შედეგების თანახმად, ამომრჩევლების ხმები რამდენიმე პარტიაზე გაიყო, რომელთაგანაც ყველაზე დიდი მხარდაჭერა პარტიას „ოპოზიციური პლატფორმა – სიცოცხლისათვის” აქვს. რაც შეეხება ზელენსკის „სლუგა ნაროდას”, მისი შედეგები პრაქტიკულად კატასტროფულია – პარტიამ არათუ ვერცერთ ქალაქში მერის არჩევნები ვერ მოიგო, არამედ მისი წარმომადგენელი მერების არჩევნებზე მეორე ტურშიც კი ვერსად გავიდა.
რაც შეეხება არდგილობრივ საკანონმდებლო ორგანოებს, ზელენსკის პარტიის შედეგები აქაც საკმაოდ მოკრძალებულია – ყველაზე კარგ შემთხვევაში მხოლოდ მე-3 ადგილი.
რაც შეეხება უკრაინის დედაქალაქს, მერის ასარჩევად აქ მეორე ტური გაიმართება. პირველ ტურში ამჟამინდელმა მერმა ვიტალი კლიჩკომ პარტია „უდარით” ხმათა 45% აქვს, მას მეორე ტურში მეტოქეობას „ოპოზიციური პარტია – სიცოცხლისათვის” წარმომადგენელი ალესანდრე პოპოვი გაუწევს, რომელსაც ხმების 8% აქვს.
რამ განაპირობა უკრაინის პრეზიდენტის პარტიის ასეთი კრახი არჩევნებზე და რატომ შემცირდა ზელენსკის რეიტინგი ასე კატასტროფულად პრეზიდენტად მისი არჩევიდან წელიწადნახევარში?
როგორც „საქართველოს პოლიტიკის ინსტიტუტის” ხელმძღვანელი კორნელი კაკაჩია „რეზონანსთან” ამბობს, ზელენსკის პარტიის რეიტინგის ვარდნა ქვეყანაში მიმდინარე მოვლენებთანაა დაკავშირებული, თუმცა ასევე მიიჩნევს, რომ ეს არჩევნები ამ პოსტსაბჭოთა ქვეყანაში დემოკრატიისკენ გადადგმული მნიშვნელოვანი ნაბიჯია.
„ზოგადად ეს მიმდინარე მოვლენებთან, მათ შორის მძიმე სოციალურ-ეკონომიკურ პირობებთან და პანდემიის მდგომარეობასთანაა დაკავშირებული. ასევე კონფლიქტთან დაკავშირებით მოლოდინი იყო, რომ ზელენსკის ხელისუფლება რაღაცას შეცვლიდა და ასევე არ დაგვავიწყდეს ისიც, რომ ზელენსკი თავისი პარტიით არ მოსულა ხელისუფლებაში, მას მხარი პერსონალურად დაუჭირეს და ეს პარტია ისეთი ძლიერი არასდროს არ იყო.
„ამაში კარგი ისაა, რომ სხვა პოსტსაბჭოთა ქვეყნებისგან განსხვავებით, ზელენსკის არჩევნები არ გაუყალბებია, რაც ძალიან მნიშვნელოვანია და მთლიანობაში ეს დემოკრატიისთვის ცუდი არაა. მართვა ცოტა გართულდება. იქ პრორუსული პარტიებიცაა, მაგრამ დემოკრატიისთვის ეს შესაძლოა წინ გადადგმული ნაბიჯი იყოს,” – განაცხადა კაკაჩიამ.
უკრაინელებს ამ არჩევნებით დეპუტატები უნდა აერჩიათ 22 რეგიონალურ საბჭოში, 381 საკრებულოში, 136 საოლქო საბჭოში, 1000-ზე მეტ სოფლის საბჭოში, აგრეთვე უნდა აერჩიათ ქალაქების უმეტესობის მერები, სოფლებისა და დაბების რწმუნებულები.
