კვირა დღეს საკრებულოში, შეხვედრის დაწყებამდე რამდენიმე წუთით ადრე მივედით. გამგეობის წინ თავი მოეყარა საკრებულოს წევრთა უმრავლესობას. როცა შეკრების მიზეზი ვიკითხეთ, მაგალითად, საკრებულოს წევრმა ლელა ნაცვალაძემ ასეთი პასუხი გაგვცა:” ვინ გითხრათ, შეხვედრააო? არანაირი შეხვედრა არ არის, მე მეგობართან ვარ მოსული”. მანვე გვთხოვა, შეხვედრისთვის ხელი არ შეგვეშალა, თუმცა რას გულისხმობდა ხელშეშლაში, გაუგებარია.
რამდენიმე დეპუტატის თქმით, კვირა დღესაც მუშაობდნენ და ჩვეულებრივ სამუშაო პროცესში იყვნენ.
შეხვედრის კიდევ უფრო უცნაური საბაბი შემოგვთავაზა საკრებულოს დეპუტატმა ნაციონალური მოძრაობიდან მიხეილ გოგოტიშვილმა:
_ დღეს კონცერტია, საღამოს ხუთ საათზე და ვემზადებით კონცერტისთვის.
რამდენიმე დეპუტატის რეპლიკა კი ყოველგვარ სერიოზულობას მოკლებული და მოვალეობისადმი უპატივცემულო მიდგომის აფიშირება იყო: _ რეპეტიციას გავდივართ საკრებულოში და ყველა ერთად ვართ შეკრებილი… მე სოფლელი კაცი ვარ, დამირეკეს და მოვედი, მომენატრა ბიჭები და მოვედი…
_ ვინ დაგირეკათ?
_ კაი, ახლა… შეეკითხეთ ლელა ნაცვალაძეს!
_ ლელას ვკითხე და მიპასუხა, რომ მეგობართანაა მოსული…
_რასაც ლელა ამბობს, იმას ვამბობთ ჩვენც! სადაც ის მიდის, იქ მივდივართ ჩვენც! _ გვითხრეს დეპუტატებმა.
ასე იმპროვიზებულ შეხვედრაზე ჟურნალისტის დასწრების წინააღმდეგი იყო დეპუტატი დიმიტრი კვერღელიძეც, რომელიც სწორედ საკრებულოს მომავალ თავმჯდომარედ მოიაზრება. იგი გვთხოვდა, რომ შეხვედრას არ დავსწრებოდით და სანაცვლოდ, დეპუტატთან ექსკლუზიურ ინტერვიუსაც შეგვპირდა.
_ ზვიად კვაჭანტირაძე ხომ აცხადებს ღიად, რომ თქვენ გიჭერთ მხარს. რაა დასამალი? რატომ იმეორებთ იმას, რასაც წინა ხელისუფლება აკეთებდა, არაფერი შეიცვალა?
_ უბრალოდ, გთხოვ! არაა ეს საჟურნალისტო თემა. დაელოდე ზვიადს გარეთ და მე გაძლევ გარანტიას, რომ გამოვა, მოგცემს ინტერვიუს! იქ არ გვინდა რა, ღია საუბარი უნდა იყოს.
შეხვედრას მაინც დავესწარით, რომლის დასაწყისშივე, საკრებულოს თავმჯდომარის მოვალეობის შემსრულებელმა, ავთანდილ მექვაბიშვილმა დეპუტატებს მადლობა გადაუხადა მობრძანებისთვის. მისი განცხადებით, დეპუტატს სურვილი ჰქონდა, შეხვედროდა საკრებულოს წევრებს და ამიტომაც შეაწუხა ისინი არასამუშაო დღეს.
დეპუტატებიდან, რომლებიც მანამდე შეხვედრის მიზეზად სახალისო მოტივებს ასახელებდნენ, მხოლოდ ლელა ნაცვალაძემ გამოხატა კვერღელიძისადმი მხარდაჭერა და სხვებსაც ანალოგიურისკენ მოუწოდა; მისი განცხადებით, “ზურგსუკან თამაშები იგეგმება და ეს საფუძვლიანი არ იქნება”.
_ აღარაა დღეს ის დრო, რომ ვიღაცეებმა კაბინეტებში და ბუჩქებში, ქუჩაში გადაწყვიტონ, ვინ უნდა გახდეს საკრებულოს თავმჯდომარე, _ განაცხადა ლელა ნაცვალაძემ.
საკუთარი პოზიცია გამოხატა ლევან ნინიძემ, ფრაქცია ” ქართული ოცნების” თავმჯდომარემ საკრებულოში:
_ ჩვენ ძალიან მნიშვნელოვან საკითხთან დაკავშირებით შევიკრიბეთ. მინდა გითხრათ, რომ ბატონი დიმიტრი ყველასთან გადიოდა კონსულტაციებს, გარდა ” ოცნების” ფრაქციისა, რატომღაც.. ასევე არ თვლიან „ ქართული ოცნების” ფრაქციის მხარდაჭერას მნიშვნელოვნად. ამასთან დაკავშირებით გვაქვს გარკვეული შეკითხვები.
შეხვედრაზე დეპუტატებს პარლამენტში ოზურგეთის მაჟორიტრმა დეპუტატმა ზვიად კვაჭანტირაძემ მიმართა და იმაზეც ისაუბრა, ჰქონდა თუ არა კონსულტაციები კოალიცია “ქართული ოცნების” ადგილობრივ ლიდერებთან კვერღელიძის კანდიდატურასთან დაკავშირებით:
_ შეკითხვა, რომელიც გაჩნდა კოალიციის შესახებ, მე გეუბნებით სრული პასუხისმგებლობით, რომ დიმიტრი კვერღელიძის კანდიდატურის შესახებ მე მქონდა შეხვედრა კოალიციის ყველა წარმომადგენელთან, პარტიის ყველა ლიდერთან. მე მათგან ამ კანდიდატურის სრული მხარდაჭერა მაქვს. უპირველესად დათო დარჩიას აზრი მაინტერესებდა იმიტომ, რომ ის არის ადგილობრივი “ქართული ოცნების” ორგანიზაციის თავმჯდომარე. მართალია, დროებით, 6 თვითაა მოვალეობის შემსრულებელი, ალბათ, ისევ აირჩევენ და ის პატივს სცემს საკრებულოს უმრავლესობის გადაწყვეტილებას. აი, ეს არის დათოს აზრი. მზად ვარ, ვისაუბრო და სხვა არგუმენტაციაც მოვიტანო… ასევე გპირდებით, რომ პატივისცემით მოვეპყრობი თქვენს გადაწყვეტილებას, რადგან ჩვენ ვაპირებთ თანამშრომლობას. მე პირველივე შეხვედრაზე გამოვთქვი ამის სურვილი, მაგრამ არც ერთხელ არ შემომსვლია ზარი თქვენი ყოფილი თავმჯდომარისგან, ბატონი ალეკოსგან, მას არც ერთხელ არ დავუპატიჟებივარ საკრებულოს სხდომაზე. მე დავესწრები ყველა საკრებულოს სხდომას დღეიდან, არცერთს არ ჩავაგდებ, მაგრამ იმ იმედით, რომ ვიქნები თქვენთვის სასურველი თანამონაწილე საკრებულოს სხდომისა.
მინდა ხაზგასმით აღვნიშნო, რომ ძალიან დიდი იმედი მაქვს, რომ თქვენ გადაწყვეტილებას მიიღებთ ახალი შემართებით, ახალი თავმჯდომარით, სხვა რეჟიმში იმუშავებთ გამგეობასთან, გამგებელთან და დააბალანსებთ ერთმანეთს. ასევე, დიდი იმედი მაქვს იმისა, რომ თანამშრომლობა შედგება ისე, როგორც უნდა შედგეს. როგორც არის წესი, რიგი და კანონი, როგორიც ეკადრება თითოეული თქვენგანის ღირსებას.
სიტყვას ვაძლევ თითოეულ თქვენგანს, არანაირ ინტრიგებს, ხრიკებს, დაძაბულობას ჩემი მხრიდან ადგილი არ ექნება. სათქმელს ყოველთვის ღიად გამოვხატავ თქვენს წინაშე. მე ათასჯერ ვიფიქრე, საჭირო იყო თუ არა ჩემი აზრის ოფიციალურად დაფიქსირება… მოგიწოდებთ, რომ თქვენი არჩევანი სწორად დააფიქსიროთ. მე დიმამ მითხრა, რომ თქვენთან შეთანხმებით შეგხვედროდით ამის თაობაზე. დაფიქსირდა ეს პოზიცია დიმას მხრიდან და მეც დავაფიქსირე ჩემი პოზიცია. ჩათვალეთ, რომ ამას ვამბობ სრული პოლიტიკური პასუხისმგებლობით. საერთოდ მინდა იცოდეთ, მე ვითვლები ერთ-ერთ გამოუსწორებელ კოალიციონისტად „ქართულ ოცნებაში”. არის აზრთა სხვადასხვაობები… მინდა, დაგარწმუნოთ, რომ მომავალი საპრეზიდენტო არჩევნები და ადგილობრივი არჩევნები იქნება კოალიციურ რეჟიმში. შეიძლება, ვინმე შემოგვიერთდეს, ამას არ გამოვრიცხავ. თუ ჩემი პროგნოზი არ გამართლდება, თქვენ შეგიძლიათ, მითხრათ, რომ არაფრის კაცი არ ხარო,” _ უთხრა საკრებულოს წევრებს კვაჭანტირაძემ.
