„მმართველ პარტიაში ვეღარ იპოვით ადამიანს, რომელიც იმ ფასეულობებს განასახიერებს, რომლის გამოც 2012 წელს ხალხმა ხმა “ქართულ ოცნებას” მისცა. დღეს „ქართულ ოცნებაში“ აბსოლუტურად გაუგებარი ხალხი იმყოფება, რომელთაგან 2012 წლის შემდეგ ზოგი ბუჩქებიდან გამოძვრა, ზოგი კი “ოცნებაში“ პირდაპირ მიხეილ სააკაშვილის ბანაკიდან გადაბარგდა“, _ აღნიშნა “გურია ნიუსთან“ პოლიტიკის ექსპერტმა გია ხუხაშვილმა.
ხუხაშვილი საქართველოს პრეზიდენტის მიერ ბოლო დროს გაკეთებულ სკანდალურ განცხადებებსაც აფასებს და აღნიშნავს, “სალომე ზურაბიშვილის მიერ ქვეყნის ინტერესებზე პერმანენტული საბოტაჟის მოწყობა, მისი ქრონიკული სიბრიყვის გამოხატულებაა“.
_ ბატონო გია, საქართველოს პრეზიდენტი სალომე ზურაბიშვილი „ამერიკის ხმისთვის“ მიცემულ ინტერვიუში იმ საკითხის შესახებ ალაპარაკდა, რაც ჯერჯერობით, ამერიკასა და საქართველოს შორის მოლაპარაკების დონეზეც კი არ განიხილება. საუბარია, საქართველოში ამერიკული ბაზების განლაგების შესახებ, რასაც ზურაბიშვილი ეწინააღმდეგება და ამბობს, რომ აღნიშნული რუსეთისა და ტერორისტული მოძრაობების მიერ პროვოკაციად იქნება აღქმული. გასაგებია, რომ საქართველო თავისივე უსაფრთხოების უზრუნველყოფის მიზნით, ოკუპანტი ქვეყნის გაღიზიანებას უნდა მოერიდოს, მაგრამ აღნიშნული ხომ არ ნიშნავს იმას, რომ ქართულმა მხარემ რუსეთის დღის წესრიგით იცხოვროს და მაგალითად, ნატოსა და ევროკავშირში ინტეგრაციაზეც უარი განაცხადოს?
_ სალომე ზურაბიშვილის აღნიშნული განცხადება, მინიმუმ, სიბრიყვე, მაქსიმუმ კი ქვეყნის ინტერესების საბოტაჟია. ფაქტობრივად, საქართველოს პრეზიდენტი ამბობს, თუ ვინმე მოგვერევა ბაბია დავუძახოთო. თუ ზურაბიშვილი ასე ფიქრობს, მაშინ ნატოსა და ევროკავშირში საქართველოს ინტეგრაცაზე რატომ საუბრობს?! თუ საქართველოს პოლიტიკური ამოცანა არის ის, რომ რუსეთი არ გავაღიზიანოთ, მაშინ ოკუპანტ ქვეყანას პირდაპირ ბაბაია დაუძახოს და ამით დაამთავროს. ზურაბიშვილის მიერ ქვეყნის ინტერესებზე ასეთი პერმანენტული საბოტაჟის მოწყობა, მისი ქრონიკული სიბრიყვის გამოხატულებაა.
_ “საერთო სასამართლოების შესახებ“ კანონპროექტი, რომელიც უზენაეს სასამართლოში მოსამართლეთა უვადოდ განმწესების პროცედურებს ითვალისწინებს, მმართველმა პარტიამ მესამე მოსმენით მიიღო. როგორ ფიქრობთ, სალომე ზურაბიშვილი, რომელიც განხილვის პროცესში კანონპროექტის შეფასებისგან მუდმივად თავს იკავებდა, „ქართული ოცნების“ ინტერესებს დაგააბიჯებს და აღნიშნულზე ვეტოს დადების უფლებას გამოიყენებს?
_სალომე ზურაბიშვილი აღნიშნულ კანონპროექტს ვეტოს არ დაადებს. გვახსოვს, ამ ქალბატონმა პრესკონფერენცია ჩაატარა, სადაც, ფაქტობრივად, უმრავლესობის მიერ მომზადებულ კანონპროექტის შესახებ ირაკლი კობახიძის მიერ დაწერილი ტექსტებით ისაუბრა. საზოგადოებას არ უნდა ჰქონდეს ილუზია იმისა, რომ ზურაბიშვილი სახელმწიფოებრივად სწორ ნაბიჯს გადადგამს. პრეზიდენტმა აღნიშნულ კანონპროექტს მხოლოდ იმ შემთხვევაში შეიძლება დაადოს ვეტო, თუ ამ დღეებში „ქართულ ოცნებაზე“ ფეხების ბაკუნით შურს იძიებს.
_მედიაში აქტიურად ვრცელდება ინფორმაცია იმის შესახებ, რომ თანაგუნდელებმა “ოცნების“ ლიდერი ბიძინა ივანიშვილი ვადამდელი საპარლამენტო არჩევნების ჩატარების შესახებ დაითანხმეს. იმის გათვალისწინებით, რომ „ქართული ოცნების“ იმიჯზე დრო უარყოფითად მოქმედებს, რამდენად სავარაუდოა, მმართველი პარტიის გადარჩენის მიზნით, შემოდგომაზე ვადამდელი საპარლამენტო არჩევნები დაინიშნოს?
_პოლიტტექნოლოგიურად შემოდგომაზე არჩევნების ჩატარება „ქართული ოცნებისთვის“ მომგებიანია, რადგან დეგრადაციის პროცესი გრძელდება და ფაქტია, რომ 2020 წელს მმართველი პარტია ბევრად უარეს მდგომარეობაში აღმოჩნდება. ვადამდელი საპარლამენტო არჩევნების ჩატარება „ქართული ოცნების“ ინტერესებში უნდა იყოს, მაგრამ ასეთი მასშტაბური ნაბიჯის გადადგმას გამბედაობა სჭირდება. „ქართული ოცნების“ წევრებისთვის კი პარლამენტის კედლებსა და მინისტრის კაბინეტებში გატარებული ყოველი წუთი სულზე უტკბესია. არჩევნებამდე დარჩენილი ერთი წელი მმართველი პარტიის წევრებისთვის ბევრად უფრო მეტია, ვიდრე ქართული სახელმწიფოს ინტერესები, შესაბამისად, ვადამდელი საპარლამენტო არჩევნების ჩატარება ნაკლებად მოსალოდნელია.
_“ქართულ ოცნებიდან“ დეპუტატთა გადინების პროცესი გრძელდება. პარტია ამჯერად უმრავლესობის ყოფილმა წარმომადგენელმა ლევან კობერიძემ დატოვა და შესაძლოა, შემდეგი, ვინც პარტიას დატოვებს, ბიძინა გეგიძე და ალექსანდრე ერქვანია იყოს, რომლებიც ქვეყანაში მიმდინარე პროცესებთან დაკავშირებით „ოცნების“ ჩატში მოწოდებული გზავნილებისგან სრულიად განსხვავებულ შეხედულებებს ახმოვანებენ. თქვენი მოსაზრებით, ამ ეტაპზე რამდენად შორს წავა “ოცნებიდან“ დეპუტატთა გადინების პროცესი?
_ბუნებრივია, პარტიიდან დეპუტატთა გასვლის პროცესი გაგრძელდება. „ქართული ოცნება“ „ოცნებისგან“ დაიცალა. მმართველ პარტიაში ვეღარ იპოვით ადამიანს, რომელიც იმ ფასეულობებს განასახიერებს, რომლის გამოც 2012 წელს ხალხმა ხმა ამ პარტიას მისცა. დღეს მმართველ პარტიაში აბსოლუტურად გაუგებარი ხალხი იმყოფება, რომელთაგან 2012 წლის შემდეგ ზოგი ბუჩქებიდან გამოძვრა, ზოგი კი “ოცნებაში“ პირდაპირ მიხეილ სააკაშვილის ბანაკიდან გადაბარგდა.
