ამ დროისთვის ცნობილია, რომ „საერთაშორისო გამჭვირვალობა – საქართველოს“ რეგიონული ოფისების ხელმძღვანელი ზვიად ქორიძე ბათუმში, გამოკითხვაზე იმყოფება. როგორც ცნობილია, სასტუმრო „შერატონში“ მას თავს დაესხა დიმიტრი სამხარაძე.
ზვიად ქორიძე ჟურნალისტებთან საუბრის დროს იხსენებს თუ როგორ მოხდა მასზე თავდასხმა. “სასტუმრო “შერატონის” ფოიეში ვიჯექი. უცბათ, რამდენიმე მაგიდასთან დავინახე ადამიანები სვამდნენ. დავინახე, რომ აქ, პირდაპირ როიალთან მოვიდა თანმხლებ ქალბატონთან ერთად დიმიტრი სამხარაძე. მერე მივიდა მაგიდასთან, მერე წამოვიდა ჩემთან და მითხრა: “მე გიცნობ, ხარ ზვიად ქორიძე”. დაიწყო “ნაციონალური მოძრაობის” მიმართ გინება, რაზეც არანაირი რეაქცია არ მქონია. წავიდა, მივიდა კარებთან, მბრუნავი კარია, დაბრუნდა, შემოვიდა, “რა თქვი ბიჭო, შენ ოცნებაზე, ვის აგინებო”. დაიწყო გინება, სავარძელზე ფეხების რტყმა. უცბათ, დავინახე, რომ იმ მაგიდიდან აიშალნენ ადამიანები, 10-12 კაცი იქნებოდა, თვლა არ დამიწყია, დაიძრნენ ჩემსკენ. როდესაც მივუახლოვდი მისაღების მაგიდას და დაცვას ვთხოვე დახმარება, დაცვა გამოვარდა. მოახერხეს, შეეცადნენ, რომ ისინი გაეცილებინათ ჩემგან. იყო მუქარა, გინება. დაცვამ გამიყვანა.“
ზვიად ქორიძე უკვე იმყოფებოდა კლინიკაში და არსებული ინფორმაციით, მას მცირე დაზიანებები აქვს.
საქართველოს სახალხო დამცველი გამოეხმაურა „შერატონში“ მომხდარ თავდსხმას. მის განცხადებაშ ვკითხულობთ:საქართველოს სახალხო დამცველი გმობს გიორგი გახარიაზე და ჟურნალისტ ზვიად ქორიძეზე თავდასხმის ფაქტებს და მოუწოდებს საგამოძიებო სამსახურებს, მოახდინონ პასუხისმგებელი პირების იდენტიფიცირება და სწრაფად და სრულფასოვნად ჩაატარონ ყველა საგამოძიებო და საპროცესო მოქმედება, მათ შორის, მოპოვებულ იქნას ვიდეო ჩანაწერები, გამოიკითხონ მოწმეები და სხვა. სახალხო დამცველი მნიშვნელოვნად მიიჩნევს აღნიშნულ ფაქტებზე მყისიერ რეაგირებას, რათა პოლიტიკოსებსა და ჟურნალისტებზე თავდასხმა არ გახდეს წახალისებული”, – აღნიშნულია სახალხო დამცველის განცხადებაში.
სოციალურ ქსელში ზვიად ქორიძის ამბავზე ინფორმაციას მისი მეუღლე, ფსიქოლოგი, მაია ცირამუა ავრცელებს: „ყველას დიდი მადლობა მხარდაჭერისთვის. ზვიადი კარგადაა. დიტო სამხარაძე, თანმხლებ პირებთან ერთად დაესხა თავს. ეს მოხდა მაშინ, როცა ტელეფონზე ვსაუბრობდით. ყველაფრის შემსწრე ვარ. მესმოდა რა და როგორ მოხდა. პოლიციას შეუძლია გამომკითხოს, როგორც ერთ -ერთი მოწმე.“ – წერს მაია ცირამუა.
ფოტო publika.ge
