სამტრედიის მუნიციპალიტეტის სოფელ ზემო ნოღაში, შანიძეების უბანში მეწყერი ჩამოწვა, რომლის შედეგადაც სოფლის შიდა საავტომობილო გზა მწყობრიდან გამოვიდა. სამი ოჯახი გარე სამყაროსგან არის მოწყვეტილი.
მეწყრული მოვლენების შედეგად დაზარალდა ზემო ნოღელი ვლადიმერ შანიძე: ,,ამ უბანში სულ ხუთი ოჯახი ვცხოვრობთ. დაახლოებით, 20 დღის წინ მოსული კოკისპირული წვიმის შედეგად დაიძრა მეწყერი და შიდა სასოფლო გზა დაგვიზიანა. მოშლილია ჩემი ღობე და მოთხრილია ხე- ნარგავები. ერთი- ორი გაწვიმება და ჩემი საკარმიდამო ნაკვეთით შოთა შანიძის ეზოში აღმოვჩნდები.”
საავტომობილო გზის ჩამოშლილი მასა გზის მეორე მხარეს მცხოვრებ შოთა შანიძის ეზოს მიადგა, მეწყრული პროცესების შედეგად მწყობრიდან გამოვიდა შოთა შანიძის საკარმიდამო ნაკვეთიც, მოთხარა თხილის, ვაშლის, ტყემლის და კომშის ხეები. გარე სამყაროს მოწყდა ალექსანდრე შანიძის ექვს სულიანი ოჯახი.
დიასახლისის, მარინა შანიძის თქმით, ბავშვები სკოლაში და ბაღში ვეღარ დაჰყავთ:
,, მყავს ავადმყოფი მეუღლე, ღმერთმა არ დაგვაჭირვოს სასწრაფო და სახანძრო ბრიგადები, თორემ გამოსავალი არ გვექნება. მთელი წლის სარჩო ქუჩაში გვიყრია. ყანიდან მოტანილი სიმინდი და ჩალა მეზობლის ღობესთან გვაქვს მიყრილი.”
,, ვმუშაობ საქართველოს რკინიგზაში. სამი კვირის წინ დილის 7 საათზე მანქანით მივდიოდი სამსახურში, მივადექი გზას და გზა წაღებული დამხვდა”, – გვიყვება ზემო ნოღელი აკაკი შანიძე. მოსახლეობის პრობლემა ცნობილია ადგილობრივი ხელისუფლებისთვის. ტოლების თემში მერის წარმომადგენელი, გია სიხარულიძე შეხვდა მოსახლეობას და ადგილზე გაეცნო პრობლემას.
,, ხელშეკრულება უკვე გაფორმებულია, ამ გზაზე ჩატარდეს აღდგენითი სამუშაოები”,_ ამბობს სიხარულიძე.
,,როდესაც პროექტს წარმოგვიდგენენ, ამის შემდეგ მოვითხოვთ სამუშაოების შესყიდვაზე გამარტივებული წესით დოკუმენტაციის შესყიდვაზე ნებართვას და ამის შემდეგ გავაფორმებთ ხელშეკრულებას მშენებელთან,”- გვითხრა სამტრედიის მუნიციპალიტეტის მერიის ზედამხედველობის სამსახურის უფროსმა, ზურაბ გოგიამ.
ავტორი
