2012 წლის 12 დეკემბერს გამოვიდა საქართველოს მთავრობის დადგენილება N463 “საქართველოს სახელმწიფო საშინაო ვალის პრობლემათა შემსწავლელი სახელმწიფო კომისიის შექმნის შესახებ” საქართველოს მთავრობის 2004 წლის 15 ნოემბრის №108 დადგენილებაში ცვლილების შეტანის თაობაზე. დადგენილებას ხელს პრემიერ-მინისტრი ბიძინა ივანიშვილი აწერს,
აღნიშნული დადგენილების პირველი მუხლის მეორე ნაწილში ვკითხულობთ: “ეთხოვოთ საქართველოს პარლამენტის საფინანსო-საბიუჯეტო კომიტეტის თავმჯდომარეს, საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარეს, გენერალურ აუდიტორს, ქალაქ თბილისის მერს, საქართველოს ეროვნული ბანკის პრეზიდენტსა და სსიპ – საქართველოს სტატისტიკის ეროვნული სამსახურის აღმასრულებელ დირექტორს, რომ წევრის სტატუსით მონაწილეობა მიიღონ სახელმწიფო საშინაო ვალის პრობლემათა შემსწავლელი სახელმწიფო კომისიის მუშაობაში. კომისიის უფლებამოსილების ვადა განისაზღვრა 2014 წლის 1 იანვრამდე.
აღნიშნულ კომისიას მუშაობა ანაბრების თემაზეც მოუხდება, რადგან მისი ნაწილი ქვეყანას შიდა ვალად აქვს აღებული, რაც იმას ნიშნავს, რომ გასტუმრების ვალდებულებაც ეკისრება.
მთავრობის წევრები აცხადებენ, რომ ამ საკითხზე მათ მუშაობა უკვე დაწყებული აქვთ. საქართველოს ეკონომიკისა და მდგრადი განვითარების მინისტრის გიორგი კვირიკაშვილის განცხადებით, ყველაფერი დაზუსტებული ციფრების მიხედვით გადაწყდება.
_ ბატონო გიორგი, ბოლო პერიოდში, საბჭოთა ანაბრების თემა ძალიან აქტუალური გახდა. დაზარალებული მეანაბრეები სამართლიანობის აღდგენის იმედით არიან. თქვენი მთავრობა ამ მიმართულებით თუ მუშაობს?
_ მე შემიძლია გითხრათ დაზუსტებით, რომ საბჭოთა ანაბრების თემასთან დაკავშირებით ფინანსთა სამინისტრო აქტიურად მუშაობს. უფრო კონკრეტულად რომ გითხრათ, ფინანსთა სამინისტრო მუშაობს ციფრების დაზუსტებაზე. აქედან გამომდინარე, იმის მიხედვით თუ რა ციფრები დაზუსტდება, განისაზღვრება რისი შესაძლებლობა ექნება ბიუჯეტს და რა ვადაში შეძლებს ამ ვალდებულების შესრულებას. ამ ყველაფრის შემდეგ შეგვეძლება ალბათ, რომ მივიღოთ გადაწყვეტილება.
_ ბატონმა დავით ონოფრიშვილმა “გურია ნიუსთან” განაცხადა, რომ იმ თანხებით რომლებიც “ნაციონალურმა მოძრაობამ” გაფლანგა, განსაკუთრებით კი პრივატიზაციის დროს, თავისუფლად შეიძლებოდა ანაბრების გასტუმრება. ეთანხმებით მას?
_ ბატონ დავითს ვეთანხმები იმაში, რომ ბევრი ფული გაიფლანგა, მაგრამ რამდენად ეყოფოდა ეს ანაბრებს, არ ვიცი. ჩემთვის ეს ციფრი დაზუსტებულად არ არის ცნობილი.
