როგორც “გურია ნიუსი” უკვე იუწყებოდა, დასავლეთ საქართველოს საოლქო პროკურორის ილია ჯალაღანიას განცხადებით, პროკურატურის საგამოძიებო ნაწილში დღესაც მიმდინარეობს გამოძიება “სამუშაოს მაძიებელთა აღრიცხვის პროგრამასთან” დაკავშირებით.
სწორედ ამ გამოძიების “ფარგლებში” “ერთიანი ნაციონალური მოძრაობის” გენერალური მდივანი ვანო მერაბიშვილი და კახეთის გუბერნატორი ზურაბ ჭიაბერაშვილი დაკითხვაზე დაიბარეს. ზურაბ ჭიაბერაშვილის განცხადებით, ისინი იმერეთის სამხარეო პროკურატურაში დაბარებულები არიან სამუშაოს მაძიებელთა აღრიცხვის პროგრამის ფარგლებში მიმდინარე გამოძიებასთან დაკავშირებით. მისივე თქმით, ამ საკითხთან დაკავშირებით ის და ვანო მერაბიშვილი თებერვალში უკვე იყვნენ ქუთაისში დაკითხვაზე და ყველა კითხვაზე სრულყოფილი პასუხი გასცეს.
ყოფილმა შინაგან საქმეთა და პრემიერ-მინისტრმა, ამჟამად პარტია “ნაციონალური მოძრაობის” გენერალურმა მდივნმა, ვანო მერაბიშვილმა 2012 წლის 5 ივლისს ხელი მოაწერა დადგენილებას.
წინასაარჩევნო დადგენილებით დამტკიცებული პროგრამით, საქართველოს ტერიტორიაზე მცხოვრებ “სამუშაოს მაძიებელთა აღრიცხვა” და მონაცემთა ბაზის შექმნა, 2012 წლის ივლისიდან 25 ქალაქში ინტენსიურად მიმდინარეობდა. სოციალური მომსახურების სააგენტოს დასაქმების აგენტების მიერ ხდებოდა შესაბამისი კითხვარების შევსება და მონაცემების ელექტრონულ ბაზებში შეყვანა.
2012 წლის 3 სექტემბერს სსიპ “სოციალური მომსახურების სააგენტომ” გამოსცა ბრძანება, რომლის შესაბამისად, ზემოხსენებული პროგრამის ფარგლებში, შტატგარეშედ, საქართველოს ყველა რეგიონში დამატებითი კონტრაქტები გაუფორმდა 21 837 პირს, რომლებსაც პროგრამის ფარგლებში უნდა შეესრულებინათ მოქალაქეთა დასაქმებასთან დაკავშირებული სააღრიცხვო სამუშაოები.
მიუხედავად ამისა, 2012 წლის სექტემბრის ბოლოს ყველა მათგანს სს “ლიბერთი ბანკის” შესაბამის ფილიალებში ხელფასის სახით დაერიცხათ 240 ლარი.
სულ, ამ პირებზე სახელმწიფო ბიუჯეტიდან გადარიცხულია 5 240 880 ლარი.
გამოძიების ფარგლებში, ქვეყნის მასშტაბით, საქართველოს ყველა რეგიონში, მოწმის სახით დაიკითხა 2000-მდე პირი, რომელთა ჩვენებებით დადგინდა, რომ ზემოხსენებულ 21 837 მოქალაქეს “სამუშაოს მაძიებელთა აღრიცხვის პროგრამის” ფარგლებში არანაირი სამუშაო არ შეუსრულებიათ და რომ მათ თანხა მიიღეს პოლიტიკური გაერთიანება “ერთიანი ნაციონალური მოძრაობის” მხარდასაჭერად წარმოებული წინასაარჩევნო აქტიურობისათვის, რაც გამოიხატებოდა საქართველოს პრეზიდენტთან დაგეგმილ წინასაარჩევნო შეხვედრებში მონაწილეობის მიღებაში, „ერთიანი ნაციონალური მოძრაობის” პარტიული ბროშურების, ფლაერების და სიმბოლიკების დარიგებაში, პარტიული აგიტააციისა და პროპაგანდის განხორციელებაში და სხვა.
გამოძიების მიერ მიღებულ იქნა გადაწყვეტილება საქართველოს შრომის ჯანმრთელობისა და სოციალური დაცვის იმჟამინდელი მინისტრის ზურაბ ჭიაბერაშვილისა და საქართველოს იმჟამინდელი პრემიერ-მინისტრის ივანე მერაბიშვილის მოწმის სახით დაკითხვის შესახებ. ზურაბ ჭიაბერაშვილი და ივანე მერაბიშვილი ამ საკითხთან დაკავშირებით დასავლეთ საქართველოს საოლქო პროკურატურაში პირველად 2012 წლის 13 თებერვალს დაიბარეს.
