რა ზიანი შეიძლება მიადგეს მმართველი გუნდის მხარდაჭერილი საპრეზიდენტო კანდიდატის, სალომე ზურაბიშვილის განცხადებებით საქართველოს საერთაშორისო ასპარეზზე? ,,გურია ნიუსთან“ საუბრისას, პოლიტოლოგი ხათუნა ლაგაზიძე მიიჩნევს, რომ “ის მესიჯები, რომლებსაც სალომე ზურაბიშვილი ისვრის, შეუძლებელია მივაწეროთ მის ქარაფშუტობას, როგორც ცდილობენ, რომ წარმოაჩინონ“.
ლაგაზიძის აზრით, საქართველო რუსეთის გავლენის სივრცეში ექცევა, თუმცა ჯერ კიდევ ინარჩუნებს შანსს, რომ დასავლური სამყაროს ნაწილი გახდეს.
_ ის, რაც დღეს ხდება არის ორკესტრირებული შეტევა რუსეთის მხრიდან საქართველოს წინააღმდეგ. რუსეთი ხედავს, რომ ამერიკის შეერთებულ შტატებს ჩვენთვის არ სცალია. ეკონომიკის სრული ჩამოშლის მოლოდინში, რუსეთს სჭირდება სამეზობლოში გამარჯვების მოპოვება, რითაც სოციალურ-ეკონომიკურ კრიზისს დროებით მაინც გადააგორებს.
საქართველო ექცევა რუსეთის გავლენის სივრცეში, თუმცა ჯერ კიდევ ინარჩუნებს შანსს, რომ დასავლური სამყაროს ნაწილი გახდეს. ის მესიჯები, რომლებსაც ზურაბიშვილი ისვრის, შეუძლებელია მივაწეროთ მის ქარაფშუტობას, როგორც ცდილობენ, რომ წარმოაჩინონ.
მარია ზახაროვას განცხადება წავიკითხე, სადაც წერია, რომ ლუგარის ლაბორატორიაში სამხედრო კვლევები იწარმოება და ამ ინფორმაციას იგორ გიორგაძე აწვდის რუსეთის საგარეო საქმეთა სამინისტროს. რა ხელი აქვს იგორ გიორგაძეს ლუგარის ლაბორატორიასთან?!
უმძიმეს ფაზაში შევდივართ _ ის, რომ საინფორმაციო და ჰიბრიდულ ომში ვიყავით, ამაზე საუბარი უკვე დაგვიანებულია. ვფიქრობ, ცალკე აღებული არ უნდა განვიხილოთ ზახაროვასა და სალომე ზურაბიშვილის, ერთი შეხედვით, ქარაფშუტული განცხადებები. ეს არის გადამწყვეტი ბრძოლა საქართველოსთვის. ეს არის რეფერენდუმი, რომელიც ჩვენ ყველამ უნდა ჩავატაროთ 28 ოქტომბერს.
_ რას გულისხმობთ? ზურაბიშვილს რუსეთის დაკვეთის შესრულებაში ადანაშაულებთ?
_ ვფიქრობ, ის, რაც ხდება, არის რუსეთისთვის გადამწყვეტი ბრძოლა საქართველოს საკუთარ სივრცეში დასაბრუნებლად. არის თუ არა ამასთან პირდაპირ კავშირში ზურაბიშვილი, ამაზე ვერ ვისაუბრებ. მისი პირით ტესტავენ, რამდენად მზად არის საქართველო რუსეთის საოკუპაციო ჯარების მისაღებად.
_ სტრასბურგის სასამართლო 2008 წლის აგვისტოს ომზე საქართველოს სარჩელს განიხილავს, სასამართლომ უნდა დაადგინოს, რომელი მხარე არის დამნაშავე. არსებობს საფრთხე, რომ სტრასბურგმა ზურაბიშვილის განცხადებები ჩვენი ქვეყნის ინტერესების საწინააღმდეგოდ გამოიყენოს?
_ რა თქმა უნდა; სრული აბსურდი ხდება. არსება, რომელიც ქვეყნის პრეზიდენტობისთვის ემზადება, გამოდის და იძახის, რომ ჩვენმა ქვეყანამ დაიწყო ომი საკუთარი ხალხის წინააღმდეგ. მომავალი მთავარსარდალი, რომელიც ამბობს, რომ მისმა სამხედროებმა და გენერლებმა საკუთარი ხალხი დაბომბეს, არის კაპიტულანტი.
_ თქვენი აზრით, მმართველი პარტია ვერ აცნობიერებს, თუ რა ზიანის მომტანია საპრეზიდენტო კანდიდატის ამგვარი განცხადებები?
_ პოლიტიკაში არსებობს “სასარგებლო იდიოტის“ ცნება. ამ შემთხვევაში, შეიძლება “სასარგებლო იდიოტის“ როლს ასრულებდეს ზურაბიშვილი. ვფიქრობ, რომ მმართველი პარტიისა და სალომე ზურაბიშვილის ინტერესი ერთ რამეში ემთხვევა: მმართველ პარტია ალბათ ცდილობს, რომ ამ გზით მიხეილ სააკაშვილის მიიყვანოს ჰააგის სასამართლოში, როგორც ომის დამწყები პრეზიდენტი. მმართველი პარტიის მიზანი უფრო ეს არის, ვიდრე რუსული გეგმის ნაწილად ყოფნა, მაგრამ ცალსახაა, რომ ეს რუსულ გეგმას ემთხვევა.
_ როგორ ფიქრობთ, მმართველი პარტიის მხარდაჭერის მიუხედავად, ასეთი განცხადებების ფონზე, არჩევნებში გამარჯვების რა შანსი აქვს სალომე ზურაბიშვილს?
_ ჩვენ არ ვიცით საზოგადოების რეალური განწყობა რა არის. სწორედ ამ განწყობის დატესტვას ახდენს დღეს რუსეთი და რა შედეგსაც მივიღებთ, კიდეც ვიმსახურებთ იმ შედეგს. ცხადი გახლავთ ის, რომ ყველაფერი პასუხობს რუსულ სცენარს.
რამდენიმე დღის წინ გავრცელდა ინფორმაცია, რომ სომხეთმა სირიაში შენაერთი გაგზავნა. რუსულ სამხედრო ოპერაციაში ყოფილი საბჭოთა ქვეყნის მონაწილეობა უპრეცედენტოა. ეს სიგნალია იმისა, როგორ ცდილობს რუსეთი რეგიონში გააქტიურებას.
ფაქტობრივად, დღეს მთლიანად ჩვენზეა დამოკიდებული რას მოვიმოქმედებთ, შევინარჩუნებთ თუ არა დამოუკიდბელობას იმ დოზით, რა დოზითაც გვაქვს, _ მიიჩნევს ხათუნა ლაგაზიძე.
