ოპოზიცია 2020 წლის 31 ოქტომბრის არჩევნების შედეგებს გაყალბებულად მიიჩნევს და პარლამენტში შესვლაზე უარს ამბობს. ოპოზიციური პარტიები რიგგარეშე არჩევნების ჩატარებას ითხოვენ შეცვლილი საარჩევნო ადმინისტრაციის პირობებში, ნაწილი პლებისციტს. ასევე, მათი მოთხოვნა არის პოლიტიკური პატიმრების გათავისუფლება.
ქვეყანაში საკმაოდ არეული დღის წესრიგისა და საპარლამენტო არჩევნებიდან წამოსული პროტესტის ფონზე „გურია ნიუსი“ რიგითი ლანჩხუთელების პოზიციით დაინტერესდა, თუ რას ფიქრობენ ისინი არსებულ პოლიტიკურ ვითარებასთან დაკავშირებით.
მოქალაქეთა ერთ ნაწილს გამართლებულად მიაჩნია ოპოზიციის პროტესტი და ბოიკოტის რეჟიმში ყოფნა, ზოგი კი მათ დესტრუქციულობაში ადანაშაულებს და პარლამენტში შესვლისკენ მოუწოდებს. ნაწილი კი საერთოდ უარყოფითადაა განწყობილი პოლიტიკოსების მიმართ.
„ზოგი პლებისციტს ითხოვს, ზოგი – არჩევნებს, ზოგიც რას ითხოვს ვერ გაიგებ. ტელევიზორის ყურება შეგზარდება ადამიანს ამათი შემყურე. პოლიტიკოსებს რომ უსმინო ქვეყანასა და ხალხზე ზრუნვაში ათენ-აღამებენ, თუმცა, ტყუილია ეს ყველაფერი. ოპოზიციას ხელისუფლებაში მოსვლა ეჩქარება, ხელისუფლებას კი არ ეთმობა მმართველობა. ქვეყანაში იმდენი მოუგვარებელი პრობლემა გვაქ და გადაფარა ამ პოლიტიკურმა ვითარებამ. რა დროს კინკლავი და იწილო-ბიწოლოა შემოდი-არ შემოვალ. დასხდნენ, მოილაპარაკონ და პრობლემის მოგვარების გზები მოძებნონ. როდემდე შეიძლება ყოფნა ასე დაპირისპირებასა და უმოქმედობაში, გვენგრევა ქვეყანა თავზე, კაციშვილი პატრონი არაა. გამოდგება ოპოზიცია და ლანძღავს მთავრობას უშვერი სიტყვებით, იქეთ ჩამწკრივდებიან ხელისუფლების წარმომადგენლები და რას არ იძახიან ოპონენტების მისამართით. ამათი შემყურე კიდე კაი დღეში ვართ, წესით კინჭისკვრით უნდა გაყარო ყველა“, _ ამბობენ პოლიტიკასა და პოლიტიკოსებზე განაწყენებული ლანჩხუთელები.
თამაზ ურუშაძე:-„თქმა არ უნდა, რომ ოპოზიცია უნდა შევიდეს პარლამენტში და მარტო მე არ ვფიქრობ ასე“.
„შევიდენ პარლამენტში და იქედან გააკეთონ რაც საჭიროა ქვეყნის წინ წასვლისა და განვითარებისთვის. დაიღალა ხალხი ამდენი დაპირისპირებით, ძალიან ცუდ შედეგს მოიტანს ეს“-დარეჯან მურვანიძე.
კობა ფირცხალაიშვილი: „დესტრუქციულ ძალებს რა უნდა პარლამენტში, ქუჩაში ყოფნას ამჯობინებენ.
ლანჩხუთში მოქალაქეთა ნაწილის შეფასებით, დღევანდელ პარლამენტს მუშაობის გაგრძელების მორალური უფლება არა აქვს- „ დღევანდელ პარლამენტს მუშაობის გაგრძელების მორალური უფლება არა აქვს, რადგანაც ხალხმა ხმა „ოცნებას“ ბიძინა ივანიშვილის და გიორგი გახარიას ხათრით მისცა. არჩევნების შემდეგ რა აღმოჩნდა?! ბიძინა ივანიშვილმა საერთოდ მივდივარ პოლიტიკიდანო, გახარიაც წავიდა და ხალხს შერჩა ისინი, რომლებიც შესაძლოა საერთოდ არ აერჩია, რომ არ ყოფილიყო ბიძინა და გახარია, ანუ მანიპულირება მოხდა ხალხის არჩევანის.”
ნანული კუკულაძე: „პოლიტიკოსი არ ვარ, გადაჭრით ვთქვა და ვამტკიცო რამე, მარა, რასაც ვხედავ და მესმის, მე ოპოზიციის მხარეს ვარ.“
