“მთავრობის დამოკიდებულება ისეთია, რომ ისინი არ კი განმიხილავენ პრეზიდენტად. დამოუკიდებელი დღის აღლუმიც გააუქმეს ჩემს გამო. დამოუკიდებლობის დღის ღონისძიებებზე მიწვეულიც კი არ ვარ. ბოიკოტი გამომიცხადეს,”_ განაცხადა პრეზიდენტმა.
მიხეილ სააკაშვილის თქმით, ჭორვილაში “სოციალ-დემოკრატიული იდეების გახორციელება ხდება და ილია ჭავჭავაძეც სწორედ სოციალ-დემოკრატებმა მოკლეს”.
ეს, პრეზიდენტმა მიხეილ სააკაშვილმა ილიას სახელობის უნივერსიტეტის სტუდენტებთან შეხვედრისას განაცხადა. როგორც თსუ-ს სტუდენტებთან, ეს შეხვედრაც დახურული იყო და მას 100-მდე სტუდენტი ესწრებოდა. ილიაუნის რექტორმა გიგი თევზაძემ და ადმინისტრაციის უფროსმა ეს შეხვედრებისთვის განკუთვნილი დარბაზის სიმცირით ახსნეს.
შეხვედრიდან გამოსული სტუდენტები “გურია ნიუსთან” საუბარში ამბობენ, რომ შეხვედრაზე საკმაოდ მწვავე კითხვები დაისვა. მათ შორის ყველაზე მწვავე, ჭორვილას შესახებ კითხვა აღმოჩნდა; პრეზიდენტს საკმაოდ მწვავე რეაქცია ჰქონდა, როცა ერთ-ერთმა სტუდენტმა პრეზიდენტს კითხა:
_ ჭორვილაში ბევრი რამ გაკეთდა, თუმცა ახლა აღარ მოგწონთ… მახსოვხართ, “ვარდების რევოლუციის” დროს, ბურჯანაძესა და ჟვანიასთან ერთად როგორ იდექით ჭორვილაში და ივანიშვილთან შეხვედრას ელოდით…
_ ეტყობა, “ვარდების რევოლუციის” დროს თქვენ ძალიან პატარა იყავით ან არასწორი ინფორმაცია მოგაწოდეს… ტყუიხართ, როცა ამას ამბობთ… ბოდიში, მაგრამ გული მერევა ჭორვილას იდეაზე; არა როგორც სოფლის, არამედ იმაზე, რომ შეიძლება ვიღაცამ გითხრას ხელი არ გაანძრიო, მაცივარს გიყიდი, მევე გაგივსებ, ოღონდ ხმა არ ამოიღოო… მე არ მინდა საქართველო იქცეს ისეთ წარმონაქმნად, სადაც ხალხს ეუბნებიან, ოღონდ ხმა არ ამოიღოთ, დივანზე წამოწექით, პირები გააღეთ იმის სანაცვლოდ, რომ ხმა არ ამოიღოთ…
ყველაფერს გავაკეთებ იმისთვის, რომ ჩემი ქვეყანა ასეთი არ იყოს…
ჩვენ იდეოლოგია “ჭორვილა” გვეუბნება იმას, რომ საბანკო კრედიტი არ უნდა დავაბრუნოთ, ილია ჭავჭავაძე კი გვეუბნებოდა _ საბანკო კრედიტი უნდა დააბრუნო…
პრეზიდენტის თქმით, სწორედ ასეთი იდეოლოგიის ადამიანებმა მოკლეს ილია ჭავჭავაძე და ჭორვილაში სწორედ სოციალ-დემოკრატიული იდეების გახორციელება ხდება…
