ზოდიაქოს ნიშნების შეთავსება

ზოდიაქოს ნიშნები ბუნების ოთხი სტიქიის მიხედვით იყოფა, როგორიცაა: მიწის, წყლის, ჰაერისა და ცეცხლის სტიქიები.

სანამ სტიქიების შეთავსებაზე ვისაუბრებთ, შეგახსენებთ, რომელ სტიქიას განეკუთვნება ზოდიაქოს ესა თუ ის ნიშანი. ცეცხლის სტიქიას ეკუთვნიან ვერძი, ლომი და მშვილდოსანი; წყლის სტიქიას – კირჩხიბი, თევზები, ღრიანკალი; მიწის სტიქიას – თხის რქა, კურო, ქალწული; ჰაერის სტიქიას – სასწორი, მერწყული, ტყუპები.

ცეცხლი (მამაკაცი) – ცეცხლი (ქალი)

მათი ურთიერთობის დასაწყისში საკმაოდ ძლიერი ემოციური თუ სექსუალური კავშირი ვითარდება, თუმცა შემდგომ ეს კავშირი ხშირად ირღვევა. ამის ერთ-ერთი ძირითადი მიზეზი ისაა, რომ „ცეცხლოვანი“ ფსიქოტიპები ძნელად ეგუებიან გარემო პირობებს და მათ შეცვლას საკუთარი შეხედულებებისა და საჭიროების მიხედვით ცდილობენ. თუ ეს ცვლილებები კრახით სრულდება, ისინი საკუთარ თავში იკეტებიან, იწყება გაუცხოება, მუდმივი უკმაყოფილება და კონფლიქტები გარშემომყოფებთან, საბოლოო ჯამში კი ეს კონფლიქტები დამანგრეველ სახეს იღებს.

მსგავს სიტუაციაში ერთადერთი გამოსავალი არსებობს: უმჯობესია, თუ პარტნიორები მოქმედების სფეროებს გაინაწილებენ და ერთმანეთის დამოუკიდებლობას არ შეეხებიან.

ცეცხლი (მამაკაცი) – წყალი (ქალი)

მიუხედავად იმისა, რომ ამ სტიქიების წარმომადგენლებს შორის ძლიერი ემოციური კავშირი არსებობს, მათი ურთიერთობა ძალიან დაძაბული და კონფლიქტურია, განსაკუთრებით ვერძსა და ღრიანკალს შორის. ეს კავშირი ერთ-ერთი ყველაზე რთულია. ქმრისგან მაქსიმალურად დიდი გამძლეობაა საიჭრო იმისათვის, რომ ცოლის წვრილმან ჭირვეულობებს ყურადღება არ მიაქციოს, ცოლი კი არაერთ სურვილს აისრულებს, თუ ჭკუას მოუხმობს და მეუღლესთან ურთიერთობაში გონიერების საზღვრებს არ გასცდება.

ცეცხლი (მამაკაცი) – ჰაერი (ქალი)

ეს სტიქიები არაჩვეულებრივად ავსებენ ერთმანეთს და მათ შორის კარგი, მეგობრული ურთიერთობა მყარდება. საბოლოო ჯამში ცოლი მშვენივრად უძღვება საოჯახო საქმეებს, ქმარი კი სამსახურითა და სახლის მოწყობით შემოიფარგლება.

ამ სტიქიების წარმომადგენლებს შორის ქორწინების ერთ-ერთი ყველაზე სერიოზული პრობლემა სუსტი ემოციური კავშირია. ისინი საოცრად დამოუკიდებლები და თვითმყოფადნი არიან, ამიტომ, თუ ურთიერთკავშირი არც ისე ძლიერია, შეიძლება გაუცხოვებამ იჩინოს თავი. ურთიერთობის შესანარჩუნებლად მამაკაცმა განსაკუთრებული ყურადღება უნდა გამოიჩინოს მეუღლის მიმართ. ქალი კი ირგვლივ მყოფ მამაკაცებთან ურთიერთობისას ფრთხილად უნდა იყოს, რადგან მისმა უკომპლექსობამ და თავისუფლების სიყვარულმა შესაძლოა ქმრის ეჭვიანობა გამოიწვიოს. სხვათა შორის, ცეცხლოვანი ფსიქოტიპი ყოველთვის უფრო ეჭვიანია სხვა სტიქიების წარმომადგენლებთან შედარებით.

ცეცხლი (მამაკაცი) – მიწა (ქალი)

ამ სტიქიების წარმომადგენლებს შორის ურთიერთობა განსაკუთრებით სტაბილურია იმ შემთხვევაში, თუ მეუღლეებმა ოცდაათი წლის ასაკს გადააბიჯეს. ამ დროს ცოლების მოთხოვნები ლოგიკური და კონკრეტულია და მამაკაცებისთვისაც არც ისე რთულია მათი შესრულება, თუმცა კარგი იქნება, თუ ცეცხლოვანი ფსიქოტიპი თავად იკისრებს ოჯახის მფარველობას და, ამასთანავე, აუცილებლად ისწავლის საკუთარი მოთხოვნების მსუბუქი ფორმით გამოხატვას, რათა თავი აარიდოს მეუღლის მხრიდან საყვედურებსა და ბრალდებებს.

ჰაერი (მამაკაცი) – ცეცხლი (ქალი)

ამ შემთხვევაში თავისი ნებისყოფა და ხასიათის სიმტკიცე ცოლმა უფრო მსუბუქად უნდა გამოამჟღავნოს, რადგან ემოციური დისჰარმონიის მიმართ ჰაერი ძალზე მგრძნობიარეა. მამაკაცებს კი გრძნობების უფრო მკვეთრად გამოხატვა მოეთხოვებათ.

ჰაერი (მამაკაცი) – წყალი (ქალი)

ოჯახური ცხოვრებისთვის ამ სტიქიების წარმომადგენლებს შორის კავშირი საკმაოდ ჰარმონიულია, თუმცა შესაძლოა გარკვეული პრობლემები შეიქმნას სექსუალური თვალსაზრისით. ქმარი მუდმივად განსაკუთრებულ ყურადღებას უნდა იჩენდეს ცოლის მიმართ, თორემ შეიძლება ქალმა იეჭვიანოს, ქალი-წყალი კი ყოველთვის ტაქტიანად უნდა მოექცეს ქმრის ნათესავებს. ამავე დროს, კარგად უნდა ახსოვდეს, რომ მამაკაცი-ჰაერი ძნელად იტანს ეომციურ დატვირთვას და გადაღლის შემთხვევაში გამორიცხული არ არის, სიმშვიდე სხვა ქალთან ეძებოს.

ჰაერი (მამაკაცი) – ჰაერი (ქალი)

მათ შორის შესანიშნავი ურთიერთდამოკიდებულებაა, თუმცა  ჰარმონიულ ურთიერთობას ძლიერი ემოციური კაშვირი არ ჰყოფნის. აუცილებელია ამ სტიქიების წარმომადგენლებს მეგობრების საერთო წრე ჰყავდეთ, წინააღმდეგ შემთხვევაში ორივე მეუღლე თავისი ცხოვრებით იცხოვრებს. კარგი იქნება, თუ ცოლსაც და ქმარსაც ერთი პროფესია ექნებათ, ან ერთმანეთს სამსახური დააკავშირებთ. მათ კავშირს აუცილებლად გაამყარებს ბავშვის დაბადება. სხვათა შორის, გასათვალისწინებელია, რომ აღზრდასა და განათლების დონეში დიდმა განსხვავებამ შესაძლოა ურთიერთობისას მნიშვნელოვანი პრობლემები წარმოქმნას.

ჰაერი (მამაკაცი) – ცეცხლი (ქალი)

ამ სტიქიების წარმომადგენლებს შორის ურთიერთობები საკმაოდ მშვიდია. ემოციური დაახლოება თანდათანაობით ხდება და მათი კავშირი წლებთან ერთად მყარდება. აი, რატომ არის აუცილებელი, რომ ქორწინებიდან 2-3 წლის მანძილზე ცოლ-ქმარმა ერთმანეთის მიმართ ნდობა არ დაკარგოს. ქორწინების სიმყარე ბევრადაა დამოკიდებული მამაკაცზე, რომელმაც ყურადღება არ უნდა მოადუნოს მეუღლის მიმართ, ცოლს კი უნდა ახსოვდეს, რომ არავითარ შემთხვევაში არ შეეცადოს მამაკაცი-ჰაერის ჩიხში მიმწყვდევას.

წყალი (მამაკაცი) – ცეცხლი (ქალი)

მათ შორის კავშირი საკმაოდ მყარია, თუმცა ამ ორი ფსიქოტიპის ურთიერთობა ყოველთვის რთულ ემოციურ ატმოსფეროს ქმნის. ორივენი საკმაოდ მგრძნობიარენი არიან ერთმანეთის განწყობილების მიმართ და ძალზე ფაქიზად რეაგირებენ: ნებისმიერი რამ, რაც ერთ-ერთ მათგანს აწუხებს ან უხარია, სწრაფად გადადის პარტნიორზე და, ამდენად, ქორწინების პირველ ხანებში ასეთი ოჯახი საკმაოდ მყარია. კრიზისი ყველაზე ხშირად ქორწინების მესამე ან მეშვიდე წლისთავზე იწყება. განსაკუთრებით მწვავეა ქორწინების მეშვიდე წლისთავზე დაწყებული კრიზისი, რასაც შეიძლება განქორწინება მოჰყვეს. ცოლ-ქმარი მდგომარეობის სწრაფად განმუხტვას უნდა შეეცადონ და თავი აარიდონ ურთიერთობის ხანგრძლივ გარკვევას.

წყალი (მამაკაცი) – ჰაერი (ქალი)

ამ შემთხვევაში მამაკაცი ცოლისგან მაქსიმალურ ყურადღებას მოითხოვს. იეჭვიანებს, მაგრამ, ამავე დროს, თავადაც ყოველთვის მზად იქნება მაქსიმალური ყურადღების გამოსაჩენად. იგი სიამოვნებით დაუდგება მეუღლეს გვერდით ნებისმიერ საქმიანობაში.

საუკეთესო ვარიანტია, თუ მამაკაცი ცოლს ზედმეტად არ გადაღლის თავისი მოთხოვნებით, ცოლმა კი ზომაზე მეტად არ უნდა გაუსვას ხაზი თავის დამოუკიდებლობას, ბოროტად არ უნდა გამოიყენოს მეუღლის ნდობის ფაქტორი. ასეთი ოჯახის მყარ საფუძველს ბავშვები წარმოადგენენ.

წყალი (მამაკაცი) – მიწა (ქალი)

როგორც წესი, წყლის ფსიქოტიპი საკმაოდ რთულად იტანს მიწის ფსიქოტიპის ფლეგმატურ ხასიათს, ამდენად, ურთიერთობაც საკმაოდ რთულია. პირველ ხანებში ეს თავისებურებები გარკვეულ გაუგებრობებს ქმნის, განსაკუთრებით იმ შემთხვევაში, როცა წყვილი ძალიან ახალგაზრდაა. წლების მატებასთან ერთად ამ სტიქიათა წარმომადგენლების კავშირი უფრო მყარი ხდება.

მათ განსაკუთრებული სირთულეები ელით ემოციურ და სექსუალურ ურთიერთობებში. ეჭვიანობა ურთიერთობის საერთო ფონს ქმნის, ამიტომ მეუღლეებს შორის ნდობის ფაქტორი ყველაზე მნიშვნელოვანია. მათ ქორწინებას მყარ საფუძველს, პირველ რიგში, ბავშვები უქმნიან.

წყალი (მამაკაცი) – წყალი (ქალი)

მათ იდეალური კავშირი აქვთ ემოციური კუთხით, ერთმანეთის სახით სტაბილურ ემოციურ დასაყრდენს იძენენ და მატერიალური კუთხითაც მამაკაცი ყოველთვის უზრუნველყოფს მეუღლეს, ხშირად მის მაგივრადაც აგვარებს სხვადასხვა სახის პრობლემას. მიუხედავად ამისა, არც თუ იშვიათად მათ შორის გარკვეული დისჰარმონია არსებობს სექსუალური თავსებადობის კუთხით, თუმცა ხასიათებით იმდენად ჰარმონიულად ავსებენ ერთმანეთს, რომ ხშირად ეს პრობლემაც უმტკივნეულოდ გვარდება.

მიწა (მამაკაცი) – ცეცხლი (ქალი)

ასეთი ურთიერთკავშირისას განსაკუთრებული ყურადღება სექსუალურ სფეროს უნდა მიექცეს. მიწა-მამაკაცისთვის ძალზე მნიშვნელოვანია ცხოვრებისეული სტაბილურობა და წესრიგი. ცოლმა მამაკაცს საშუალება უნდა მისცეს, რომ მან „საკუთარი სამყაროს“ შექმნა მოახერხოს. როგორც წესი, ასეთი ქორწინების დროს ქმარი არასოდეს ზღუდავს მეუღლის დამოუკიდებლობას და საშუალებას აძლევს სათანადო დრო და ყურადღება დაუთმოს საკუთარ ინტერესებს.

მიწა (მამაკაცი) – წყალი (ქალი)

დრო უფრო და უფრო ამყარებს ისედაც მტკიცე კავშირს, თუმცა ქორწინების პირველ ხანებში მცირეოდენი გაუგებრობებიც მოსალოდნელია.

მიწა-მამაკაცის მთავარი ამოცანაა ოჯახში მტკიცე მატერიალური საფუძველი შექმნას, მეუღლემ კი აქტიური მონაწილეობა უნდა მიიღოს მის საქმიანობაში. ქალს ოჯახური სიმყუდროვის შექმნა ევალება მიწა-მამაკაცისთვის, რადგან მისთვის ოჯახური გარემო განსაკუთრებით მნიშვნელოვანია.

ამ კავშირში ურთიერთობის სიმყარე და ჰარმონიულობა დიდად არის დამოკიდებული ქალზე. მან არასოდეს უნდა გამოიყენოს ქმრის წინააღმდეგ ისეთი იარაღი, როგორიცაა მუქარა განქორწინების შესახებ, რადგან მიწის ფსიქოტიპი მსგავს ფრაზებს ზედმეტად სერიოზულად აღიქვამს.

მიწა (მამაკაცი) – ჰაერი (ქალი)

ამ სტიქიათა წარმომადგენლებს შორის ურთიერთობა მამაკაცისგან ემოციების გამოხატვასა და ცოლის მიმართ განსაკუთრებული ყურადღების გამოჩენას მოითხოვს. მიწისა და ჰაერის ურთიერთკავშირი მატერიალურ მხარეს დიდ ყურადღებას არ ანიჭებს. ასეთი ქორწინების დროს მთავარი ემოციური ურთიერთობაა.

მიწა (მამაკაცი) – მიწა (ქალი)

ასეთ ქორწინებამდე განსაკუთრებით მნიშვნელოვანია წყვილს შორის ხანგრძლივი ნაცნობობა. მათ კავშირში დიდ როლს ერთნაირი ჩვევები და საერთო ინტერესები ასრულებს. წვრილმანების გამო წარმოქმნილი კონფლიქტი შესაძლოა დიდხანს გაგრძელდეს, მაგრამ თუკი ურთიერთობებში მსგავსი კონფლიქტები არ არსებობს, მაშინ ქორწინება უდავოდ წარმატებულად უნდა ჩაითვალოს. მთავარია, არ იჩქარონ, რადგან ამ სტიქიის წარმომადგენელი მამაკაციც და ქალიც ნელ-ნელა, თანდათანობით მიიწევენ წარმატებისა და ჰარმონიული ურთიერთობებისკენ.