“გუნდის პოზიციაა, იყოს ჩემი კანდიდატურა. მე თვითაცილება არ მაქვს ამ საკითხზე. რაც შეეხება მმართველი გუნდის ახირებას, მხოლოდ და მხოლოდ ახირებაა, ვინაიდან არანაირი კონკრეტული მიზეზი არ აქვთ, რათა მე არ ვიქნა დაშვებული. ეს არ არის მათი გადასაწყვეტი საკითხი, არსებობს კვოტა უმცირესობის და თავად უმცირესობა ასახელებს თავის კანდიდატურას, რომელიც უმრავლესობამ წესით უნდა მიიღოს და სანამდე გაგრძელდება ეს, ვნახოთ, _ ასე პასუხობს “გურია ნიუსისთვის” მიცემულ კომენტარში გივი თარგამაძე უმრავლესობას. დეპუტატი “ნდობის ჯგუფში” მისი კანდიდატურის დაბლოკვას მის მიმართ რუსეთის და პრემიერის სიძულვილით ხსნის.
რაც შეეხება “ნდობის ჯგუფის” შექმნის გაჭიანურების მიზეზად გივი თარგამაძის კანდიდატურის მიუღებლობას, 2004-2008 წლებში უმცირესობას ნდობის ჯგუფში წევრი საერთოდ არ ჰყავდა, რადგანაც მაშინდელმა უმრავლესობამ არ გამოუცხადა ნდობა უმცირესობის მიერ წარდგენილ კანდიდატურას _ დავით გამყრელიძეს. თავის მხრივ, უმცირესობამ წარდგენილი კანდიდატი არ შეცვალა და ნდობის ჯგუფის მუშაობამ ამ მოწვევის პარლამენტში ოპოზიციის მონაწილეობის გარეშე ჩაიარა.
ამ საკითხის გარკვევა თუ რატომ ჭიანურდებოდა ახალი მოწვევის პარლამენტში “ნდობის ჯგუფი”, “გურია ნიუსმა” ერთი თვის წინ დაიწყო, მაგრამ თავდაცვისა და უშიშროების კომიტეტის თავმჯდომარესთან, ირაკლი სესიაშვილთან დაკავშირება შეუძლებელი აღმოჩნდა.
წესით კი, პარლამენტის თავდაცვისა და უშიშროების კომიტეტში კანონით დადგენილი წესით იქმნება ნდობის ჯგუფი. ნდობის ჯგუფის საქმიანობა და უფლებამოსილება განისაზღვრება კანონით.
კანონით, “ნდობის ჯგუფის” სხდომები (თუ ასეთი ჯგუფი შექმნილია) ტარდება წელიწადში ორჯერ ან საჭიროებისამებრ, ნდობის ჯგუფის ნებისმიერი წევრის წინადადებით, თუ სხდომის ჩატარებას მხარს დაუჭერს ნდობის ჯგუფის წევრთა უმრავლესობა.
ასევე, სახელმწიფო ბიუჯეტის კანონის პროექტის იმ ნაწილს, რომელიც ეხება სახელმწიფო საიდუმლოებას, განიხილავს “ნდობის ჯგუფი”, რომელიც ახალი მოწვევის პარლამენტში ჯერაც არ შექმნილა და დღეს ატყდა აჟიოტაჟი იმაზე, რაც ისედაც მშვენივრად იცოდნენ.
“საქართველოს თავდაცვის შესახებ” კანონში შესატანი ცვლილებების პროექტის თანახმად, თავდაცვის სამინისტრო თავდაცვისა და უშიშროების საპარლამენტო კომიტეტს წარუდგენს ინფორმაციას განსახორციელებელ არასაიდუმლო სახელმწიფო შესყიდვებზე. ასევე წელიწადში არანაკლებ ერთხელ წარუდგენს მოხსენებას სახელმწიფო შესყიდვების შესახებ გაწეულ და მიმდინარე საქმიანობაზე.
პროექტის თანახმად, თავდაცვის სამინისტრო ვალდებული იქნება “ნდობის ჯგუფს” წარუდგინოს ინფორმაცია განსახორციელებელი საიდუმლო სახელმწიფო შესყიდვის შესახებ, თუ შესასაყიდი საქონლის ან მომსახურების სავარაუდო ღირებულება 2 მილიონ ლარს აღემატება, ხოლო სამუშაოს სავარაუდო ღირებულება – 4 მილიონ ლარს, რათა განხორციელდეს რეალური საპარლამენტო კონტროლი შეიარაღებულ ძალებზე.
ცვლილებები კი, რომელიც, “საქართველოს თავდაცვის შესახებ” კანონსა და “ნდობის ჯგუფის შესახებ” კანონში აისახება, თავდაცვისა და უშიშროების კომიტეტმა უკვე განიხილა.
“საქართველოს კანონში ნდობის ჯგუფის შესახებ” ვკითხულობთ: “საქართველოს აღმასრულებელი ხელისუფლების ორგანოების სპეციალური პროგრამებისა და საიდუმლო საქმიანობის საბიუჯეტო კონტროლის მიზნით საქართველოს პარლამენტის თავდაცვისა და უშიშროების კომიტეტში, როგორც წესი, კომიტეტის წევრთაგან იქმნება ნდობის ჯგუფი”.
ამავე კანონის მიხედვით: “ნდობის ჯგუფი შედგება 5 წევრისაგან, რომელთაგან ერთი არის საქართველოს პარლამენტის თავდაცვისა და უშიშროების კომიტეტის თავმჯდომარე, ერთი – უმრავლესობის წევრი, ერთი – მაჟორიტარული წესით არჩეულ პარლამენტის წევრთა შეთანხმებით წარდგენილი მაჟორიტარი პარლამენტის წევრი, ხოლო ორი – უმცირესობის ან იმ ფრაქციის წევრი, რომელიც არ არის გაერთიანებული უმრავლესობაში.
თავდაცვისა და უშიშროების კომიტეტის თავმჯდომარის მოადგილე, საპარლამენტო უმცირესობის წარმომადგენელი, დავით დარჩიაშვილი ამ საკითხზე, ჯერ კიდევ ერთი თვის წინ “გურია ნიუსთან” ასეთ კომენტარს აკეთებდა:
“უმრავლესობას უნდა შეეტანა ეს საკითხი და თუ კიდევ დიდხანს გაიჭიმება ეს პროცესი, აუცილებლად გამოვხატავთ ჩვენს დამოკიდებულებას. ეს, რა თქმა უნდა, პრობლემაა, რადგან კანონში წერია, რომ “ნდობის ჯგუფი” უნდა შეიქმნას. ცოტა ხანიც დაველოდებით უმრავლესობას, საინტერესოა, რა ახსნა ექნებათ მათ.
ჩვენ, უახლოეს მომავალში მოვითხოვთ განმარტებას იმის თაობაზე, თუ რატომ არ არის დაინტერესებული უმრავლესობა ამ საკითხით”.
უმცირესობას უმრავლესობის მიერ ახსნილი მიზეზების გასაგებად დიდხანს ლოდინი არ დაჭირვებია. ყველაფერი უმცირესობის მიერ წარდგენილ კანდიდატურას დაბრალდა…
საპროცედურო საკითხთა და წესების კომიტეტის თავმჯდომარე ირინე იმერლიშვილი აცხადებდა, რომ “ნდობის ჯგუფი” ნამდვილად არ იყო შექმნილი, თუმცა ამას იმით ხსნიდა, რომ ეს რაიმე კონკრეტულ ვადებში გაწერილი იყო.
_ უნდა შექმნილიყო, მასე არაა, რადგან კონკრეტულ ვადებში არ არის გაწერილი. და ბატონი დავით დარჩიაშვილი რას ამბობს, ჩვენი კანდიდატურა ვინ იყოო? თუმცაღა, კიდევ გეუბნებით, დეტალურად ნამდვილად არ ვიცი, რა მიზეზის გამო არ არის შექმნილი, მაგრამ ის ნამდვილად ვიცი, რომ წინა ბიუროს სხდომაზე პარლამენტის თავმჯდომარემ შეახსენა უმრავლესობასაც და უმცირესობასაც, იქნება შეთანხმდეთ კანდიდატურებზე, რომ დროულად შეიქმნას “ნდობის ჯგუფიო.” მე გიდასტურებთ, რომ დღესდღეობით, პარლამენტში ეს ჯგუფი არ არის შექმნილი…
