ის ჯერ გამგებლის მოვალეობის შემსრულებელს, ზაზა ურუშაძესა და მაჟორიტარ დეპუტატს თემურ ჩხაიძეს შეხვდა. შეხვედრა დახურულ კარს მიღმა გაიმართა. მოგვიანებით სტუმარმაც და მასპინძლებმაც მედიასთან კომენტარი გააკეთეს.
“ლანჩხუთის “გურიას” ისედაც აფინანსებს სახელმწიფო ანუ მუნიციპალიტეტის. შესაბამისად, ჩვენ რეკომენდაციები გავუწიეთ მუნიციპალიტეტებს ხელმძღვანელებს, რათა მოხდეს სამართლებრივი ფორმის მოძებნა, რაც გუნდს მუშაობაში ხელს შეუწყობს.
რაც შეეხება ლანჩხუთის სტადიონს, ჩვენი ინფორმაციით, შარშან ფეხბურთის ფედერაციის პროექტის შესაბამისად, ბალახის საფარი დაიგო, მაგრამ ამას თან უნდა მოჰყვეს მისი მოვლა. თუ არ მოუარეს, საფარი გაფუჭდება და ეს ფულიც წყალში გადაყრილი იქნება. ამიტომ ბევრი თემაა ისეთი, რაც კომპლექსურ გადაწყვეტას მოითხოვს.
ამ ეტაპზე სტადიონის რეკონსტრუქციის საკითხი არ დგას. ლანჩხუთის სტადიონი ყოველთვის იყო ერთ-ერთი გამორჩეული გამომდინარე იმ პროცესებიდან, რაც ხდებოდა აქ. რა თქმა უნდა, თუ “გურია” მიაღწევს იმ პოპულარობას, რაც წარსულში ჰქონდა, შესაბამისად, დადგება ეს საკითხიც დღის წესრიგში. ამიტომ, ვფიქრობ, ყველაფერი უნდა გავაკეთოთ იმისთვის, რომ გუნდი იყოს მიმზიდველი ინვესტორებისთვის”, _ თქვა ლევან ყიფიანმა.
შეხვედრის შემდეგ კომანტერი გააკეთა ლანჩხუთის მაჟორიტარმა დეპუტატმა თემურ ჩხაიძემ: “ლანჩხუთის “გურიას” ბედი ყველა ლანჩხუთელს აინტერესებს, თუ სახელმწიფო არ ჩაერია ამ საქმეში, მარტო რაიონს გაუჭირდება გუნდის რჩენა _ ისედაც გაჭირვებაა. საუბარი გვქონდა იმაზე, როგორ დავეხმაროთ “გურიას”, _ თქვა ჩხაიძემ.
შედარებით იმედის მომცემი კომენტარი გააკეთა გამგებლის მოვალეობის შემსრულებელმა ზაზა ურუშაძემ: “ყველაფერი კარგად იქნება! ბატონმა ლევანმა მოგვილოცა “გურიას” უმაღლეს ლიგაში გადასვლა. სპორტის სხვადასხვა სახეობებზეც ვისაუბრეთ, რომლებიც ლანჩხუთშია განვითარებული. ჩვენი შეხვედრები, ალბათ, ხშირი იქნება და შევეცდებით, რომ ლანჩხუთში სპორტი განვითარდეს. მინისტრი შეძლებისდაგვარად დაგვპირდა დახმარებასაც. თუმცა ჩვენ ჩვენი თავის იმედი უნდა გვქონდეს _ სხვის იმედად ყოფნა მთლად კარგი არ არის. გპირდებით, რომ ლანჩხუთის “გურია” გახდება იმაზე, უკეთესი ვიდრე იყო!” _ თქვა ურუშაძემ.
