ერთ-ერთ კანდიდატს, გია ჩხაიძეს არჩევნების ობიექტურობაში უკვე ეჭვი შეაქვს, რა აძლევს მას ეჭვის საფუძველს, ამას მისი ინტერვიუდან შეიტყობთ.
კახა ებრალიძე: “ერთი კანდიდატი მე ვარ, მეორე _ გია ჩხაიძე, მესამე კი მამუკა ქანთარია. წესით გენერალურ მდივანს ხარიტონ ჩხატარაშვილი ევალებოდა არჩევნების ორგანიზება, მაგრამ, გუშინ მივიღე წერილი, რომ ის ჯანმრთელობის მდგომარეობის გაუარესების გამო არჩევნებს ვერ დაესწრება. ამიტომ სხდომას სხვა გაუძღვება.
ეს მარტო საარჩევნო ყრილობა არ არის, განიხილება სუბიექტების გაწვევისა და შემოყვანის საკითხიც; მეორე საკითხია პრეზიდენტის არჩევა.
აქ არანაირი პოლიტიკური მოტივი არ არსებობს. პოლიტიკა და ფეხბურთი, განსაკუთრებით კი გურიის ფეხბურთის ფედერაცია ძალიან შორსაა პოლიტიკისაგან.
რა შემიძლია გითხრათ ჩემს მოწინააღმდეგეებზე? ორივე ღირსეული კანდიდატია. გიალო ჩხაიძეც და მამუკა ქანთარიაც ჩემი მეგობრები არიან. ორივესთან იდეალური ურთიერთობა მაქვს. გიალოს ის უმაგრებს ზურგს, რომ კარგი ფეხბურთელი იყო და ასევე კარგი მწვრთნელია. დღეს ის ჩემი მეგობარია და არჩევნების შემდეგაც ჩემი მეგობარი იქნება.
მე წარმატებებს ვუსურვებ ორივე მათგანს. შანსებზე ის შემიძლია გითხრათ, რომ ჩემი აზრით, შანსები თანაბარია.”
გია ჩხაიძე: “იმ დელეგატებს, რომლებიც ჩემი მომხრეები იყვნენ, ხმის მიცემის უფლება ჩამოართვეს. იცით, რომ 11 სუბიექტს აქვს ხმის მიცემის უფლება. ჩვენ ვითხოვთ, როგორც ადრე ტარდებოდა არჩევნები, ისე ჩატარდეს. დელეგატებს არ ეუბნებიან, რომ მათ საიდენტიფიკაციო კოდი სჭირდებათ და აქედან გამომდინარე ხმას ვერ მისცემენ ვერც ერთ კანდიდატს. აქამდე ასეთი რამ არც თქმულა და არც არავის უხსენებია; მსგავსი რამ არც წესდებაშია ნახსენები. ჩვენ ახლა ველოდებით ადვოკატს. წინასწარ, სანამ დეტალებში არ გავერკვევი, ვერაფერს ვერ გეტყვით. ადრე, როცა კახა ებრალიძე აირჩიეს, მხოლოდ პირადობის მოწმობებით მიიღეს მიიღეს არჩევნებში მონაწილეობა. ერთ პიროვნებას საერთოდ არ ჰქონდა მაშინ პირადობის მოწმობა და ისე მიიღო არჩევნებში მონაწილეობა. დღეს კი კოდებს გვთხოვენ, რომლის შესახებაც არსად არ წერია. 11-დან 7 ჩემი მომხრე იყო. ეტყობა, მიხვდნენ აგებდნენ და აქედან გამომდინარე მიიღეს ეს გადაწყვეტილება. ეს ზევიდან, საქართველოს ფედერაციიდან წყდება თუ აქედან, ვერ გეტყვით.
რაც შეეხება ურთიერთობას მონაწილე კანდიდატებთან, მე ვმეგობრობ მათთან და ვფიქრობ, გავაგრძელებ კიდეც მეგობრულ კავშირს, თუმცა, ჟურნალისტი მამუკა ქანთარია საიდან მოხვდა ამ არჩევნებში და რა უნდა, ვერ გეტყვით.”
მესამე კანდიდატი, მამუკა ქანთარია ამბობს, რომ არჩევნების დღეს მისი მხრიდან რაღაც საინტერესო მოხდება, მაგრამ რა, ამას, მისი თქმით, არჩევნები გვიჩვენებს; არჩევნებში კი იმიტომ მონაწილეობს, რომ აინტერესებს, რამდენად ობიექტურად ჩატარდება ეს არჩევნები.
კახა ებრალიძე
გია ჩხაიძე
მამუკა ქანთარია
