პოპულარული ფრანგი მსახიობის, ჟერარ დეპარდიეს წინააღმდეგ გამოძიება გაუპატიურების მუხლით კვლავ გრძელდება. გასული წლის მაისში მსახიობმა საფრანგეთის სასამართლოს გამოძიების შეწყვეტის მოთხოვნით მიმართა, თუმცა უშედეგოდ – სასამართლოს გადაწყვეტილებით მსახიობის წინააღმდეგ გამოძიება უწინდებურად გრძელდება.
დეპარდიეს წინააღმდეგ გაუპატიურებისა და სექსუალური ძალადობის ბრალდებით გამოძიება ჯერ კიდევ 2018 წელს დაიწყო, თუმცა 2019 წელს ის მტკიცებულებათა ნაკლებობის გამო შეწყდა. გამოძიება 2020 წელს კვლავ განახლდა.
მსახიობმა სავარაუდო დანაშაული 2018 წელს ჩაიდინა. დაზარალებულმა ქალმა თავდაპირველად ანონიმურობა არჩია, თუმცა მოგვიანებით საზოგადოებას საკუთარი ვინაობა გაუმხილა. მსახიობმა შარლოტ არნოლდმა განაცხადა, რომ 2018 წლის აგვისტოში დეპარდიემ ორჯერ გააუპატიურა.
ჯერჯერობით საქმე გამოძიების ეტაპზეა. გადაინაცვლებს თუ არა საქმე სასამართლოში განხილვის ეტაპზე, ჯერჯერობით უცნობია.
ავტორი: გიორგი გაჩეჩილაძე
