შეხვედრაზე იმყოფებოდა: იუდეური თემი, სომეხთა სამოციქულო მართლმადიდებელი წმინდა ეკლესიის საქართველოს ეპარქია, ამიერკავკასიის კათოლიკეთა სამოციქულო ადმინისტრაცია, ევანგელურ-ლუთერული ეკლესია, ევანგელურ-ბაპტისტური ეკლესია, იეზიდთა თემი, სახარების რწმენის ეკლესია, მეშვიდე დღის ქრისტიან ადვენტისთა ეკლესია. რელიგიური გაერთიანების წარმომადგენლებმა ერთხმად აღნიშნეს, რომ ერთსქესიანთა ურთიერთობა უმძიმესი ცოდვაა. მისი პროპაგანდა, ტირაჟირება და პოპულარიზაცია ყოვლად მიუღებელია. ასევე წუხილი გამოთქვეს 17 მაისს თბილსიში განვითარებულ ძლადობრივი მოწოდებების გამო უარყოფითი დამოკიდებულება გამოხატეს.
“გურია ნიუსი” უცვლელად გთავაზობთ საპატრიარქოს ოფიციალურ ვებგვერდზე (http://www.patriarchate.ge/)გავრცელებულ განცხადებას. “24 მაისს, სრულიად საქართვლოს კათოლიკოს-პატრიარქი ილია II მღვდელმთავრებთან ერთად შეხვდა ინტერრელიგიურ სამუშაო ჯგუფში შემავალი რელიგიური გაერთიანებების წამომადგენლებს. ყველამ გამოთქვა წუხილი 17 მაისს განვითარებულ მოვლენებთან დაკავშირებით და გამოხატა უარყოფითი დამოკიდებულება ძალადობრივი მოწოდებებისა და ქმედებების გამო. ამასთანავე, რელიგიური გაერთიანებების წარმომადგენლებმა ერთხმად დააფიქსირეს თავისი პოზიცია და აღნიშნეს, რომ ერთსქესიანთა ურთიერთობა უმძიმესი ცოდვა არის და, ამდენად, მისი პროპაგანდა, ტირაჟირება და პოპულარიზაცია ყოვლად მიუღებელია. სრულიად საქართველოს კათოლიკოს-პატრიარქი და დამსწრე რელიგიური დენომინაციების ლიდერები შეთანხმდნენ, დაიწყონ აქტიური მუშაობა, რათა თავის მხრივ ხელი შეუწყონ საზოგადოებაში არსებული ამ და სხვა პრობლემების მოგვარებას.
დაიგეგმა კონკრეტული ერთობლივი ღონისძიებებიც: ა). მოხდეს ზნეობრივ თემებზე ერთობლივი წიგნის (ან წიგნების) პუბლიკაცია; ბ). ყველამ შეუწყოს ხელი ოჯახის, როგორც სახელმწიფოს უმთავრესი საყრდენის, სიწმიდისათვის ზრუნვის გაძლიერებას; გ). ეთხოვოს სახელმწიფოს ოჯახის დღის დაწესება-აღნიშვნა; დ). მოხდეს ზოგადად საგანმანათლებლო საქმიანობის გააქტიურება; ე). საკანონმდებლო ორგანოსათვის განსახილველად შემუშავდეს გარკვეული წინადადებები, რომელიც მოზარდების მავნე ზემოქმედებისაგან დაცვას შეუწყობს ხელს.
შეხვედრას ესწრებოდნენ ლიდერები შემდეგი რელიგიური დენომინაციებიდან: იუდეური თემი, სომეხთა სამოციქულო მართლმადიდებელი წმინდა ეკლესიის საქართველოს ეპარქია, ამიერკავკასიის კათოლიკეთა სამოციქულო ადმინისტრაცია, ევანგელურ-ლუთერული ეკლესია, ევანგელურ-ბაპტისტური ეკლესია, იეზიდთა თემი, სახარების რწმენის ეკლესია, მეშვიდე დღის ქრისტიან ადვენტისთა ეკლესია, ასევე – ინტერრელიგიური სამუშაო ჯგუფის კოორდინატორი პაატა გაჩეჩილაძე, კონფესიათაშორისი დიალოგისა და საერთაშორისო ორგანიზაციებთან ურთიერთობებში საქართველოს საპატრიარქოს წარმომადგენელი თეა გოგოტიშვილი.” – ნათქვამია საპატრიარქოს მიერ გავრცელებულ განცხადებაში.
