კომისიის მიერ შემუშავებულ და დამტკიცებულ იქნა “სახელმწიფო აუდიტის სამსახურის 2012 წლის საფინანსო-ეკონომიკური, სამართლებრივი და ორგანიზაციული საქმიანობის, აუდიტის ხარისხის კონტროლისა და შიდა კონტროლის პროცედურების შემოწმების პროგრამა.” კომისიამ აუდიტის ჩასატარებლად შექმნა სამუშაო ჯგუფი, რომელიც დაკომპლექტებული იყო მოწვეული სპეციალისტებით. სამუშაო ჯგუფი მუშაობას შეუდგა 2013 წლის 11 იანვარს. შემოწმება დამთავრდა 2013 წლის 20 მაისს.
საპარლამენტო კომისიის ანგარიშში გურიის ვიცე-გუბერნატორი, პაატა მანჯგალაძეც მოხვდა.
გურიის ვიცე-გუბერნატორი პაატა მანჯგალაძე 2012 წელს სახელმწიფო აუდიტორული სამსახურის უფროსი აუდიტორი იყო.
2012 წლის 24 ივლისს, გენერალური აუდიტორის პირველი მოადგილე შოთა თარხნიშვილის N2/053 ბრძანებით, პაატა მანჯგალაძეს მიეცა ანაზღაურებადი შვებულება – 30 კალენდარული დღე – 3 აგვისტოდან 2 სექტემბრამდე და ანაზღაურების გარეშე შვებულება 32 კალენდარული დღის ოდენობით – 2 სექტემბრიდან 4 ოქტომბრამდე.
გენერალური აუდიტორის ლაშა თორდიას 2012 წლის 17აგვისტოს N141/37 ბრძანებით, როცა პაატა მანჯგალაძე ანაზღაურებად შვებულებაში იმყოფებოდა და შეჩერებული ქონდა სამსახურებრივი ურთიერთობა, პაატა მანჯგალაძეზე ფულადი ჯილდოს სახით გაიცა 1700 ლარი. რაც შეეხება მის მიერ შესრულებულ სამუშაოს, 2012 წლის განმავლობაში მის მიერ მომზადებული დოკუმენტი მოძიებული ვერ იქნა, შიდა მოძრაობის დოკუმენტებში ორჯერ აქვს მიცემული თანხმობა სამსახურში გადაადგილებაზე, ორჯერ აქვს განცხადება დაწერილი შვებულებაში გასვლაზე და ორჯერ არის მის სახელზე გაცემული ცნობა თანამდებობრივი სარგოს შესახებ. სულ საანგარიშო პერიოდში სარგოს სახით დარიცხული ჰქონდა 15 189 ლარი, ხოლო პრემიის სახით 6 800 ლარი.
„გურია ნიუსი“ ამ საკითხთან დაკავშირებით ვიცე-გუბერნატორს დაუკავშირდა.
_ ბატონო პაატა, როდესაც თქვენ ანაზღაურებად შვებულებაში იმყოფებოდა (საუბარია კონტროლის პალატაზე) და შეჩერებული გქონდა სამსახურებრივი ურთიერთობა, თქვენზე ფულადი ჯილდოს სახით გაიცა 1700 ლარი, გვაინტერესებს რატომ აიღეთ ეს თანხა?
_ ავიღე რა ნიშნავს? ჩამერიცხა თანხა და საჭიროების მიხედვით ვიღებდი სახელფასო ბარათიდან და თუ შვებულებაში გასვლის თარიღსა დ ჯილდოს მიღების ვადას შორის რაიმე უზუსტობა იყო, ყურადღება არ მიმიქცევია. შემდეგ დამირეკა საფინანსო სამსახურმა და მოხდა ხელახალი გადაანგარიშება და შვებულებაში ყოფნის პერიოდში გაცემული თანხა დავუბრუნე შესაბამისი სამსახურის სათანადო ანგარიშზე თანხის უკან გადარიცხვით.
_ გინდა თქვათ, რომ ეს ყველაფერი ტექნიკური შეცდომა იყო?
_ რა თქმა უნდა, სხვა მიზეზს ვერ ვხედავ. მით უფრო, რომ თავად მთხოვეს შემდგომში აღნიშნული თანხის დაბრუნება.
_ თქვენი აზრით, თანხა, რომ დაგაბრუნებინეს ეს სამართლიანი გადაწყვეტილება იყო კონტროლის პალატის მხრიდან?
_ მე ამიხსნეს, რომ თარიღებში არსებული შეცდომის გამო ჩამერიცხა თანხა და მეც ავდექი და დავაბრუნე. _ განაცხადა “გურია ნიუსთან” პაატა მანჯგალაძემ.
“გურია ნიუსის” კითხვაზე, როდის დააბრუნა უკან ფულადი ჯილდო, პაატა მანჯგალაძემ განაცხადა, რომ ამ თვეში. ამ თვეში კი საპარლამენტო კომისია სწორედ ამ საკითხებს არკვევდა კონტროლის პალატაში. აქედან გამომდინარე, გასაგებია, რატომ მოხდა აღნიშნული თანხის დაბრუნება სწორედ ამ პერიოდში.
