ლანჩხუთში ეგნატე ნინოშვილის სახელობის სახლ-მუზეუმის მეცნიერ-თანამშრომელი,ფილოლოგიის მეცნიერებათა დოქტორი ზოია ტუღუში ამბობს, რომ უკრაინის გამარჯვება საქართველოს გამარჯვებაცაა და მზადაა, ამისთვის თავადაც გაიღოს წვლილი. იგი გმობს რუსულ აგრესიას და საზოგადოებას მოუწოდებს, შესაძლებლობის ფარგლებში დაეხმარონ მეგობარ უკრაინას.
“ჩვენ უდიდესი განსაცდელის წინაშე ვიდექით 2008 წელს. ყველა ჩვენგანმა გამოვიარეთ შიშის, შეძრწუნების, სასოწარკვეთისა და უდიდესი ტკივილების მძაფრი განცდები. ვის, თუ არა ჩვენ, კარგად გვესმის უკრაინის დღევანდელი განსაცდელი. როცა ჩვენ გვიჭირდა, უკრაინა გვერდით გვედგა. მისი პრეზიდენტი თბილისში იმყოფებოდა იმ დროს, როცა საფრთხე სულ ახლოს იყო. იგი თავის სიცოცხლეს სწირავდა ჩვენი ქვეყნის თავისუფლებას. ნუთუ, შეიძლება, ჩვენ სხვანაირად მოვიქცეთ? შეიძლება საქართველოს პრემიერ-მინისტრის მსგავსად გულგრილნი დავრჩეთ და ვთქვათ: ეს ჩვენი საქმე არ არის, ომი უკრაინაშიაო?!
მჯერა, თქვენ ასე არ ფიქრობთ! დღეს ჩვენი ბედი უკრაინის ბედს გადაჯაჭვია. მისი გამარჯვება ჩვენი გამარჯვება იქნება. ღმერთმა ნუ ქნას და მისი დამარცხება _ ჩვენი წელში გატეხა. მოგმართავთ, ვისაც რისი შეძლება გაქვთ, დავეხმაროთ გმირ უკრაინას. ზოგი შეძლებს სისხლის ჩაბარებას მამაცი უკრაინელი მეომრებისთვის, ზოგი -_ ფულად დახმარებას, ზოგიც მოხალისეების სახით უკრაინის ომში ჩაებმება.
გთხოვთ, ვიზრუნოთ იმაზე, რომ როგორმე შევაგროვოთ თანხა და უკრაინის დახმარების ფონდში გადავრიცხოთ, რისი შესაძლებლობაც გვექნება. გვახსოვს,, ალბათ, სომხეთში მიწისძვრის დროს მთელი საქართველო ფეხზე დადგა და მეზობელ ქვეყანას დახმარების ხელი გაუწოდა სერიოზული თანხის შეგროვებით, სისხლის დიდი რაოდენობის მობილიზებით, ადამიანური რესურსებით… პირადად მე, მზად ვარ, 1000 ლარი გადავრიცხო უკრაინის დახმარების ფონდში (ეს ფული წიგნის გამოცემისთვის მქონდა შეგროვილი, მაგრამ ახლა უფრო მნიშვნელოვანია უკრაინის გვერდით დგომა).
ღმერთმა დალოცოს თავისუფლებისთვის თავგანწირული გმირი უკრაინელი ხალხი, რომლის მისია დღეს არა მარტო თავისი ქვეყნის, არამედ ევროპისა და პოსტსაბჭოთა ქვეყნების გადარჩენაა “წითელი საბჭოთა” პუტინიზმისგან.
გვჯერა, “ძალა ერთობაშია”! იგი დაამარცხებს რუსულ ფაშიზმს და მოიტანს აზროვნების თავისუფლებას, რომელზედაც აიგება ნამდვილი დემოკრატია თითოეულ თავისუფლების მოყვარე ქვეყანაში. დიდება უკრაინას! არა _ რუსულ აგრესიას!” _ ასე აფიქსირებს მიმდინარე მოვლენებთან დაკავშირებით საკუთარ პოზიციას ზოია ტუღუში.
