ამის შესახებ განცხადება გასულ კვირას პარლამენტის ვიცე-სპიკერმა მანანა კობახიძემ გააკეთა.
უზენაესი სასამართლოს თავმჯდომარე კოტე კუბლაშვილი მიიჩნევს, რომ თუ მოსამართლე უვადოდ, 65 წლის ასაკამდე არ დაინიშნება თანამდებობაზე, ეს იქნება დარტყმა სასამართლოს დამოუკიდებლობაზე, რომელსაც სრულყოფისათვის მხოლოდ ეს კომპონენტი აკლია.
“მინდა ყველას შევახსენო, რომ სასამართლოს რეფორმის დაწყებიდან ერთ-ერთი ყველაზე მთავარი საკითხი იყო მოსამართლეთა უვადოდ, 65 წლის ასაკამდე დანიშვნა. ეს არის ერთ-ერთი მთავარი გარანტია სასამართლოს და მოსამართლეთა დამოუკიდებლობისათვის. ჩვენ მივაღწიეთ იმას, რომ 2007 წლიდან დაიწყო მოძრაობა ამ მიმართულებით, ხელისუფლებამ გაითვალისწინა ეს და კონსტიტუციაში ამჟამად შეტანილია მუხლი, რომლის მიხედვითაც, ახალი მოსამართლეები 2013 წლის პრეზიდენტის არჩევნების შემდეგ დაინიშნებიან უვადოდ. მაგრამ ხელისუფლების ერთ-ერთმა წარმომადგენელმა გამოხატა თავისი დამოკიდებულება ამ საკითხის მიმართ და თქვა, რომ შესაძლებელია ეს იქნეს ამოღებული და შეჩერებული. მინდა გითხრათ, რომ ეს იქნება ძალიან მცდარი ნაბიჯი და შემაფარხებელი სასამართლოს დამოუკიდებლობისთვის. ყველაფერი, რაც კი საჭიროა დამოუკიდებლობის პირობების შესაქმნელად, უკვე შექმნილია. რა თქმა უნდა, გარკვეული გაუმჯობესებები შეიძლება, მაგრამ მთავარი რაც დაგვრჩა, რათა მოსამართლეებს ვუთხრათ, რომ ყველა პირობა გაქვთ დამოუკიდებლობისათვის, ეს არის მათი უვადო დანიშვნა. ამაზე უარის თქმა, რა მოსაზრებაც არ უნდა ჰქონდეს ვინმეს, ჩემი აზრით არის პირდაპირი დარტყმა სასამართლოს დამოუკიდებლობაზე.თითქოს, ახლა არ არის ამის დროო და მსგავსი არგუმენტები… სწორედ ახლა არის ამის დრო, რომ მივიღოთ მართლაც ყველა გარანტიით აღჭურვილი სასამართლო და მოსამართლეები,”_ უთხრა კოტე კუბლაშვილმა “გურია ნიუსს”.
მოქმედი მოსამართლეების უვადოდ გადანიშვნასთან დაკავშირებით იუსტიციის მინისტრის მოადგილე სანდრო ბარამიძის და ვიცე-სპიკერ მანანა კობახიძის მოსაზრებები ერთმანეთს ემთხვევა.
“გურია ნიუსთან” ერთ-ერთ ინტერვიუში ბარამიძე აცხადებდა, რომ მოქმედ მოსამართლეთა უვადოდ გადანიშვნა ნაადრევია, რადგან საზოგადოებაში სასამართლო ხელისუფლებისა და ცალკეულ მოსამართლეთა მიმართ დიდი უკმაყოფილება არსებობს.
“ეს არის სრულიად ობიექტური კრიტიკა არა მარტო ქვეყნის შიგნით, არამედ ქვეყნის გარეთაც. დაუშვებელია ყველა იმ მოსამართლის უვადოდ გადანიშვნა,რომელმაც ძალიან ხშირ შემთხვევაში არასამართლიანი და არაობიექტური გადაწყვეტილება მიიღო. ამ ადამიანებისთვის რეზერვირება ადგილების რათა სამუდამოდ გამწესდნენ მოსამართლეებად, ჩემი აზრით, არასწორია. იუსტიციის სამინისტრო მუშაობას ასრულებს მართლმსაჯულების ხარვეზების დამდგენი სახელმწიფო კომისიის თაობაზე და მინიმუმ იქამდე, სანამ კომისია არ დაასრულებს მუშაობას, ვინმეს გამწესება უვადოდ, ძალზე ნაადრევია.”
დაახლოებით 2 თვის წინ უზენაესი სასამართლოს თავმჯდომარე კოტე კუბლაშვილი “გურია ნიუსთან “აცხადებდა, რომ მოსამართლის უვადოდ დანიშვნა არ ნიშნავს მათ სრულ იმუნიტეტს, თუმცა ხარვეზების დამდგენი კომისიის გადაწყვეტილების საფუძველზე არც ერთი მოსამართლის გაშვებას არ აპირებდა.
“ზოგს ჰგონია, რომ მოსამართლის უვადოდ დანიშვნა ნიშნავს ყველანაირ იმუნიტეტს, მათ შორის სისხლის სამართლის დანაშაულისგან იმუნიტეტს. ეს მათი არასწორი წარმოდგენის შედეგია. მე ვფიქრობ, რომ როდესაც მათ ავუსხნით რას ნიშნავს მოსამართლის უვადოდ დანიშვნა, ეს ნიშნავს უფრო მეტ სტაბილურობას, მე ვიტყოდი 100 პროცენტიან სტაბილუბას სისტემაში. ეს ნიშნავს იმას, რომ ვინმე არ ჩაერიოს მათ საქმიანობაში და მეორეს მხრივ, თუკი რაიმე ხარვეზები იქნება მათ საქმიანობაში, მოსამართლე ერთის მხრივ დისციპლინური წესით დაისჯება. ხოლო თუ მან სისხლის სამართლის დანაშაული ჩაიდინა, ოღონდ აქ მიაქციეთ ყურადღება, დანაშაული არა გადაწყვეტილების მიღებით, რაც ნონსენსია, რადგან ვიღაცას მოსწონს გადაწყვეტილება , ვიღაცას არა, ამის გამო მოსამართლე არ დაისჯება. მოსამართლე მხოლოდ მაშინ დაისჯება, თუ ქურდობა ან რაღაც დანაშაული ჩაიდინა. მას აქ ვერანაირი იმუნიტეტი და უვადოდ დანიშვნა ვერ უშველის,” _ განაცხადა კუბლაშვილმა.
“გურია ნიუსის” კითხვაზე, _ რა შედეგი ექნება ხარვეზების დამდგენი კომისიის დასკვნას მოსამართლის სამომავლო კარიერაზე, კუბლაშვილმა განაცხადა, რომ არანაირი.
“ხარვეზების დამდგენი კომისიის შედეგები არ იქნება იმ კუთხით, რომ რომელიმე მოსამართლეს გავათავისუფლებთ. შეგიძლიათ, ზუსტად ასე დაწეროთ. ეს არის გამორიცხული ჩვენი მხრიდან. ამ კომისიის შედეგი ვერ მოიტანს მოსამართლის გათავისუფლებას. ერთადერთი, რასაც ეს კომისია მოიტანს არის ის, რომ მოხდება საქმის ხელახალი განხილვა და გადაწყვეტილებაში ან შევა ცვლილება ან _ არა. თავად მოსამართლეს არაფერი ემუქრება ამ კუთხით,” _ აცხადებს კუბლაშვილი “გურია ნიუსთან” საუბარში.
ახალგაზრდა იურისტთა ასოციაციის ხელმძღვანელი კახა კოჟორიძე მოსამართლეთა უვადოდ დანიშვნამდე სისტემური პრობლემების გაანალიზებაზე საუბრობს.
“ამ გაანალიზების შემდეგ მიიღება გადაწყვეტილება უნდა მოხდეს თუ არა მათი გადანიშვნა. არავისთვის უცხო არ არის, რომ სერიოზული პრობლემები დაგროვდა და თუ სასამართლო სისტემამ მთლიანობაში ვერ შეძლო დამოუკიდებლობის შენარჩუნება, მაშინ სად არის გარანტია, რომ მოსამართლეები იქნებიან დამოუკიდებელნი ახალი ხელისფლების პირობებში, თუნდაც უვადოდ დანიშვნის შემდეგ?”_ აცხადებს კოჟორიძე.
