შეხვედრის ორგანიზატორი, “გურია ნიუსის” ინფორმაციით, საკრებულოს თავმჯდომარის მოადგილე, რომელიც ახლა თავმჯდომარის მოვალეობის ასრულებს, ავთანდილ მექვაბიშვილი იყო. შეხვედრას რამდენიმე დეპუტატი _ ირინა საჯაია, ალეკო მამეშვილი და ავთანდილ ნემსაძე არ ესწრებოდნენ.
შეხვედრის შესახებ “გურია ნიუსისთვის” ოფიციალურად არავის უცნობებია, თუმცა, საკრებულოს ერთ-ერთმა დეპუტატმა დილით შეგვატყობინა, რომ შეხვედრა უნდა ჩატარებულიყო. მისივე თქმით, საკრებულოს წევრებთან შეხვედრის თემა და მიზანი იყო, რომ მაჟორიტარ დეპუტატს კოალიცია ” ქართლი ოცნების” წევრის, “თავისუფალი დემოკრატების” ოზურგეთის რაიონული ორგანიზაციის თავმჯდომარისა და საკრებულოს დეპუტატის დიმიტრი კვერღელიძისთვის მხარი დაეჭირა საკრებულოს თავმჯდომარის პოსტზე არჩევაში.
შეხვედრა საკრებულოს თავმჯდომარის მოვალეობის შემსრულებელმა ავთანდილ მექვაბიშვილმა წარმართა. შეხვედრას, ზვიად კვაჭანტირაძესთან ერთად, მუნიციპალიტეტის გამგებლის მოვალეობის შემსრულებელი კოტე შარაშენიძეც ესწრებოდა.
შეხვედრის დასაწყისში საკუთარი პოზიცია დააფიქსირა დიმიტრი კვერღელიძემ. მისი განცხადებით, თუ საკრებულოს წევრები მას თავმჯდომარედ აირჩევენ, ოზურგეთს ექნება უკეთესი მომავალი.
მან ზვიად კვაჭანტირაძეს და დეპუტატებს სიტყვით მიმართა:
_ მადლობა მინდა გადაგიხადოთ, ბატონო ზვიად, აქ მობრძანებისთვის. არ შემიძლია, არ გამოვხატო დიდი პატივისცემა და მადლიერება ბატონ ზვიადის მიმართ იმ დიდი მხარდაჭერისა და ნდობისათვის, რომელსაც ის ჩემდამი გამოხატავს. მე უფრო დავალებად მივიღებ, თუ როგორი უნდა ვიყო ამ თანამდებობაზე არჩევის შემთხვევაში, რაც თქვენზეა დამოკიდებული, ჩემო მეგობრებო. მიუხედავად იმისა, რომ უალტერნატივოდ მიჭერს მხარს კოალიცია ” ქართული ოცნება”, რაც არა ერთხელ იქნა გაჟღერებული ე. წ. “ექვსიანის” შეხვედრებზე, მიუღებელია საკრებულოს წევრებზე ყოველგვარი ზეწოლა და მათ საქმიანობაში ხელისშეშლა. ჩემი არჩევის შემთხვევაში, აღარ მოხდება გადაწყვეტილებების ერთპიროვნულად მიღება, სრული დამოუკიდებლობა ექნება ბიუროს, კომისიებს, ფრაქციებს.
ჩემო კოლეგებო, მე მჯერა და მწამს, რომ ჩვენ ყველა გავერთიანდებით ერთი მიზნისთვის, _ თქვა კვერღელიძემ .
შეხვედრაზე ზვიად კვაჭანტირაძემ დეპუტატებს კიდევ ერთხელ მოუწოდა, მხარი დაეჭირათ დიმიტრი კვერღელიძისთვის. შეხვედრის ბოლოს მან ” გურია ნიუსთან” ამ თემაზე კომენტარი გააკეთა _ მისი განცხადებით დიმიტრი კვერღელიძე საკრებულოს თავმჯდომარის პოსტზე კოალიციის ერთ-ერთი უპირობო კანდიდატია.
_ ბატონო, ზვიად, კონკრეტულად, კოალიციის რომელ წევრებთან გაქვთ შეთანხმებული ეს საკითხი?
_ მე მქონდა საუბარი დავით დარჩიასთან. მან განმიცხადა, რომ, იქნებ, სხვებმაც დააყენონ კანდიდატურა., ვუთხარი, კი ბატონო, დააყენონ,-მეთქი. მე საკრებულოს გადაწყვეტილებას ვცემ პატივსო _ ეს პოზიცია დააფიქსირა ჩემთან დათო დარჩიამ.
პოლიტიკური თვალსაზრისით, გეტყვით პირდაპირ, რომ ჩემი აზრით, ეს პოლიტიკური პარტიის “ქართული ოცნებისთვის” არის უფრო მნიშვნელოვანი, ვიდრე ადგილობრივი ორგანიზაციის თავმჯდომარისთვის. ამას ვამბობ სრული პასუხისმგებლობით, თვითონაც დამეთანხმა საბოლოოდ. სხვისი აზრიც ვიცი _ ყველა ეთანხმება ამ გადაწყვეტილებას. ჭორები, რომ თითქოს ოზურგეთში კოალიცია ვერ შედგა ოზურგეთში, ერთხელ და სამუდამოდ უნდა გაბათილდეს _ ჩვენი ძალა ერთობაშია!
_ ბატონო ზვიად, ანუ აღარ მოხდება სხვა კანდიდატურის დაყენება? როგორ ფიქრობთ, საკრებულოს დეპუტატთა უმრავლესობა დიმიტრი კვერღელიძეს აირჩევს?
_ რაღაც აზრები ისმის, მაგრამ, ის რომ ვინმეს წინააღმდეგობა გაეწიოს, ასეთი რამ არ ყოფილა. საკრებულოს სხდომამდე ერთი კვირა რჩება და მოიფიქრებენ კიდევ ერთხელ. მე გულწრფელად გეტყვით _ ვისურვებდი, რომ არ მოხდეს სხვა კანდიდატურის დაყენება, იმიტომ, რომ არ იყოს ორ ხმაზე ჭიდაობა. რატომღაც მჯერა, რომ დეპუტატები ჩვენს მხარდაჭერას ანგარიშს გაუწევენ და დარწმუნებული ვარ, ნდობით მოეკიდებიან მას. მინდა, რომ საკრებულომ იმუშაოს ოზურგეთში მაღალ დონეზე და არა ისე, როგორცა არის ახლა გადახრილი. გამგებელსა და საკრებულოს თავმჯდომარეს პასუხისმგებლობები გადასანაწილებელი აქვთ, დღეს კი, ფაქტობრივად, ერთ ხელშია მოქცეული ყველაფერი.
__ როგორ ფიქრობთ, კოტე შარაშენიძეს და დიმიტრი კვერღელიძის შორის იქნება თუ არა საქმიანი და კარგი ურთიერთობა? ამბობენ, რომ ამით შარაძენიძის პოზიციები შესუსტდება…
_ ნამდვილად იქნება კარგი ურთიერთობა, კოტეს პოზიციები დაბალანსდება აუცილებლად. დღეს გამგებლის ფუნქციები უნდა იყოს დაბალანსებული _ სადაც არ შეიძლება ჩარევა, იქ არ უნდა ჩაერიო, რადგან ამან, შეიძლება, გამოიწვიოს ხელისუფლების უზურპაცია. მათ უნდა ითანამშრომლონ ერთმანეთთან, _ თქვა კვაჭანტირაძემ ” გურია ნიუსთან” საუბრისას.
