მისი თქმით, ამ გადაწყვეტილების მიღება იოლი არ იყო. სპეციალურ განცხადებაში, რომელიც მამეიშვილმა რამდენიმე წუთის წინ გაავრცელა, აღნიშნულია, რომ ეს გადაწყვეტილება გახლავთ შედეგი იმ ხანგრძლივი და ამავე დროს ურთულესი წინააღმდეგობებისა, რომელსაც ბოლო დროს ვაწყდებოდი როგორც საკუთარ თავთან, ისე მუნიციპალიტეტის საკრებულოში შექმნილ ახალ პოლიტიკურ რეალიებთან მიმართებაში.
“ძვირფასო ოზურგეთელებო,
მინდა გაცნობოთ, რომ მივიღე გადაწყვეტილება საკრებულოს თავმჯდომარის პოსტის დატოვების შესახებ.თავს მოვალედ მივიჩნევ, ამის თაობაზე განმარტება გაგიკეთოთ თქვენ, ჩემს ამომრჩეველს, ვისთანაც პირველ რიგში ვარ მოვალე და ანგარიშვალდებული.
გულახდილად გეტყვით, ჩემი პასუხისმგებლობის მაღალი ხარისხიდან გამომდინარე, ეს არ იყო იოლი გადასაწყვეტი. იგი გახლავთ შედეგი იმ ხანგრძლივი, და ამავე დროს ურთულესი წინააღმდეგობებისა, რომელსაც ბოლო დროს ვაწყდებოდი როგორც საკუთარ თავთან, ისე მუნიციპალიტეტის საკრებულოში შექმნილ ახალ პოლიტიკურ რეალიებთან მიმართებაში. ჩერჩილს უყვარდა ასეთი გამოთქმა:” პესიმისტი ყველა შანსში სირთულეს ხედავს; ოპტიმისტი კი ყველა სირთულეში – შანსს”. მე კი, როგორც გამოუსწორებელ ოპტიმისტს, ბოლო დრომდე მჯეროდა, რომ ამ ახალ გამოწვევას ერთად დავძლევდით, საკრებულო გამონახავდა საკუთარ თავში ძალას დამდგარიყო თავის სიმაღლეზე.
მოვლენათა ლოგიკამ კი დამანახა, რომ ასე არ მოხდებოდა, რითაც სულ უფრო გამიმძაფრდა განცდა იმისა, რომ როგორც წარმომადგენლობითი ორგანოს ხელმძღვანელი, არასრულფასოვნად ვასრულებდი კანონით მონიჭებულ ფუნქციებს. ამის მიზეზი ის არაჯანსაღი, არაკონსტრუქციული, ხშირ შემთხვევაში შეურაცმყოფელი ურთიერთობები გახლდათ, რაც პირადად ჩემსა და თვითმმართველობაში კოალიცია ,,ქართული ოცნების” ცალკეულ წამომადგენლებსა და მხარდამჭერებს, მათ შორის მუნიციპალიტეტის გამგებელს შორის თანდათან ჩამოყალიბდა. დეტალებზე საუბარს არ შევუდგები, თუმცა ვიტყვი რომ ამ გადაწყვეტილების მისაღებად ბოლო წვეთი გამგეობის პირველი პირების მხრიდან ურეკში დაგეგმილი საკრებულოს ბიუროს გამსვლელი სხდომის მიზანმიმართული ჩაშლა გახდა,სადაც მუნიციპალიტეტისათვის მნიშვნელოვანი საკითხები უნდა გადაწყვეტილიყო. ამას კიდევ წინ უძღოდა ჩემგან პრინციპული უარი გამგებლის კატეგორიულ მოთხოვნაზე, განმეხორციელებინა ირიბი ზეწოლა ერთ-ერთ მედიასაშუალებაზე.
მიმაჩნია, რომ ოზურგეთის სინამდვილეში ჩემი ხელმძღვანელობით საკრებულოს საქმიანობის სამწლიანი მონაკვეთი იყო საკმაოდ პოზიტიური და შედეგიანი. ამას უშუალოდ საზოგადოებასთან ჩემი ყოველდღიური ურთიერთობებიც მიდასტურებს. ხოლო ისეთ ვითარებაში, როცა საკრებულოს ქმედითუნარიანობა საფრთხის წინაშე დგას და მე ვერ ვახერხებ შექმნილი სიტუაციის სასიკეთოდ გამოსწორებას, ვფიქრობ, ერთადერთი სწორი გამოსავალი ჩემი თანამდებობიდან წასვლაა. მხოლოდ ამ გზით შევინარჩუნებ, პირველ რიგში, იმ ზნეობრივ ფასეულობებს, რითაც დღემდე მიცხოვრია, მეორეს მხრივ კი, თავიდან ავიცილებ საკრებულოს წევრებს შორის არაჯანსაღ დამოკიდებულებას, მის დემორალიზაციას, რისი ნიშნებიც უკვე სახეზეა.სწორედ ამიტომ, ისღა დამრჩენია, საერთო საქმის უკეთესად კეთების შანსი მივცე და წარმატება ვუსურვო ჩემს შემდგომ საკრებულოს თავმჯდომარეს” _ აღნიშნულია მამეშვილის მიერ გავრცელებულ განცხადებაში.
