ინფორმაციას ამის შესახებ სააგენტო „ინტერპრესნიუსი“ ავრცელებს. მოგელაძის მიერ თანამდებობის დატოვების კონკრეტული მიზეზი, ჯერჯერობით, უცნობია.
წინასაარჩევნოდ და არჩევნების პერიოდში ნათია მოგელაძის სახელი მთელი საქართველოსთვის ცნობილი გახდა „ქართული ოცნების“ შემომწირველთა მასობრივი დაჯარიმებით.
მისი მოღვაწეობა კარგად არის ცნობილი „გურია ნიუსისთვისაც“. მოგელაძის სამსახურისადმი საჯარო ინფორმაციის მოთხოვნით მიწერილი ათეულობით წერილი, იშვიათი გამონაკლისის გარდა, მუდმივად უპასუხოდ რჩებოდა. ნათია მოგელაძეს საკუთარი თანამშრომლების ვინაობაც კი გასაიდუმლოებული ჰქონდა.
მიუხედავად არაერთი უკანონობისა და დარღვევისა, რომელსაც აღნიშნული სამსახური ახორციელებდა და რის შესახებაც არაერთი ადვოკატი საჯაროდ საუბრობდა, ნათია მოგელაძე ამ დრომდე ფინანსური მონიტორინგის სამსახურის უფროსად რჩებოდა.
არ არის გამორიცხული მისი საკუთარი სურვილით წასვლა პირდაპირ კავშირში იყოს აუდიტის სამსახურში საპარლამენტო კომისიის შეცვლასთან. საპარლამენტო კომისია უკვე რამდენიმე თვეა, რაც აუდიტი სამსახურის 2012 წლის საქმიანობას ამოწმებს და მათ შორის, მოგელაძის სამსახურისაც. პირველადი ინფორმაცია შემოწმების შედეგებზე, დაახლოებით, 10 დღეში გახდება ცნობილი. საპარლამენტო კომისია, რომლის ხელმძღვანელი პარლამენტარი ნოდარ ებანოიძე გახლავთ, საკანონმდებლო ორგანოს ანგარიშს მაისის ბოლოს წარუდგენს. აქვე უნდა აღვნიშნოთ, რომ ნათია მოგელაძე აქამდე საკმაოდ „ომახიანად“ გამოიყურებოდა და ის თათბირებზე კორპორატიული ქეიფის მოწყობის ინიციატივითაც გამოდიოდა.
ამის შესახებ „გურია ნიუსი“ ჯერ კიდევ 2012 წლის 3 ნოემბერს წერდა სტატიაში _ „რა მოითხოვა მოგელაძემ თათბირზე და როდის შეამოწმებს პარლამენტი კონტროლის პალატას. გთავაზობთ ამონარიდს სტატიიდან:
“გურია ნიუსის” ინფორმაციით, აუდიტის სამსახურში (ყოფილ კონტროლის პალატაში), “ნაციონალური მოძრაობა” ძალების მობილიზაციას ახდენს და უწყებას საკუთარი კადრებით აკომპლექტებს. მართალია, ეს კადრები საპარლამენტო არჩევნებში „ნაციონალური მოძრაობის“ დამარცხებული მაჟორიტარები არიან, მაგრამ ამას ხელი შეუშლია იმისთვის, რომ აუდიტის სამსახურში ხელმძღვანელ პოზიციებზე დაენიშნათ. რა დამსახურებისთვის, ჯერჯერობით, უცნობია.
ჩვენი წყაროს ცნობით, კონტროლის პალატის საბიუჯეტო დეპარტამენტის უფროსად, “ნაციონალური მოძრაობის” ყოფილი დეპუტატი და 2012 წლის საპარლამენტო არჩევნებში ზესტაფონში დამარცხებული მაჟორიტარობის კანდიდატი ბეჟან ბუცხრიკიძე დანიშნეს, რომელიც, წლების განმავლობაში, კონტროლის პალატის შემმოწმებელ საპარლამენტო კომისიას ხელმძღვანელობდა. ასევე, ცვლილება განხორციელდა აუდიტის სამსახურის ადმინისტრაციულ დეპარტამენტშიც, რომლის უფროსად ასევე “ნაცმოძრაობის” დამარცხებული მაჟორიტარი ჩუღურეთის რაიონში, ანდრო ალავიძე დაინიშნა.
ადმინისტრაციის ყოფილი უფროსი, ირენა მელუა კი ქუთაისის კონტროლის პალატაში გადაუყვანიათ.
აუდიტის სამსახურის პრესსამსახურის უფროსი, ფატი მამიაშვილი, როგორც ყოველთვის, “გურია ნიუსთან” კომენტარს არ აკეთებს. კითხვის _ ადასტურებდა თუ არა ის ამ საკადრო ცვლილებებს_ მოსმენის შემდეგ, მამიაშვილმა გაგვიცხადა, რომ უკვე სამუშაო საათები ამოწურული იყო და გვირჩია, ორშაბათს შევხმიანებოდით. აუდიტის სამსახურის„ ორშაბათი“ კი, ჩვენი გამოცდილებით, მინიმუმ, 6 თვე შეიძლება, გაგრძელდეს. რაც შეეხება სამუშაო საათებს, შეგახსენებთ, რომ ოპოზიციური პარტიების დაჯარიმებისას, ეს უწყება სადღეღამისო რეჟიმში მუშაობდა.
ასევე, წყაროს ცნობით, ამ საკადრო ცვლილებებს, წინ უძღოდა გასული თვის ბოლოს აუდიტის სამსახურში ჩატარებული თათბირი, რომელიც გენერალურმა აუდიტორმა, ლაშა თორდიამ თავის კაბინეტში ჩაატარა. თათბირს, სხვა თანამშრომლებთან ერთად, პარტიების ფინანსური მონიტორინგის სამსახურის უფროსი, ნათია მოგელაძეც ესწრებოდა, რომელსაც მეტად საინტერესო კითხვა გასჩენია ლაშა თორდიასთან, _ კორპორატიული ქეიფი როდის მოვაწყოთო?
როგორც წყარო იუწყება, თორდიას, რომელიც თურმე ძალიან კარგ ხასიათზე იყო იმ დღეს, უპასუხია, _ მალე მოვაწყობთო. მთავარი აუდიტორი, რომელიც, კანონის თანახმად, ამ თანამდებობაზე 2017 წლამდეა დანიშნული, როგორც ჩანს, ჯერ წასვლას არ ფიქრობს“.
როგორც ჩანს, მოგელაძე აუდიტის სამსახურის კორპორატიულ ქეიფზე ვერ მოხვდება…
